Biblia Todo Logo
Bìoball air-loidhne

- Sanasan -

Jirimaya 29 - DAWAN BÎLA AISKA


Jirimaya Ju nani Babilon ra brih wan nani ra ulbisa

1-2 King Jeconías, ai yapti kwin ba, ai albika nani king watla ra bri kan ba, Juda Jerusalem wihtka nani dus ni diara papaskra kan ba, kî papaskra nani sut ba tasba wala ra wan ba ningkara, prapit Jirimaya Jerusalem wina wauhtaya kum ulbi baha uplika almuk nani ra blikan. Baku sin, prîs nani ra, prapit nani ra bara Nabucodonosor ra sin upla nani Jerusalem wina Babilon ra brih wan nani sut ra sin blikan.

3 Bara Elasá, Safán luhpia waitna ba, Guemarías, Hilquías luhpia waitna ba, baha nani ba Sedequías Juda kingka ba mita sakan wauhkataya ba brih Babilon ra waia king Nabucodonosor mawanra waia baha yabia. Wauhkataya ra naku ulban kan:

4 Dawan, karnika sut bri ba, Israel Gâdka, witin naku aisisa, baha uplika nani sut Jerusalem wina saki Babilon ra brih wan nani ra:

5 ‘Man nani utla nani mâki mahka bâra iws; dus nani sin mangks bara baha mâ nani wina pis.

6 Mayam bris, luhpiam waitna luhpiam mairin nani bris, witin nani sin ai maya bara ai luhpia nani bribia, man nani kau ailal sahwi bas, kau maura lika apia.

7 Ani tasbaya ra mai blikri tasbaya ba hilpka daukaia man nani wark taki bas, witin hilpka daukaia man nani bui yang ra makas, witin nani yamni kabia bara man nani sin pâwi kama.

8 Yang, Dawan, karnika sut brisna, Israel Gâdka, man nani ra naha maisam pakisna: Dahra aisi nani ba mita bara diara kaiki uplika nani tilamra iwi ba mita swirka kunin mai munbiara; witin nani yaprisauhkan kaiki aisi ba walpara.

9 Witin nani bui yang nini bri aisi ba kunin. Yang bui witin nani ba blikras. Yang, Dawan, kasak aisisna.’

10 “Dawan aisisa: ‘Babilon ra 70 mani piua yari ba lubia ba ra, yang bui man nani ra pramis mai munri ba daukamna man nani ra yamni lukri ba baku tasbayam ra kli mai brih waia.

11 Yang kaikisna man nani dukiam dîa daukaia lukisna ba, man nani ra yamni takaia daukaia sna, saura lika apia, man nani bîla kaikanka aihwa kum brima lukanka wal. Yang, Dawan, kasak aisisna.

12 Baha daukamna bara man nani bui yang ra winma, puram sunra yang ra wabia bara yang bui man nani ra walamna.

13 Man nani ai plikma bara ai sâkma, kan man nani kupiam aiska ni ai plikisma bamna.

14 Âu, yang aisisna, man nani ai pliki ai sâkma, tasbayam ba yang kli maikamna: kuntri bani ra bara plis bani ra nisan nani tilara mai yakabri ba wina asla mai bri balamna, man nani tasbayam ra kli waia daukamna. Yang, Dawan, kasak aisisna.’

15 “Man nani aisisma: ‘Babilon ra Dawan ai prapitka nani wankan.’

16 (Dawan aisisa baha kingka Debit iwaika ra iwi kingka ba dahra, bara baha tawanka ra iwi uplika nani dahra ba sin, witin nani ba man nani tamya, sakuna witin nani ba man nani baku tasba wala ra brih waras kan:

17 ‘Yang, Dawan, karnika sut brisna ba, aisisna: War witin nani ra blikaisna, sanglang, siknis sin. Kwah mâ sukwan saura pali, piaia sip apia kata ba baku daukaisna.

18 War ni, sanglang ni, siknis ni yang bui witin nani ra blikaisna. Yang daukamna nisan nani sut ba mita witin nani ra diara saura kaikan wan daukras dukia baku daukamna, lahtuban swira daukan patrangka kum kaia daukamni, diara kum sirang wan iki sibrin wan dingki ba baku daukamni, nisan nani bani kaikbia witin nani ra yakabamna ba.

19 Baku takbia, kan witin nani ra kupia krauki smalkri yang warkki dadaukra nani dahra aisin ba witin nani walras kan bamna, witin nani ba blikri bara kli blikri, witin nani ra walras kan sakuna. Yang, Dawan, kasak aisisna.

20 Man nani, yang bîli ba wals, man nani sut Jerusalem wina mai saki Babilon ra mai blikri ba.’)

21 “Dawan, karnika sut bri ba, Israel Gâdka ba, Ahab, Colaías luhpia waitna ba, dahra aisisa; Sedequías, Maaseías luhpia waitna ba, dahra aisisa; witin nani bui yang nani ra, Dawan nina ra kunin aisi mai wisa: ‘Yang daukaisna witin nani ba Nabucodonosor munhtara kauhaia, bara witin baha nani ba ikbia bara man nani kaiki kama.

22 Juda uplika nani Babilon ra brih wan nani ba upla kum ra lahtubaia lukbia ba ra, naku wibia: Dawan bui man wal daukbia Sedequías Ahab ra daukan ba baku, baha nani sika Babilon kingka mita pauta ra angkan.

23 Witin nani ra baku takbia, kan Israel wina tâski daukaia dukia nani daukan bamna: ai uplika maya nani lâka krikan, yang nini bri kunin manis aisin, baku aisaia wiras katna ba. Yang baha kaikisna, yang ra param sa. Yang, Dawan, kasak aisisna.’ ”


Semaías ra bîla blikan ba

24 Dawan Jirimaya ra aisin Semaías, Nehelam tawanka wina waitnika ba ra wiaia:

25 “Dawan, karnika sut bri ba, Israel Gâdka ba, aisisa: ‘Man mita man ninam ra wauhtaya kum ulbi Jerusalem uplika nani sut ra blikram, prîs Sofonías, Maaseías luhpia waitna ra, prîs wala nani ra sin ulbram. Baha ulbanka ra man Sofonías ra wisna:

26 Dawan mita prîs kum kaia mai mangkan sa Joiadá watlika ra, man tempel ra pura kakaira nani ba sut pura kaiki kaia. Bara upla kum tanis taki prapit aisi baku aisi kabia kaka, man mita alki mina ba dus unta klauhbanka ra mangki, silak ni awa daukan ba ni priski swima.

27 ¿Bara dîa muni, Jirimaya, Anatot wina ba man lâ daukras sma ba, witin bui man nani mamwan kat prapit aisi baku aisi ba?

28 Witin wauhtaya ulbi Babilon kat yang nani ai blikan, bara wan maisa pakisa: Upla nani ba piu wihka bâra kabia; bara witin nani mahka utla mâki iwbia, dus mâ nani sin mangkbia mâ nani ba piaia.’ ”

29 Bara prîs Sofonías baha wauhkataya ba aisi kaikan Jirimaya walbia wisi.

30 Bara Dawan prapitka ba aisi, win:

31 “Babilon ra brih wan silak ra uplika nani sut ra bîlam bliki wis yang, Dawan, witin nani ra wisna: Baha Semaías, Nehelam tawanka wina ba man nani ra yang nini bri aisi ba yang bui witin ba blikras, yang sin man nani ra mai wiras kunin ra kasak lukaia,

32 yang Dawan sna ba, wisni Semaías ba klala yabamna, ai kiamka nani ba sin. Witin ai kiamka nani wina upliki tilara âpu kabia, upliki nani ra lilia lâka yabaisna ba tilara sin lilia bribia apia, witin ai bîla nani aisi kan ba mita upliki nani ba yang maipara buan bamna. Yang, Dawan, kasak aisisna.”

© 2010 Bible Society in Nicaragua

Bible Society in Nicaragua
Lean sinn:



Sanasan