Jirimaya 42 - DAWAN BÎLA AISKA

Upla nani ba Jirimaya ra pura sunra kum makaban

¹ Aiklaklabra nani wihtka sut, Johanán Caréah luhpia waitna, Azarías Hosaías luhpia waitna, bara upla sut, sirpi bara tara nani,

² prapit Jirimaya lamara wan bara witin ra win: —Diara kum man ra makabi walaia yang nani balri; apia ai wipara: Yang nani kau wiria lupia baman nâra sna na tâiwan Dawan Gâdkam ra puram suns. Blasi yang nani upla ailal katna, sakuna man kaikisma yang nani wiria lupia baman sna.

³ Dawan Gâdkam ra puram suns yang nani nahki dauki waia yabalka ba mairikbia.

⁴ Jirimaya witin nani ra win: —Yamni aisaram. Man nani tâmwan Dawan Gâdki ra puri sunamni, man nani makabram ba baku, bara witin pana yang ra dîa ai wibia ba, yukukamna apia, sut mai wimna.

⁵ Bara witin nani kli Jirimaya ra win: —Dawan Gâdkam ba yang nani maipara witnis kasak wapni kabia, yang nani ra ai wibia witin dîa man ra mai wibia ba yang nani daukras kamna kaka.

⁶ Dawan pana aisabia ba yang nani kupi lâka kabia, apia kra kabia sin, yang nani Dawan Gâdki bîla walamni, witin ra puram sunaia yang nani makabisna, baku yang nani ra diara sut yamni kaia dukiara.

Jirimaya ai pura sunan Dawan pana aisin ba

⁷ Yu matawalsip luan ba ra, Dawan Jirimaya ra pana aisin,

⁸ bara witin Johanán Caréah luhpia waitna ba win balan, aiklaklabra nani wihtka ba, baha nani uplika nani ba bara upla sut sirpi wina tara ba kat,

⁹ bara witin baha nani ra win: “Dawan, Israel Gâdka ra man nani makabi walan mai dauki ba wiaia ai wiram, bara witin wisa:

¹⁰ ‘Man nani naha tasbaya ra takaski iwaia wilin sma kaka, man nani ra diara yamni nani takaia daukamna; mai sauhkamna apia, mai mangkamna bara kli mai daikamna apia, man nani mai sauhkaia baha pâtka blikri ba kupi wirha takisa.

¹¹ Man Babilon kingka ra luki sibrin pali mai dauki ba, si bripara. Man nani lika witin sîa bripara. Kan yang lika man nani wal sna witin karnika ba wina swaki mai sakaia pri mai sakaia. Yang, Dawan, kasak aisisna.

¹² Yang lika man nani ra luki kupi kriwan ban kamna, Babilon kingka sin daukamna man nani ra ai kupia swapni kaia mai swika kli tasbayam ra balaia.’

¹³ “Sakuna man nani naha kuntrika ra takaskaia apia, Dawan Gâdkam bîla walaia apia,

¹⁴ witin nani aisisa: ‘Idsip ra waia brin ai daukisa, bahara yang nani war aiklabamna apia, trumpit puhbi binka ba sin walamna apia, yang nani sin sanglang pruamna apia’, wima kaka,

¹⁵ man nani, Juda uplika nani nâra takaskuma ba, Dawan karnika sut bri ba, Israel Gâdka aisi ba man nani wals: ‘Ban Idsip ra wih, bahara iwaia lukisma ba,

¹⁶ war bara sanglang sîa mai dauki ba baha sut bahara mai alkbia, man nani sut bâra pruma.

¹⁷ Sakuna man nani walras ban Idsip ra wih iwaia lukisma nani ba sut, bahara war ra siknis ra bara sanglang ra pruma. Upla kumi sin raya kabia apia; pât blikamna ba wina upla kumi sin plapi swak takbia apia.’

¹⁸ “Dawan karnika sut bri ba, Israel Gâdka, aisisa: ‘Yang lawanki kupi baiwanka laptika Jerusalem uplika nani ra alkan ba, baha baku man nani mampara sin takbia, ban Idsip ra wama kaka. Man nani ninam ba lahtuban uplika nani mâkbia, upla ra sirang ikaika takma, naha tasbaya ra sin kli tawi balma apia.’

¹⁹ Man nani Idsip ra waras ban Juda ra takaskuma ba, Dawan mai wisa man nani Idsip ra wapara. Pain tânka bris, nanara yang mai wisna.

²⁰ Man nani mistik saura kum daukisma man nani bal yang ra makabram, yang Dawan Gâdkam ra makabaia, man nani naku ai wiram: ‘Dawan wan Gâdka ra yang nani tâiwan man puram suns, bara witin dîa yang nani ra aisabia ba sut ai wis, baha yang nani daukamna.’

²¹ Dawan Gâdkam man nani ra mai wiaia ai win ba yang mai wîri, sakuna man nani bîla wali daukaia brin mai daukras sa.

²² Baha mita, man nani pain tânka bris war ra, sanglang mita, siknis mita, ani ani kuntrika ra man nani iwma ba bâra pruaia sma.”