Jirimaya 46 - DAWAN BÎLA AISKA

Carquemis ra Idsip uplika nani ba batakan

¹ Nisan nani ra dîa takaia dahra ba Dawan Jirimaya ra aisin.

² Witin ai bîla blikan ba sika Idsip dukiara aisaia, baku sin king fero Necao Idsip kingka aiklaklabrika nani ra dîa takan ba, Necao Carquemis ra iwi kan Éufrates awala lamara, baha piua Joaquim, Josías luhpia waitna Juda kingka ba pat mani walhwal king kan, Nabucodonosor Babilon kingka ba bal aiklabi pura lui batakan:

³ “¡Kainam kahbaika nani ba ridi dauks! ¡Man nani aiklabaia taki was!

⁴ ¡Aras nani satilka ba mangks! ¡Âiulra nani, uls! ¡Lamla prakaika nani praks bara man nani lainkam ra bus! ¡Langsa nani ba mala dauks! ¡Man nani lamam prakaika ba dims!

⁵ “Sakuna, ¿kaikisna ba dîa? Sirang tara iwi kli ai ninara tawi auya ba, aiklaklabrika nani ba pura luan yakabrira takan; taki plapi banhwisa, ai ninara tawi kaikras. ¡Tnaya kir sibrin tara bâra sa! Yang, Dawan, kasak aisisna.

⁶ ¡Plaplapra nani ba plapaikas takan, kau tahplu nani plapi swak takras! Yahbra ra, Éufrates awala lamara, ai mina pruki kauhi banhwisa.

⁷ ¿Baha ba ya Nilo lisamra dingkan baku ba, awala kum lî karna aubi baku ba?

⁸ Baha sika Idsip, Nilo awala lisamra dingkan baku ba, awala kum lî karna aubi baku ba. Idsip aisisa: ‘Lisamra dingki tasba ba banhkaisna, tawan nani ba sauhkaisna, upla nani ba sin.’

⁹ “¡Aras nani ba yas taki wabia! ¡Wagin nani ba yas plapbia! ¡Aiklaklabra nani ba mahka wapbia: suldiar nani Etiopía wina Libia wina, ai kaina kahbaika nani dimisa; Lidia wina suldiar nani, pantamangka lalulkra nani ba!

¹⁰ Naha yua na Dawan karnika sut bri ba yua, witin ai waihla nani ra pana munaia yua. Sord nani biara banhbia ba kat, tala di bla takbia ba kat. Dawan karnika sut bri ba daukbia upla iki yakabaia yahbra tani tasbaya ra, Éufrates lamara.

¹¹ “¡Idsip uplika nani, sîka pliki Galaad ra was! ¡Sakuna sîka nani pliki brima ba, man nani ra hilp âpu kabia, sîka âpu man nani mai rakaia!

¹² Nisan nani ba pat walan man nani swiram daukan ba, tasba bani ra inankam ba walisa; aiklaklabra nani pana pana wal prukisa, sut tasba ra kauhi karwisa.”

Nabucodonosor Idsip mapara aiklaban ba

¹³ Dawan, prapit Jirimaya ra aisin, Nabucodonosor Babilon kingka ba, Idsip mapara aiklabaia balan ba ra:

¹⁴ “Man nani Idsip ra maisa paks, Migdol, Menfis, Tafnes nani ra sin: ‘¡Aihwaki bas, man nani ridi bas! ¡Sord ba ai kaina kir langki aula!’

¹⁵ Bîpkam wainhka Apis, gâdkam, ¿dîa muni plapan? ¿Dîa muni bâra ban bûi kapras kan? ¡Yang, Dawan, bal pruki batakri!

¹⁶ Suldiarkam nani ba ai mina pruki kauhisa, bara ai walka ra pana pana wisa: ‘¡Yawan naha wina mahka wap, kaisa wan kuntrika ra kli waia, yawan bahara aisubi takan ba kuntrika ra! ¡Aiklabi wan sauhki aula ba wina yawan kaisa plapaia!’

¹⁷ “Man nani Idsip kingka, king fero nina ba naku mâks; ‘Bin tara, sakuna sans âpu.’

¹⁸ Yang, king sna ba, bara nini ba Dawan karnika sut brisna, rayaki ni swer takisna: Tabor ilka il nani tilara kau purara ba baku, Carmelo ilka, kabu purara daiwi takan ba baku, waihla aula ba baku sa.

¹⁹ Idsip uplika nani, ridi taks, mai priski mai brih waia aula ba, Menfis ba bîla man dauki swibia, slingban upla bâra iwbia apia.

²⁰ Idsip ba bîp tiara painkira kum baku sa, sakuna witin ra samaia, yahbra wina walmu kum aula.

²¹ Mana aibapan aiklabi suldiar nani ba bîp wainhka batanira nani baku sa, sakuna baha nani sin sip bapi buras taki plapbia, witin nani sauhkaia yua ba aula, klala yabaia piua ba.

²² Idsip, piuta plapi baku wasbi plapbia aiklaklabra nani ba ai lamara balbia bara asa ni witin nani wal aiklabia, dus ra klaki baku klaki kabia.

²³ ¡Dus ailal pali pâwan baku ba sut klakbia! Yang, Dawan, kasak aisisna. Aiklaklabra nani ba ailal pali sa, tristrisia nani sip kulki sakras ba baku sa.

²⁴ Idsip ba mâyara ikan kabia, yahbra uplika nani mihta ra aimakbia.”

²⁵ Dawan, karnika sut bri ba, Israel Gâdka ba, aisisa: “Amón Tebas gâdka ba klala yabaisna, Idsip gâdka nani ba, kingka ba sut, king fero ra kasak luki nani ba sin klala yabaisna.

²⁶ Nabucodonosor, Babilon kingka upla âikra witin nani ai waihla ba mihta ra, ai uplika mihta ra sin mangkamna. Sakuna baha piua ba bal lui wabia ba ra, blasi upla nani Idsip ra iwi kan ba baku kli iwi kabia. Yang, Dawan, kasak aisisna.

Dawan bui ai uplika nani ba swaki sâkbia

²⁷ “Duki dadaukra, Jekob uplika nani, si bripara; Israel, si bripara. Man bara luhpiam nani ba swaki sakamni tasba wala ra bahara silak ra mangkan ba wina. Kli kupiam kumi iwi kama, âmyapah, upla kumi sin sirang mai ikbia apia.

²⁸ Yang Dawan, kasak aisisni: duki dadaukra, Jekob uplika nani, si bripara, kan yang lika man nani wal sna. Baha nisanka nani tilara mai yakabri ba sut sauhkamni. Man lika mai sauhkamna apia; klala briaia sma klalka ni baman maikamna, wapni mai daukaia dukiara.”