Jirimaya 30 - DAWAN BÎLA AISKA

Dawan pramiska ba naika takaia dukiara

¹ Naha bîla nani sika Dawan Jirimaya ra aisin ba, witin ra win:

² “Dawan, Israel Gâdka ba, aisisa: Yang mai wîri ba sut wauhtaya kum ra ulbi swis,

³ yua nani ba aula bamna baha yua ra upliki nani Israel Juda wal ba iwanka ba kli tawi wala ra lakamni. Yang, Dawan, kasak aisisna. Yang daukamna witin nani ai damika nani ra ai tasbaya prapati baku yabri ba ra kli tawi waia.”

⁴ Naha sika baha bîla nani Dawan aisin ba Israel bara Juda wal dahra.

⁵ Dawan aisisa: “¡Sirang ikan ini banhwi ba yang walisna! ¡Sibrin daukisa, ai âuyapah apia sa!

⁶ Man nani makabi wals, waitna kum aisubaia sip sa sapa. ¿Bara dîa muni waitna nani ba latwan bri ai warbisa, luhpa baikaia latwanka bri ba baku? ¿Dîa muni witin nani sut mawan tâlia âpu takan ba?

⁷ ¡Trabil saura piua kum baila aula, baha yua pâtka sât kau takras! Jekob uplika nani sarka piua kum, sakuna yang bui witin nani swaki sakamna.

⁸ Yang, Dawan ba, karnika sut brisna, kasak aisisna: Upliki nani alba lâka ni wilkan ba pri sakamna, witin nani kli tringsar nani albika takbia apia.

⁹ Witin nani bui yang warkki daukbia, ai Dawanka bara ai Gâdka sna, bara Debit ra, yang mita king mangkamni.

Dawan bui ai uplika ba swaki sâkbia

¹⁰ “Yang, Dawan ba, kasak aisisna: Man nani si bripara, Jekob uplika nani, yang duki dadaukra nani, Si bripara, Israel, man bara luhpiam nani sin pri mai sakamna baha kuntri laihura silak ra mai mangkan ba. Kupiam kumi kli iwi kama, âmyapah kama, upla kumi sin sirang mai ikras.

¹¹ Yang, Dawan, kasak aisisni man nani wal sna swaki mai sakaia. Nisan nani ba sut slingbamna baha nani tilara mai yakabri ba. Sakuna man ra lika mai slingbamna apia; klala lika maikamna, mana briaia sma ba kat: klalkam ba maikras lika mai swimna apia.”

¹² Dawan aisisa: “Man insauhkankam ba rawaikas sa, saurkam ba saika âpu.

¹³ Upla âpu sa man warkkam daukaia; upla âpu sa insauhkankam ba sîka mangkaia, man rawaia tânka âpu sma.

¹⁴ Lilam nani ai âuya mai tikan; man ra luki kli trabil takras. Yang bui man ra klala maikri, yang na man waihlam baku, klala karna pali maikri watawi lâka ailal daukram ba tâwan, saurkam nani kulki sakaia sip âpu ba tâwan.

¹⁵ ¿Dîa muni brukwisma insauhkan nani brisma ba tâwan? Sarkam ba tikaika âpu sa. Watawikam lâka ailal pali ba tâwan, yang baku mai munri.

¹⁶ Sakuna ya aiska mai sauhkbia ba aiska sauhkan kabia, waihlam nani ba sut priski brih wan kabia; dukiam nani mihtam dakbi brin ba sin mihta kli dakbi briaia daukamna, dukia na impliki brin nani ba dukia sin implikaia kabia.

¹⁷ Sikniskam nani ba mai rakamna, insauhkan brisma ba sîka daukamna, waihlam nani ba nahki aisabia sin: ‘Saion ba lulki swin sa wibia, upla kumi sin Saion dukiara lukras sa.’ Yang, Dawan, kasak aisisna.”

¹⁸ Dawan aisisa: “Jekob nisanka tasbaya ba kli yabamna, ai kuntrika ba ra luki kupi swapni takbia; tawan nani slingwanka ba purara kli paskbia, utla tara nani ba watlika kat mâkbia.

¹⁹ Witin nani lilia lawana tâ bri aiwanbia lilia kikanka ba sin. Kau wiria takbia apia, witin nani kau ailal daukamna. Bahki kulki kabia apia, kan yang mita witin nani ba yamni kulkamna.

²⁰ Israel luhpia nani ba kli blasi kata ba baku kabia; tawan ba yang maiwanra wapni pali kabia, witin ra tataibra nani ba yang bui klala yabamna.

^21-22 Witin nani ai tila wina wihta sâkbia: wihta tara kum witin nani tila wina bal takbia. Yang laima kat balaia daukamni, bamna, ¿ya kupias taki laimara balaia sip sa? Witin nani ba yang upliki nani kabia, yang sin witin nani ai Gâdka kamna. Yang, Dawan, kasak aisisna.”

²³ Dawan lawanka ba pâsa saura kum baku sa, prari krawi payaska baku watawikira nani ba purara.

²⁴ Dawan kupia baiwanka ba takaskbia apia witin dîa daukaia lukan ba daukbia ba kat. Piua balbia ba ra man nani baha tânka brima.