Jirimaya 28 - DAWAN BÎLA AISKA

Prapit Jirimaya bara Hananías wal

¹ Sedequías Juda ra pat mani walhwal king aimaki kan bara baha manka kat matsip, prapit Hananías, Azur luhpia waitna ba, Gabaón tawanka wina, tempel ra wan Jirimaya wal aisaia, prîs nani upla wala nani sut sin bâra wali kan, bara witin Jirimaya ra win:

² —Dawan, karnika sut bri ba, Israel Gâdka ba, aisisa: ‘Babilon kingka karnika ba krikaisna,

³ bara mani wâl bilka ra yang daukrika tempel dukia nani ba sut Nabucodonosor mita Babilon ra brih wan ba kli naha pliska ra bri balbia.

⁴ Yang sin daukamna Jeconías, Joaquim luhpia waitna ba sin naha pliska ra kli balbia, Juda kingka ba, Juda wina upla wala nani Babilon ra brih wan nani ba sin. Âu, yang Babilon kingka karnika ba krikamna. Yang, Dawan, kasak aisisna.’

⁵ Bara prapit Jirimaya bara Hananías ra tempel ra prîs upla nani sin wali kan win:

⁶ —¡Âu, ban kra Dawan baha daukbia kra si! ¡Man aisaram bîla nani ba Dawan ban kra baku daukbia kaka pain pali, tempel dukia nani ba kli bri balbia upla nani Babilon ra brih wan ba sin kli balbia!

⁷ Sakuna naha mai wisna na wals, man ra mai wisna bara upla sut ra sin wisna:

⁸ Piua luan ra dahra aisi kan uplika nani ba, yang kau aisubras man sin kau aisubras kapram, witin nani aisi kan war aiklabia pât tara aula, siknis nani sin naha nisanka nani mapara, king tasbaya karna nani mapara sin.

⁹ Sakuna prapit kum diara yamni nani takaia dahra aisisa kaka, witin aisin ba bîla kat takbia kaka baku sip sa tânka marikaia baha ba kasak pali Dawan mita blikan.

¹⁰ Baku aisin bara Hananías mita Jirimaya nana wina bîp lal ra wilkaika dusa bri kata ba dakban bara kriki yuya sirpi daukan,

¹¹ bara upla sut wali kan ba ra aisin: —Dawan naku aisisa: ‘Yang daukri ba baku natka ra, kau mani wâl bilka ra nisan nani sut nana wina Nabucodonosor Babilon kingka mita ai karnika ni paman ba sut sakamna, bara krikamna.’ Bara Jirimaya mahka wan.

¹² Hananías mita Jirimaya nana wina bîp lal ra wilkaika dusa ba dakbi sakan ba wina piua wiria luan ba ningkara, Dawan kli Jirimaya ra aisin, bara win:

¹³ “Hananías ra was, bara wis, yang Dawan sna ba, naku wisni: Bîp lal ra wilkaika dusa kum dus ni paskan kan ba man kriki yuya sirpi daukram. Sakuna nanara yang wala kum maikaia ayan ni paski ridi mai daukri sa.

¹⁴ Kan yang, Dawan, karnika sut brisna ba, Israel Gâdka, mai wisna: Nisan nani sut nana ra baha lal ra mangkaika dusa ba ayan ni paski mangkri, witin nani Nabucodonosor Babilon kingka warkka daukaia. Daiwan wail nani sin witin ai karnika bri ba lâka munhtara swiri sa.”

¹⁵ Bara Jirimaya bui Hananías ra win: —¡Hananías, wals! Dawan bui man ra mai blikras kan, man bui naha uplika nani ra kunin ra kasak lukaia baman smalkisma.

¹⁶ Baha mita Dawan aisisa: ‘Man mai blikisna, âu sakuna tasba wina mai tikaia. Naha mani pruma, kan man aisaram bîla nani ba ni upla nani ba yang maipara buaia daukram.’

¹⁷ Bara prapit Hananías ba baha mani bilara kati 7 alkan bara pruan.