Jirimaya 31 - DAWAN BÎLA AISKA

Israel luhpia nani kli aula ai tasbaya ra

¹ Gâd aisisa: “Baha piua ra yang kamna Israel kiamka nani sut Dawanka, bara witin nani ba yang upliki.”

² Gâd bila: “Upla iwras tasbaya ra yang yamniki mamrikri tawan uplika wal prura wina swak takram. Israel luhpia ris briaia pliska kum pliki kan ba ra,

³ yang param takri witin ra laih wina. Yang latwan pali mai kaikri ban kaia ra latwanka; baha mita ninam blikisna yamni man dauki kaia.

⁴ Kli mai paskamni, Israel. Kli balma pulaia dukia nani wal bara lilia dans puli kira.

⁵ Kli namsla nani mangkma Sameria ilka nani ra, insla daukma ba dusam mâ wina liliam bri kama.

⁶ Bamna balbia yua kum aihwawakra nani ba Efraín ilka wina wini kabia: ‘Man nani bal, kaisa Saion ra, wan Dawanka Gâd ra.’ ”

⁷ Dawan ba wisa: “Lilia ni aiwans bara Juda tawanka dukiara liliakira bas, kau pali ba nisan nani sut dukiara. Pain wals mayunanka ba, bara wis: ‘Dawan bui ai uplika nani swaki sakan, Israel ra kau takaskan kan ba.’

⁸ Kli daukamna lalma kuntrika wina balaia bara asla mai daukamna tasba tnata ba kat. Baha nani aikuki balram kabia blain bara skahwa nani ba, mairin kwihra nani babaikra, pat ai luhpia brin nani ba sin; ¡upla ailal kli balan kabia!

⁹ Ai pura suni bara ini pali balbia. Yang lî aubra wal brih wari kabia yabal kum klin, mina prukaika âpu bâk. Bamna yang sika Israel aisika, bara Efraín ba luhpi almuk sa.

¹⁰ “Nisan nani, Dawan bîla ba wals maisa paks laih kabu un ra iwi nani ra: ‘Dawan ba Israel ra yakabi aihka sakan, sakuna asla daukan kabia bara main kaikan kabia, sepad ai sîpka main kaiki baku.’

¹¹ Kan Dawan ba Jekob tawanka ba kli bukan, nisan kau karnakira ba wina pri lâka daukan.

¹² “Witin nani balbia bara lilia mita aiwani kabia Saion ilka ra, ai lilia pulan kabia Gâd yamnika ba wal: bara plawar, wain bara batana laya, bîp nani bara sîp nani sut. Kaupin pain paskan ra baku kabia bara kli ai karnika tiwbia apia pali.

¹³ Tiara nani ba dans pulan kabia liliakira, baku sin wahma nani bara dama nani sin. Yang maikamni maisa nihkra: inaia lâka ba lilia ra lakamni, lilia lâka kau tara kum yamna latwan bri ba wal.

¹⁴ Daukamni prîs nani ba plun kau pain ba piaia yang tawanki ba ai lilia bribia diara ailal brisna ba wal. Yang, Dawan, kasak aisisna.”

¹⁵ Dawan ba wisa: “Bîla baikra kum walisa Ramá ra, upla kum inisa sari pali. Baha Raquel inisa, ai luhpia nani dukiara, maisa nihkaia brin daukras, kan pat prui banhwan bamna.”

¹⁶ Sakuna Dawan bila wisa: “Raquel, kau inpara; kau namkra laya sâkpara, kan latwankam mana prisant brima: luhpiam nani kli waihla tasbaya wina balan kabia. Yang, Dawan, kasak aisisna.

¹⁷ Bîla kaikanka kum bâra sa man kainamra: luhpiam nani kli ai tasbaya ra balan kabia. Yang, Dawan, kasak aisisna.

¹⁸ Yang walri Efraín uplika nani ba brukwisa sari lâka tara ni: ‘Yang ba bîp wainhka kum sip smalki tim daukras ba baku sna, sakuna man mita lika puri luram bara tim ai daukram sa, pura luan lâka aikisma; ai dauks kli man ra balaia, kan man sma sika Dawan ba, yang Gâdki.

¹⁹ Yang lika man wina tnaya ra tawri, nanara yang uba lukisna; saura daukri ba daira walisna bara laima prukisna; swiri tara ai daukisa bara bawan lâka ra sâp ai daukan sa wahma kapri ba saura nani daukri ba mita.’

²⁰ “Efraín uplika nani ba yang maipara luhpi latwankira kum sa; baha luhpika ba kau latwan sna. Lawi daukisna ba ra, sip âiya tiwras witin ai dukiara; yang kupi ba dikwisa, lukisna witin dukiara latwan pali. Yang, Dawan, kasak aisisna.

²¹ “Israel, yabalka ra tukin mangkisa, baku lika sip sa kli swapni lâka ra yabal ba sakaia; pain kaiks yabalkam anira watauki kapram ba. ¡Kli bal, Israel luhpia nani, kli bal tawankam nani ra!

²² ¿Ahkia kat tnaya kum wina wala ra waia luhpia mairin kum tiwan baku? Yang, Dawan ba, diara raya daukri naha tasba ra: mairin kum waitna kum ra triswi ba baku.”

Israel liliaka

²³ Dawan karnika sut bri ba, Israel Gâdka bila wisa: “Yang Juda uplika yamnika ba aihka daukamna ba ra, witin nani kli ai tasbaya ra balbia bara ai tawanka nani ra kli wibia: ‘¡Dawan yamni munbia naha ilka holikira ra kasakka lâka dauki ba!’

²⁴ Juda uplika bara ai tawanka nani, insla mamangkra nani, baku sîp main kakaira nani bahara iwan kabia.

²⁵ Bara plun pin kabia, diara din kabia aibanhwan praiska swapan nani ba bara karnikas ba sin.”

²⁶ Naha ni rawi buri bara naikra kwawan. Yapri ra kaikri ba yamni ai win.

²⁷ Dawan ba kasak aisisa: “Yua kum balbia ba ra yang daukamni upla nani bara daiwan nani ailal kabia Israel ra bara Juda ra sin.

²⁸ Bara baku pali ridi kapri daikaia, batakaia, mâyara lahbaia, sauhkaia bara trabil munaia, baku natka ra aihwaki kaikisna paskaia bara mangkaia. Yang, Dawan, kasak aisisna.

²⁹ “Baha piua ra kli aisabia apia: ‘Aisa nani wain mâ swahni pîsa bara luhpia nani napa sriman sa.’

³⁰ Bara ya wain mâ swahni pibia ba baha napa nani ba sriman kabia. Kumi bani ai saurka ra pruan kabia.”

³¹ Dawan ba kasak aisisa: “Yua kum balbia bara yang daukamni lâ raya Israel bara Juda wal ra;

³² naha lâka blasi damikam nani wal lâ daukri kata ba baku apia, yang bui witin nani mihta wina alki Idsip wina sakri, kan witin nani bui yang lâika kulkras kan, yang pali witin nani Dawanka sna. Yang, Dawan, kasak aisisna.

³³ Naha lâka sika yang daukamna ba Israel wal baha yua ra: Yang lâika witin nani kupia ra mangkamni, bara sinska ra ulbri kabia. Yang ai Gâdka kamna bara witin nani ba yang upliki kabia. Yang, Dawan, kasak aisisna.

³⁴ Bara upla ai walka ra, ai uplika nani ra, ai taya nani yang ai kakaira takaia smalkaia nit apia kabia, tara ba wina sirpi ba kat upla sut ai kakaira kabia. Saurka daukan pâtka nani swih tikamna bara kli kupi ra brimna apia. Yang, Dawan, kasak aisisna.”

³⁵ Dawan ba, lapta mangkan sa ingni daukaia kakna ra bara kati slilma nani ba tihmia ra ingni daukaia mangkan, kabu ra taibi munan bara ai binka tara ni praut takisa, nina kum brisa Dawan karnakira ba, baku wisa:

³⁶ “Yu kumi kra lâka nani yang daukri ba wina tnaya ra tawma kaka, baha yua ba Israel ba yang upliki nani win kabia apia. Yang, Dawan, kasak aisisna.

³⁷ Yua kum kra kasbrika pura ba kulkbia tasba nani tânka pliki kaiki ban natka sât sât ra, baha yua ba yang bui Israel ra bahki lâka ra kulkamni baha diara sut daukan ba. Yang, Dawan, kasak aisisna.”

³⁸ Dawan ba kasak aisisa: “Yua kum balbia yang tawanki ba kli paskan kabia, Hananel tawerka wina kutbanka wih takaskan getka ba kat.

³⁹ Kulkanka ba wan kabia, wapni ra, baha wina Gareb ilka kat, ningkara Goá ra balbia.

⁴⁰ Tasba langni sut upla pruan biki ba bara yamhpuska bahara lulki ba, baku sin Cedrón langnika sut ba, baha wina Aras Lui ba durka kat, lalma tani holikira lâka ba ban bâra kabia; bara baha sut ba kli bataki sauhki sin tikan kabia apia.”