Jirimaya 39 - DAWAN BÎLA AISKA

Jerusalem batakan ba

¹ Sedequías ba Juda ra pat 9 mani king kan, baha manka ra kati matawalsip aimakan ba ra, Babilon kingka Nabucodonosor aiklabaia uplika nani ba sut aikuki Jerusalem mapara aidrubi bal, tawan ba kutban.

² Baha wina mani wâl luan, 11 mani aimakan ra baha manka ra kati walhwal, yua 9 ra Sedequías waihla nani ba tawan ra diman,

³ Babilon kingka watla ra wihta nani ba, Nergal-sarézer, Samgar-nebó, Sarsequim, kli wihta tara wala Nergal-sarézer sin, witin nani tawan lilara getka ba ra dimi takaskan, wihta tara nani ba sin.

⁴ Bara king Sedequías, suldiar nani ba sin kaikan dîa dîa taki ba, witin nani tawan ba wina taki plapan. Tihmia ra king giadinka yabalka bâk taki, tawan kutbanka wâl ba lila ra get bâk lui wan, bara Jordan ra waia il bîla yabalka ba ra aimakan.

^5-6 Sakuna Caldea uplika suldiarka nani ba witin nani nina bliki, Jeriko tasbaya langnika ba kat Sedequías alkan, Riblá ra brih wan Nabucodonosor ra yaia, baha sika Hamat tasbaya ra. Bara bahara Nabucodonosor lâ daukan: Sedequías kaiki kan luhpia waitna nani ba nana dakbi ikan, Juda wihta tara nani ba sin baku ikan.

⁷ Bara Sedequías lika nakra nani ba daiki priski Babilon ra brih waia win.

⁸ Bara Caldea uplika nani ba mita king watla ba angkan, tawan ra utla nani ba sin, Jerusalem kutbanka ba sin slingban.

⁹ Baha ningkara, Nebuzaradán king watla ra aihwawakra nani kamandantika ba mita, tawan uplika nani ba, wala nani sin Caldea uplika nani tilara kan ba, bara baku sin upla sut ba tasbaya wina saki Babilon ra brih wan.

¹⁰ Juda ra swin ba lika upla kau umpira nani kan ba baman, witin nani diara âpu kan ba; wain nasla nani ba insla daukaia tasbaya nani ba, baha nani ra yan.

Jirimaya ba pri sakan

¹¹ King Nabucodonosor Babilon kingka ba, Nebuzaradán aihwawakra nani kamandantika ba ra win, Jirimaya ra dîa wiaia ba:

¹² “Man bui witin ba main kaiki bas, bara saura munpara, witin dîa makabi ba sut yas.”

¹³ Bara Nebuzaradán witin, bara wihta tara wala Nergal-sarézer, bara kau wala wâl lâ watla wina brih, baha purkara wihta wala nani Babilon wina nani ba sin aikuki,

¹⁴ blikan wan Jirimaya bara king watla latka ra aihwawakra nani kaiki ba wina saki, Guedalías ra, Ahicam luhpia waitna Safán mulika ba ra yan witin Jirimaya ai watla ra brih main kaiki kaia. Bara baku, Jirimaya ba upla nani tilara bâra kaia sip kan.

Ébed-mélec bîla kaikanka brin ba

¹⁵ Jirimaya kau Juda ra king watla latka ra silak ra kan taim, Dawan bui witin ra aisin, bara naku win kata:

¹⁶ “Was Ébed-mélec, Etiopía wina ba ra wis: ‘Dawan karnika sut bri ba, Israel Gâdka ba aisisa: Naha tawanka ra diara saura takbia wîri ba yang aisari ba kat daukaisna, yamnika daukaia lika aisaras. Yang aisari ba takbia ba ra, man bâra kama.

¹⁷ Sakuna yang kainam kahbamna, bara baha uplika nani sîa mai dauki ba mihta ra aimakma apia. Yang, Dawan, kasak aisisna.

¹⁸ Mai ikaia luki nani ba mihta wina swaki mai sakamna. Pruras swak takma, man ba yang ra kasak lukram bamna. Yang, Dawan, kasak aisisna.’ ”