Jirimaya 44 - DAWAN BÎLA AISKA

Ju nani Idsip ra wan bara Dawan ai bîla blikan ba

¹ Ju nani sut Idsip ra Migdol, Tafnes, Menfis tawanka nani waupasa tani ra bâra ba baha nani ra wiaia bîla blikan ba Jirimaya walan:

² “Dawan karnika sut bri ba, Israel Gâdka ba, aisisa: ‘Man nani kaikram sika yang daukri ba Jerusalem purara, Juda bara tawan wala nani purara sin bal nahki sauhki tikan ba. Nanara baha nani sut slingwan sa, baha tawanka nani ra nanara upla iwras

³ watawika nani witin nani daukan ba tâka, witin nani gâd wala nani ra pura suni mayuni sakripais dauki kîa pain angki dauki, swiri daukan ba mita; baha gâdka witin nani kakaira apia bara ai damika nani sin kakaira apia kan ba.

⁴ Prapitki duki dadaukra nani ba pat pat blikri man nani ra mai wiaia, baha diara saura misbara kaikisna ba man nani daukaia apia.

⁵ Sakuna man bîli walras, aisisna ba sin walras. Watawikam nani swiaia watlika ra kli gâd wala nani ra kîa pain nani angki yaram.

⁶ Baha dauki ai munan kupi baiwan bara lawi daukri, bara bal Juda tawanka nani ba pauta klauhan ni angkuna, Jerusalem tawan yabalka ba sin. Nanara baha nani aisawan upla iwras tasbaya bîla man ban sa naiwa kat.

⁷ ‘Baku bamna, Yang, Dawan karnika sut brisna, Israel Gâdka, aisisna: ¿Dîa muni man nani klauna baha mai sauhki tikaia pâtka tara ba puramra bri balaia daukisma? ¿Dîa muni man nani mita Juda uplika nani, waitna, mairin, tuktan nani, bisi baikan lupia nani ba sut pruaia daukisma, upla sut âpu takaia?

⁸ ¿Dîa muni man nani daukankam nani ni swiri daukisma, Idsip ra gâd wala nani ra kîa pain nani angki yabisma, baha tasbaya ra man nani takaski iwaia balram apia? Baha daukanka ba ni munisma man nani ra mai sauhki tikaia lâka ba, nisan nani tilara tasba aiska ra man nani ba lahtuban swiram takan uplika nani kama.

⁹ ¿Pat âmya tiwan ki damikam nani watawika nani sut daukan ba, Juda kingka nani maya nani sin saura daukan ba, man nani sin bara mayam nani sin Juda tawan yabalka nani ra Jerusalem ra sin saura daukram ba?

¹⁰ Nanara kat lukankam saura ba man nani kau swiras sma, sibrin sin mai daukras, smalkanka nani lâ maikri ba damikam nani ra yabri ba sut man nani daukras.

¹¹ ‘Baha mita yang, Dawan karnika sut brisna, Israel Gâdka, man nani ra aisisna: Yang luki kaikri man nani puramra pât nani bri balaia bara Juda aiska sauhkaia.

¹² Bamna yang daukaisna Juda ra takaskan uplika nani ba Idsip ra iwaia wan nani ba, sut pali sauhki âpu daukbia. Sut pali, sirpi lupia nani ba wina tara ba kat, war ra, apia kaka sanglang ra pruaia. Man nani ninam ba lahtuban uplika nani mâkbia, swira daukan upla ra sirang ikaika takma.

¹³ Idsip ra iwi nani ba klala yabri Jerusalem ra iwi nani ra klala yabamna ba baku, war, sanglang, siknis blikamna.

¹⁴ Baha daknika lupia Juda wina Idsip ra iwaia wan ba wina, kumi sin plapi swakwi raya kabia apia. Witin nani kli Juda ra bal takaski iwaia lukbia sin, sakuna sip tawi balbia apia, ban kra plapi baman tauki nani ba wina kulki lika.’ ”

¹⁵ Bara waitna nani bâra kan, witin nani kaiki kan ai maya nani ba gâd wala nani ra diara kîa pain nani angki yabi kan ba, mairin nani ba bâra kan, witin nani ba pat upla ailal asla takan kan, Ju nani sin Idsip tasbaya waupasa tani ra iwi kan ba, baha nani sut Jirimaya ra win:

¹⁶ —Baha bîla Dawan aisin wisi man bui yang nani ra ai wiram ba walamna apia.

¹⁷ Sakuna yang nani dîa daukaia lukri ba baha ban dauki kamna, yang nani gâdki Kwin Kasbrika Purara bara witin ra kîa pain sakripaiska dauki wain sin bri sal yabamna, yang nani kainara dauki kapri ba baku nanara sin dauki kamna, damiki nani, king nani bara wihta nani Juda tawanka nani ra Jerusalem yabal ra sin dauki kan ba baku. Blasi yang nani plun ailal bri katna, diara sut yamni kan yang nani ra pât balras kan;

¹⁸ sakuna yang nani Kasbrika Purara Kwinka ba ra, kîa pain angki witin ra wan prisantka yaras swiri yua ba wina, diara sut âpu takisna, upliki nani na sanglang pruisa, apia kaka war ra ikisa.

¹⁹ Mairin nani ba sin kau pura prakan: —Yang nani sin Kasbrika Purara Kwinka ba lilka ra turtiya dauki witin ra yabi kapri, kîa pain ba angki wain sin prisant yabri. Baha ba sin yang nani mayi waitna ai win bara baku daukri. Bamna yang nani ban baku dauki kamna.

²⁰ Waitna nani, mairin nani ba sut baku aisin bara Jirimaya pana witin nani ra naku natka ra aisin:

²¹ —¿Man nani lukisma Dawan baha kaikras, apia kaka âuya tiwan lukisma, man nani, bara damikam nani, king nani, wihta nani bara upla wala nani sin kîa pain nani angki gâd wala nani ra yabi kan ba, Juda tawanka nani yabalka ra Jerusalem yabalka nani ra sin?

²² Man nani daukankam saura nani daukisma ba mita, Dawan lilia apia kan witin kau sip ai kupia alki takaskras kan. Baha mita naiwa man nani kuntrikam ba sauhki swin sa, upla bahara iwras; lahtuban nani, upla sirang ikaika takan.

²³ Nanara man nani pât ra sma na baha daukanka daukram ba tâka mita sika, gâd wala nani ra kîa pain nani angki yabram ba tâwan, baku Dawan mapara saura daukram, dîa daukaia win ba ai lâka nani ba wali, adar nani maikan ba sin daukras.

²⁴ Upla sut ra Jirimaya baku win; bara mairin nani ba sin walaia aisin: —Man nani sut, Dawan ai bîla blikan na wals, Juda wina nani Idsip ra iwisma ba.

²⁵ Dawan karnika sut bri ba, Israel Gâdka, aisisa: ‘Mairin nani man nani baku aisi sin daukisma. Man nani wisma pat pramis takram Kasbrika Purara Kwinka ba ra kîa pain nani angki wain prisantka nani sin yabaia, man nani dîa aisaram ba kat daukma. ¡Pain pali, aisaram ba baku warkka ba sin dauks!

²⁶ Sakuna Juda uplika nani, man nani Idsip ra iwisma ba, naha wals, yang, Dawan, man nani ra aisisna: Nini kulkanka tara ba ni swer takisna, Juda uplika Idsip ra iwi ba kumi sin kli yang nini mâki, aisabia apia: Dawan rayaka nina ra.

²⁷ Kan yang aihwaki kaiki kamna pât nani ba man nani ra blikaia, diara yamni nani lika apia. Juda uplika nani sut Idsip ra iwi ba titikbi âpu daukaisna war ra, apia kaka sanglang ni.

²⁸ Upla maura baman war ra pruras Idsip wina kli Juda ra balbia. Baku, Juda ra takaski iwan nani ba Idsip ra wih iwan nani sin kaikbia, ya aisin bîla ba kat diara nani takan sapa, yang aisisna ba, apia kaka witin nani aisin ba takan sapa.

²⁹ Yang, Dawan, man nani ra naha tukinka maikamna, man nani bui yang ra ai munaia baku aisaram baha baku takbia, naha kuntrika ra yang bui man nani klala maikamna:

³⁰ Idsip kingka fero Hofra, witin ra ikaia ai waihla nani aula ba mihta ra mangkamna, Sedequías Juda kingka, Nabucodonosor Babilon kingka, ai waihla ikaia balan mihta ra mangkri ba baku.’