Jirimaya 26 - DAWAN BÎLA AISKA

Jirimaya ra ikaia win ba

¹ Joaquim, Josías luhpia waitna ba Juda ra king mangkan ba ra, Dawan Jirimaya ra aisin

² bara win: “Tempel ra dimaia durka ba ra wih bus, bara dîa sut man aisaia yang mai wîri ba Juda tawanka nani wina upla nani ai pura sunaia aula nani ba ra wis. Mai wîri ba sut pali aisas.

³ Ban kra witin nani mai walbia bara ai daukanka saura ba swibia, bara yang luki kaikamna diara saura daukan ba mana klala yabaia apia, yang pat luki kaikri ba baku.

⁴ Witin nani ra wis, yang Dawan sna ba, naku wisni: ‘Yang dîa wisna ba witin nani walras kabia, dîa daukaia smalkri ba baku daukras kabia kaka,

⁵ prapit nani witin nani kupia krauki smalki ba, kum blikuna kli wala blikisna ba, baha nani bîla witin nani wali daukras ba,

⁶ bara naha tempelka ra sin Siló ra daukri ba baku daukamna. Naha tawanka na lahtuban ba patrangka kum daukamna nisan nani sut kaikbia tasba aiska ra.’ ”

⁷ Jirimaya tempel durka ra aisin bîla nani ba, prîs nani, prapit nani, upla wala nani sin sut walan.

⁸ Witin aisaia Dawan mita win ba witin sut aisin ba ra, prîs nani, prapit nani, upla wala nani bal Jirimaya ra prak alki bara win: “¡Man lika pruaia!

⁹ ¿Nahki man sibrin âpu aisisma bara Dawan nina ra wisma naha tempelka na Siló baku takbia, naha tawanka na sin slingban kabia, upla sin âpu swin kabia?” Bara upla sut tempel ra aipaswan Jirimaya ra kir kutban.

¹⁰ Juda ra wihta nani ba dîa takan ba witin nani walan, bara king watla wina tempel ra wan kli baha wina Durka Raya ba kat wan, bahara iwan.

¹¹ Bara prîs nani bara prapit nani ba mita wihta nani ra bara upla nani ra sin win: “Naha waitnika na pruaia pâtka ra lakaia sa, kan naha tawanka mapara aisin bamna. Aisin ba man nani kiamam ni walram.”

¹² Baha Jirimaya aisin wihta nani ra bara upla sut ra sin, witin win: “Dawan sika witin ai nina ra yang ai blikan, naha tempelka mapara aisaia, naha tawanka mapara sin aisaia, yang aisari man nani sut walram.

¹³ Man nani daukankam ba yamni dauks, man nani Dawan Gâdkam bîla wali dauks, bara witin ban man nani pât tara mai blîkbia apia, yang aisari baku.

¹⁴ Yang maipara, yang lika man nani mihtam ra sna; man nani daukaia yamni sa lukisma ba dauks.

¹⁵ Sakuna naha lika, kasak pali kaiki bas: man nani ai ikma kaka, man nani bara tawanka uplika nani sut pâtkira kama upla pâtkas kum ikuma bamna; yang kasak aisisna Dawan mita ai blikan naha sturka man nani ra param pali mai wiaia.”

¹⁶ Bara wihta nani ba bara upla wala nani ba sin prîs nani ra bara prapit nani ra sin win: “Dîa tâwan naha waitnika na pruaia pâtka ra lakaia tânka ba âpu sa; witin Dawan, wan Gâdka nina ra yawan ra aisin.”

¹⁷ Tila almuk nani baha aidrubanka ra bâra kan ba mita aisin upla wala nani ra:

¹⁸ “Ezequías, Juda kingka kan ba yua nani ra Miqueas, Moreset wina ba Dawan nina ra aisi Juda uplika nani sut ra win: ‘Dawan, karnika sut bri ba, aisisa: Saion ba insla kum tasba baiki swin ba baku daukan kabia, Jerusalem ba slingwi aipaswanka ra takaskbia, tempel kiuhsika ba sin inma saura baman pâwi kabia.’

¹⁹ “¿Bara king Ezequías ba Juda uplika nani sin Miqueas ba ikata ki? Baku takras bara ikaia watlika ra: king Dawan sibrinka daukan bara witin ra makaban witin nani ai dukiara kupia swapni lâka ba bribia. Bara latwan saura ba Dawan bui witin nani ra blikras takaskan, witin nani ra baku takbia wisata ba. ¿Bara nanara yawan mita kaiki lâ ba sauhkaia wirhika tara ba wan pura sunaia?”

²⁰ Baku sin prapit Urías, Semaías luhpia waitna ba, Quiriat-jearim tawanka wina ba, Dawan nina ra naha tawanka mapara aisin bara kuntrika na mapara sin, Jirimaya aisin ba baku.

²¹ King Joaquim, wihtka tara nani ba bara wihta wala nani ba sin Urías aisin ba walan, bara king lukan witin ba ikaia. Sakuna witin baha sturka ba walan sibrin daukan bamna Idsip ra plapan.

²² King Joaquim adarka Elnatán Acbor luhpia waitna ba, Idsip ra blikan, waitna wala nani sin,

²³ bara witin Idsip tawanka Urías ba alki bri sal king Joaquim ra yan, baha kingka ba sika win Urías ba iki tasba salhki wîna ba biki swibia win.

²⁴ Ahicam, Safán luhpia waitna ba, Jirimaya hilpka ra aisin, baha mita upla nani ba mihta ra mangkras kan, baku ikras kan.