Jirimaya 32 - DAWAN BÎLA AISKA

Jirimaya tasba pîs atkisa

¹ Dawan aisin Jirimaya ra mani matawalsip Sedequías Juda kingka lâka piua ra, mani 18 Nabucodonosor kingka lâka piua nani ra.

² Baha piua ra Babilon kingka suldiarka nani Jerusalem mapara aiklabi kata, bara Jirimaya ra priski swin kan suldiar mita king watla ra ba latka ra.

³ Sedequías kingka mita blikan wan silak mangkaia, kan Jirimaya naku aisin kan: “Dawan bila: ‘Yang daukamni naha tawanka na Babilon ai karnika bri ba mihta ra kauhbia,

⁴ bara baku sin Sedequías king ba Caldea uplika nani bui ban swibia apia, sakuna kauhbia Babilon kingka karnika ra, bara witin ai mawanra wan kabia.

⁵ Nabucodonosor mita Sedequías ba alki Babilon ra brih wabia, witin bâra kabia, yang mita kli witin ra wark yabamna ba kat. Ban kra man nani Caldea uplika nani mapara aiklama, sakuna diara yamni takbia apia. Yang, Dawan, kasak aisisna.’ ”

⁶ Bara Jirimaya bila: “Dawan aisin yang ra, bara ai win:

⁷ ‘Kaiks, man muihkam Hanamel, tahtikam Salum luhpia waitna ba, witin balbia lâ kum bukaia tasba pîs kum mai atkaia Anatot ra bri tasbaya ba kabia, kan man raitkam aiska brisma kau taika kau lamara sma ba man.’

⁸ Dawan bui yang ra ai win ba baku, tahtiki luhpia waitna Hanamel, silak watla latka ba kat yang wal aisaia balan, yang ra makaban witin Anatot, Betlehem tasbaya ra insla daukaia tasbaya kum bri ba yang atki brimna, kan yang raitki brisna tasbaya ba atki yang briaia, yang lika witin ai taya kau ai lamara sna bamna. Witin aisin ba yang tânka briri, baha sika Dawan adarka baku daukaia win.

^9-10 Bara tasbaya ba tahtiki luhpia Hanamel wina atkri. Silbar mâ 17 yang bui witin ra yabri baha wal aisi mana kulkan ba praiska kat, bara lâka ba wauhtaya ra ulbri, witnis nani aikuki nina ulbi sîl taibri.

¹¹ Bara wauhkataya ulbanka wahia wâl ba briri, wahia kumi sîl taiban baha atkan ba tânka ulban kan, wala ba sin baha tânka ulban kan sîl taibras,

¹² wauhkataya nani ba Baruc, Neria luhpia waitna Maaseías mulika ba ra yabri, tahtiki luhpia waitna Hanamel ai kaiki kan, witnis nani ai nina sain munan sin, bara Ju nani sin baha lâ watla latka ra aihwaki kaiki kan.

¹³ Witin nani bâra kan yang Baruc ra wîri:

¹⁴ ‘Dawan karnika sut bri ba, Israel Gâdka ba, aisisa: Naha wal lâ daukan ulban wauhkataya wâl na bris, kumi ba sîl taiban, wala ba lika sîl taibras, sumi kum ra mangki main kaiki bas. Piu wihka bâra bri kama.

¹⁵ Dawan karnika sut bri ba, Israel Gâdka ba, naku aisisa: Naha tasbaya ra naika upla nani kli balbia utla nani, wain nasla nani atki briaia.’

Jirimaya pura sunra

¹⁶ “Tasba atkri wauhkataya nani ba Baruc Neria luhpia waitna ra yabri ba ningkara, yang Dawan ra puri sunri:

¹⁷ ‘Dawan, man kasbrika pura bara tasba sin paskram ba ni karnikam tara ba marikisma. Man daukaia sip apia dukia ba âpu sa.

¹⁸ Kiamka tausin nani ra latwan kaikisma tânka ba man marikisma, sakuna man sin upla ra klala yabisma aisika nani saura daukan ba tâka. ¡Âu, Gâd, man tara pali karnika sut brisma, man ninam ba Dawan karnika sut bri ba!

¹⁹ Lâ nani aisisma ba warkkam nani, daukisma ba karnika tara pali brisa. Upla nani diara dauki ba man sut kaikisma, bara witin nani dauki ba tânka kat kli yabisma.

²⁰ Man Idsip ra diara aihkakira nani bara sain nani daukram, Israel luhpia nani tilara sin kau naiwa daukisma upla wala nani tilara sin kau ban, bamna baku man ninam ba tasba aiska ra param sa.

²¹ Man, uplikam Israel luhpia nani Idsip wina sakram bara karnikam tara ba marikram, diara aihkakira, sain nani dauki, upla nani ra sut ra sibrin dingkram ba mita ni.

²² Bîp tialka laya nasma lî baku laiwi tasbaya na man bui Israel ra yabram, man baku daukaia ai damika nani ra wiram ba baku daukram.

²³ Sakuna witin nani baha kuntrika ra dimi tasbaya ba brin ba ra, man bîlam walras takan, lâ nani smalkram ba daukras, wark nani daukaia wiram ba sin daukras. Baha mita man bui witin nani ba rausauhkaia blikram.

²⁴ ‘Bara Caldea uplika nani balan tawanka kir ba kutban witin nani mapara aiklabaia, aiklabi kan ba mita, plun wahwan siknis nani ba mita, tawan ba waihla nani aiklabi ba mihta ra kauhaia kan. Dawan, man mita dîa takaia wiram ba baku takan ba kaikisma.

²⁵ Ban sakuna, Dawan, man adar aikram yang baha tasbaya ba atkaia mana aibapaia witnis nani mawanra tasbaya ba naika Caldea uplika nani bal briaia sa sakuna.’ ”

²⁶ Bara Dawan bui Jirimaya ra pana aisin:

²⁷ “Yang sika Dawan, diara rayaka bri ba sut Gâdka. Yang maipara sip apia sna ba kumi sin âpu sa.

²⁸ Baku bamna, yang mai wisni: Yang daukaisna tasbaya ba king Nabucodonosor karnika munhtara kauhaia, witinka Babilon kingka ba, bara Caldea uplika nani mihta ra sin.

²⁹ Baha Caldea uplika nani latara bâra ba tawan ra dimbia bara pauta ni tawan ba angkbia; utla nani utla bahna ra mâkan nani ba sin angkbia yang ra kupi baikbia, witin nani Baal ra, kakaira apia gâdka nani ra sakripais kîa pain nani angki, wain yabi dauki kan.

³⁰ Blasi piua wina Israel luhpia nani bara Juda uplika nani ba yang saura kaikisna ba dauki kan; Israel luhpia nani aidul nani paski yang kupi sauhki ba takaskras ban sa. Yang, Dawan, kasak aisisna.

³¹ Naha tawanka paskaia buan ba yua wina naiwa yua kat, witin nani diara dauki ba yang kupi sauhkaia, bara yang lawaia dukia baman daukisa. Baha mita witin nani ba âpu daukaisna,

³² witin nani naha daukanka nani sut dauki kupi sauhkan ba tâwan, Israel luhpia nani, Juda uplika nani, ai kingka nani ba sin, tâ bri uplika nani ba, prîska nani ba, prapit nani ba, upla sut Juda ra bara Jerusalem ra iwi ba âpu daukamna.

³³ Witin nani ai nina yang ra tawan, ai mawan lika apia. Yang yu bani smalki takaskras pali katna sakuna, witin nani lika yang ra walras, saura dauki ba sin wapni takaia lukras kan.

³⁴ Witin nani ban wih yang tempelki aihka saki aikan ba sin tâski daukan, witin nani paskan aidulka tâski ba baha bilara bri si swin.

³⁵ Baha purkara Ben-hinom ilka bîla ra sin Baal altarka nani paskan, ai luhpia waitna ai luhpia mairin nani Moloc ra sakripais dauki yaia, baku dauki yan Juda saura daukaia, diara tâski yang adar yaras lukanki ra sin âpu kan ba daukan.

Bîla kaikaia pramiska ba

³⁶ “Yang, Dawan, Israel Gâdka, man aisisma ba tawanka ba dukiara aisisni, war aiklabi ba, plun wahwi ba, siknis nani alki ba tâka mita Babilon kingka karnika ra kauhbia:

³⁷ Tawanka uplika nani ba kli asla daukisna, yang kupi baiwan, yang lawri bara yang lawanki tara ra kuntri nani ra yakabri ba wina, yang daukamna witin nani kli bal baha tasbaya ra ai âuyapah iwi kaia.

³⁸ Witin nani ba yang upliki nani kabia, yang sin witin nani ai Gâdka kamna.

³⁹ Yang daukamna witin nani ai kupia aiska ai rayaka aiska ni yang ra baman pain ai kulkaia, witin nani ai yamnika dukiara ai kiamka nani yamnika dukiara sin daukaia.

⁴⁰ Witin nani wal upliki ban kaia lâka kum daukamna: yang bui witin nani ra yamni munisna ba takaskras ban dauki kaia pramiska daukamni; yang ra yamni ai kulki ban kaia kli ai swi waia apia brinka ni banhkamni.

⁴¹ Witin nani ra yamni munisna ba dukiara lilia kamna, bara yang kupi aiska kira kasakka lâka sut ba ni yarka witin nani baha kuntrika ra iwbia.”

⁴² Dawan pura praki aisin: “Naha uplika nani purara sauhkaia lâka tara blikri ba, baku sin pramis munisna ba yamniki nani ba sin blikamni.

⁴³ Naha kuntrika ra man aisisma upla iwras tasbaya takbia, upla nani âpu bara daiwan nani sin âpu kabia, bara Caldea uplika nani bal tasbaya dukia bribia, tasba nani kli atki bribia.

⁴⁴ Tasbaya ba witin nani atkbia ba ra, atkan wauhkataya nani ulban ba sîl prakan ba witnis nani ai nina ulban ba sin kaikbia. Baha baku takbia Benjamín tasbaya ra, Jerusalem kir bara Juda tawanka nani ba sut, il nani tasbaya ba twi langni nani ba sut, Négueb tawanka nani ba, yang daukamna baha uplika nani sut kli tawi balaia. Yang, Dawan, kasak aisisna.”