Jirimaya 45 - DAWAN BÎLA AISKA

Baruc raya kabia win

¹ Joaquim, Josías luhpia waitna Juda kingka ba, mani walhwal king kan ba piua ra sika, Jirimaya dahra aisin Baruc Neria luhpia waitna ulban ba, bara Jirimaya Baruc ra naku win:

^2-3 “Baruc, man wisma: ‘¡Yang pât saura ra sna! ¡Dawan mita swiri dauki sairka sin paskan! Yang inan man swapri, maisi nihkra âpu.’ Bamna baha dukiara Dawan naku aisisa,

⁴ bara baha mai wiaia ai blikan: ‘Yang mâkri ba yang slingbisna, yang mangkri ba daikisna. Tasba aiska ra sin baku daukamna.

⁵ ¿Man baman diara painkira kum makabaia lukisma? Baku kaka makapara, kan pât nani ba upla sut purara yang blikaisna. Sakuna diara kumi baman mai daukamna: ani anira wama ba mai swirka pruma apia, raya kama. Yang, Dawan, kasak aisisna.’ ”