Jirimaya 36 - DAWAN BÎLA AISKA

Ulbanka ba tempel ra brih wan Baruc aisi kaikan

¹ Joaquim, Josías luhpia waitna ba, pat mani walhwal Juda ra king kan ba piua ra, Dawan Jirimaya ra aisin, bara win:

² “Ulbaia wauhkataya kum bris, bara bahara Israel Juda bara nisan wala nani dukiara sin, yang diara mai wîri ba uls; Josías piua mai aisisatna ba wina naiwa kat sturka ba sut.

³ Ban kra Juda uplika nani tânka bribia baha pâtka nani sut witin ra blikaia lukisna ba, witin nani ai daukanka saura ba swibia kaka, witin nani ai watawanka saura daukan pâtka nani ba ban swih tikamna.”

⁴ Jirimaya mita, Neria luhpia waitna, Baruc, paiwan balan, bara Dawan bui witin ra aisin ba witin kli aisi kan, bara Baruc lika ulbi kan.

⁵ Bara Jirimaya Baruc ra naku smalki win: “Wals, yang Dawan tempelka ra waia ai takaskisa ba mita sip wamna apia.

⁶ Baha mita, upla nani ba kli kaiki plun wahwi kaia balbia ba ra man was, bahara yang aisari man ulbram wauhkataya ba aisi kaiks, tawan uplika nani ba bara Juda tawanka nani wina balan nani ba sin walbia, Dawan aisin bîla nani ba.

⁷ Baha wali ban kra witin nani Dawan ra ai pura sunbia, bara ai daukanka saura nani ba swibia, kan Dawan ai kupia baiki, karna lawi naha uplika nani mapara bîla karna aisin sa.”

⁸ Baruc, Jirimaya witin ra dîa win ba baku daukan: tempel ra wan bara Dawan ai bîla blikan ulban wauhkataya ba aisi kaikaia kan.

⁹ Bara Josías luhpia waitna Joaquim, Juda ra pat kati 9 bara mani matsip king kan, Jerusalem uplika nani Juda tawanka wala nani wina sin, kaiki plun piras Dawan ra ai pura sunaia balan.

¹⁰ Tempel kutbanka bîla kau purara ba ra Baruc wan, tempel Getka Raya ra ba dimaika ra, Safán sturi âiulbra luhpia waitna Guemarías wauhkataya âiulbra ba kutbanka ra, bahara witin buan, baha wina ulbanka ba aisi kaikan upla nani ra, Jirimaya aisin bîla nani ba.

Ulbanka ba Baruc aisi kaikan wihta tara nani mawanra

¹¹ Micaías, Guemarías luhpia waitna Safán mulika ba, Dawan ai bîla blikan Baruc aisi kaiki kan ba, witin walan,

¹² bara witin king lâ dauki watla ra wan, sturi âiulbra ba kutbanka ra, wihta tara nani ba bâra banhwi kan: Elisamá, sturi âiulbra ba; Delaías, Semaías luhpia waitna ba; Elnatán, Acbor luhpia waitna ba; Guemarías, Safán luhpia waitna ba; Sedequías, Hananías luhpia waitna ba, bara wihta wala nani sin.

¹³ Micaías witin nani ra win Baruc baha wauhkataya upla nani ra aisi kaiki yan ba.

¹⁴ Jehudí wihta nani mita paiwan: Netanías luhpia waitna Selemías mulika Cusí snawika ba, Baruc ra blikaia baha wauhkataya upla nani ra aisi kaiki yan ba bri balaia witin nani ra. Bara Baruc wauhkataya ba brih wan witin nani ra marikan,

¹⁵ bara wihta nani ba witin ra win: —Bâra iws bara ulbanka ba yang nani ra aisi kaiki aik. Baruc wauhkataya ba aisi kaikan,

¹⁶ witin nani baha walan ba ra, sibrin taki banhwan bara ai walka ra witin nani pana aisin bara win: —Naha sturka na yang nani king ra wiaia sna.

¹⁷ Bara witin nani tawi Baruc ra win: —Yang nani ra ai wis man nahki naha ulbram ba.

¹⁸ Baruc pana win: —Jirimaya witin pali yang ra aisi kan bîla nani ba bara yang ink ni wauhkataya ra ulbri.

¹⁹ Bara baha nani Baruc ra win: —¡Ban kaka, man Jirimaya wal wih yukuwi bas, man nani anira sma ba upla mai kaikbiara!

King Joaquim bui Jirimaya ulbanka ba angkan

²⁰ Wihta tara nani ba, baha wauhkataya ulbanka ba sturi âiulbra Elisamá takaski ba ra swi si king ra wan, sturka ba wiaia.

²¹ King ba Jehudí blikan Elisamá sturi âiulbra takaski ba ra waia, baha wauhkataya ba bri balaia, Jehudí wauhkataya ba bri balan ba ra, king tnaya kir wihta nani ba sin bâra kan, bara witin aisi kaikan king ba wali kan.

²² Baha piua ba baha manka ra pat kati 9 aimakan kan kauhla piua, bara king ba pauta aswan ai lamara bri kan.

²³ Bamna Jehudí wauhtaya ba wahia yumhpa, apia kaka walhwal aisi kaiki bara king baha brih skiru ni klaki sirpi dauki angki kan. Baku dauki wauhkataya ulban ba sut angkan.

²⁴ Sakuna king ba wihta nani ba kumi sin baha angki ba dukiara sibrin daukras, sari takaia tukinka sin marikras kan.

²⁵ Elnatán, Delaías, Guemarías nani lika king ra makabi kan wauhkataya ba angkaia apia, sakuna witin nani ra walras kan,

²⁶ sakuna witin tawi king kiamka luhpia kum Jerahmeel ra adar yan, Seraías ra sin, Azriel luhpia waitna ba, wala Selemías Abdeel luhpia waitna ba ra sin adar yan, prapit Jirimaya ba, wauhkataya âiulbra Baruc sin silak ra mangkaia. Sakuna witin nani ba Dawan mita yukukan.

Jirimaya kli wauhtaya wala ulban ba

²⁷ Jirimaya Baruc ra win ulban wauhkataya ba king mita angkan ba ningkara, Dawan kli Jirimaya aisi, win:

²⁸ “Ulbaia wauhkataya wala bris bara bahara kli uls dîa tâura ulbram kan ba, Joaquim Juda kingka mita angkata ba baku.

²⁹ Wis naku ulbaia: ‘Dawan naku aisisa: Wauhkataya ulban ba man brih angkram, bara Jirimaya ra sin lawi daukram baha ulban ba tâwan, witin ulban Babilon kingka ba balbia, bara kuntrika na sauhkbia upla kum sin âpu, daiwan kumi sin âpu kabia.

³⁰ Baha aitani, daukram nanara, yang, Dawan, Joaquim, man Juda kingka ra, mai wisni man kiamkam wina Debit iwaika ra iwbia apia. Man sin pruma bara kakna ra lata lapta ra prawi kama, tihmia ra lata kauhla ra prawi kama,

³¹ man ra, man kiamkam ra, baku sin wihtkam tara nani ba sut ra sin saurkam daukram mana klala maikamna. Pât nani balaia yang aisari ba man nani puramra, Jerusalem uplika nani purara bara Juda uplika nani sut purara balaia daukamna. Man nani sut sin baha aisinka ba walras baku kapram ba.’ ”

³² Baku Jirimaya ulbaia wauhtaya wala brin baha Baruc ra yan, wauhtaya âiulbra ba ra, bara Jirimaya aisi kan ba witin ulbi kan, witin nani pas ulban kan Joaquim mita angkan ba baku kli ulban. Sakuna tânka wala nani ba sin kau pura prakan naha ulbanka ra.