Jirimaya 43 - DAWAN BÎLA AISKA

Witin nani Jirimaya ba Idsip ra brih wan

¹ Dawan, witin nani ai Gâdka, dîa witin nani ra wiaia win ba Jirimaya baha sut witin nani ra win ningkara,

² Azarías Hosaías luhpia, Johanán Caréah luhpia, waitna wala nani sin praut lâka bri nani ba, Jirimaya ra win: “¡Man aisisma ba kunin! Dawan wan Gâdka mai wiras ai wiaia yang nani Idsip ra wih iwaia apia.

³ Baha sika Baruc Neria luhpia waitna mita mai win, yang nani maipara man baku aisaia; bara baku dauki yang nani na Caldea uplika nani mihta ra ai batakaia, ai aiki priski, Babilon ra ai brih waia.”

⁴ Bara baku aisi si, Johanán aiklaklabra wihtka nani upla wala nani ba sin Juda ra takaskras, Dawan win adarka ba bîla walras.

⁵ Takaskaia watlika ra Johanán aiklaklabra wihtka nani ba wan bara upla plapi plis wala ra wan nani kli Juda ra bal bahara iwaia takaskan nani ba:

⁶ waitna, mairin, tuktan waitna, tuktan mairin nani, king luhpia mairin nani, baha nani sut aihwawakra nani kamandantika Nebuzaradán mita Guedalías ra main kaikaia swin uplika nani ba, baha nani tilara Jirimaya bara Baruc sin, baha nani sut asla takan.

⁷ Dawan aisi ba walras, witin nani sut mahka impaki Idsip ra wan, Tafnes tawanka ra takaskan.

⁸ Tafnes ra, Dawan Jirimaya ra aisi, win:

⁹ “Walpa tara nani ba bris, Juda uplika nani ba mai kaiki kaka, bara king fero watla ra waia yabalka ra slaubla ra walpaya nani ba biks.

¹⁰ Bara witin nani ra wis: ‘Dawan, karnika sut bri ba, Israel Gâdka ba, aisisa: Yang daukaisna duki dadaukra Nabucodonosor, Babilon kingka ba balaia, yang mita ai iwaika ai tintka watla ba yang walpa nani bikri ba purara bapbia.

¹¹ Witin balbia Idsip kuntrika ba sauhki tikbia. Prubia win, uplika nani ba prubia; priski brih wabia win uplika nani ba priski brih wabia; war ra prubia win uplika nani ba sin, war ra prubia.

¹² Idsip gâdka tempelka nani ba pauta mukamna, gâdka nani ba ni pauta mukamna bara uplika nani ba priski silak ra mangki brih wamna. Idsip kuntrika ba klin daukamna, Sepad kum ai prâka wina kûa nani saki ba baku, baha ningkara upla kumi sin witin ra takaskbia apia, mahka wabia.

¹³ Idsip tawanka ra Heliópolis lilka nani paskan ba yabal nani ra sauhkamna, Idsip gâdka nani tempelka nani ba angkamna.’ ”