Jirimaya 27 - DAWAN BÎLA AISKA

Wark bîpka lal ra dus mangki ba wina smalkanka

¹ Sedequías, Josías luhpia waitna Juda kingka ba mani walhwal king aimaki kan ba piua ra, Dawan Jirimaya ra aisin,

² bara witin ra win: “Bîp lal ra mangki dusa ba kum paski awa wilki bara namna ra pams.

³ Baha ningkara naha kingka nani ra bîlam blîks balaia: Edom, Moab, Amón, Tiro, Sidón kingka nani ba, witin nani ai uplika nani blikan king Sedequías wal aisaia, baha nani nâra sa Jerusalem ra, bîla ba witin nani wis wih wibia.

⁴ Witin nani ra wis kumi bani ai kingka ra wibia yang, Dawan karnika sut brisna, Israel Gâdka, mai wisna:

⁵ Yang karniki tara ba param mariki tasba na paskri, upla nani, daiwan nani diara sut bilara ba sin, bara yaura baha yabaia lukisna ba ra yabisna.

⁶ Baha ba aitani, yang mita naha tasbaya nani sut na warkki dadaukra Nabucodonosor, Babilon kingka karnika bri ba mihta ra yabri sa, daiwan wail nani ba sin witin lâ dauki ba munhtara kabia.

⁷ Nisan nani sut ba witin ra bawi kabia, luhpia nani ra bara mulika nani ra sin bawbia, bara piua ba balbia bara nisan tara nani ba king karnika tara bri nani ba sin witin ra bawbia.

⁸ Sakuna tila nisan nani king Nabucodonosor bîp lal ra mangkaika dusa bri ba ra bawras sa kaka, baha nani yang klala yabamna, war blikamna, sanglang iwbia, siknis yarka baha nani sut ra alkbia, witin ai lâka ra bawbia ba kat. Yang, Dawan, kasak aisisna.

⁹ “Bahamna, man nani baha prapitka aisi ba ra walpara, diara kaikisa wi ba bara yapi kaiki aisi ba, sukia nani ra sin walpara naika diara takaisa wisi aisi ba, bara upla nani ra smalki ba Babilon kingka munhtara bawaia apia.

¹⁰ Baha witin nani aisi ba kunin, baha wina diara kumi baman man nani saki brima ba lika, tasbayam wina tasba wala ra mai blîkbia, yang bui man nani mai yakabamna bara prui banhma.

¹¹ Sakuna natka wala ra, Babilon kingka ra bawbia nisanka ba lika, witin nani tasbaya ra yang ban swimna, bahara takaski insla dauki kaia. Yang, Dawan, kasak aisisna.”

¹² Yang, Jirimaya, baha kli kli aisari Sedequías Juda kingka ra, bara baha purkara sin wîri: “Man nani Babilon kingka uplika nani karnika bri ba ra baws, bara man nani raya kama.

¹³ ¿Dîa brinka mita man uplikam nani aikuki war aula ba tâka, sanglang ra bara siknis ra sin pruaia sma? Kan Dawan pat aisin baha nisanka nani sut ra Babilon kingka ra bawras ba baku takbia.

¹⁴ Baha prapitka nani ra walpara Babilon kingka ra bawaia apia mai smalki ba, baha man nani ra mai wi ba kunin.

¹⁵ Dawan kasak aisisa baha nani ba witin mita blikras; Dawan nina ra witin nani kunin aisisa. Bamna witin nani bui man nani ra mai yakabaia dauki ba baku, man nani bara witin nani baha baku mai smalki ba aikuki pruma.”

¹⁶ Yang prîs nani aikuki sin aisari, tawan uplika aikuki sin, bara witin nani ra wîri: “Dawan naku aisisa: ‘Baha prapitka nani naku mai aisi ba bîla walpara, witin nani wisa tempel dukia nani Babilon ra brih wan ba kat pali kli bri balbia. Baha sut aisi ba kunin baman.

¹⁷ ¡Witin nani aisi ba walpara! Man nani Babilon kingka ra baws bara man nani raya kama. ¿Dîa brinkam bâra sa ki naha tawanka na slingwi aipaswan baman takbia ba?

¹⁸ Witin nani ba rait yang mita aisari dahra aisisa kaka, Dawan, yang karnika sut brisna ba, witin nani ba yang ra makabaia kan, yang adar yabaia apia tempel dukia nani Juda kingka watla ra bara Jerusalem ra sin bâra ba Babilon ra brih waia apia kan.’

^19-21 “King Nabucodonosor, Juda kingka Jeconías, Joaquim luhpia waitna ba, Jerusalem wina Babilon ra brih wan, tara kulkan uplika nani sin Juda wina bara Jerusalem wina sin sut witin aikuki brih wan, kuna utla playka tara nani ba brih waras, lî watla tarka tara bras ni paskan ba sin apia, wagin nani ba sin, tempel dukia wala nani ba sin brih waras kan. Dawan, karnika sut bri ba, aisisa baha, dukia nani sut brih waras kau swin kan ba, dahra aisisa dukia nani ba tempel ra kan Juda kingka watla ra bara Jerusalem ra sin bâra kan:

²² ‘Witin nani Babilon ra brih wabia sa kaka, bahara kabia ani yua yang want sna ba kat kli naha pliska ra bri balamna. Yang, Dawan, kasak aisisna.’ ”