Jirimaya 25 - DAWAN BÎLA AISKA

Yahbra wina waihla aula ba

¹ Mani walhwal Joaquim Josías luhpia waitna ba Juda ra king kan ba piua ra, Dawan ba Jirimaya ra balan bara naha bîla na witin ra win Juda uplika nani dukiara. Baha piua Nabucodonosor lika mani kumi baman Babilon kingka aimaki kan.

² Jirimaya prapit ba bîla dahra ba Juda uplika nani Jerusalem uplika nani sut ra maisa pakan. Jirimaya win:

³ “Josías Amón luhpia waitna ba Juda ra 13 mani king aimaki kan, bara baha piua wina nanara kat, wibia kaka, pat 23 mani Dawan bui yang ra aisin ba, baha yang bui man nani ra kli kli aisari; sakuna man nani lika yang ra walras.

⁴ Baha sut ban sakuna, Dawan ba aima kum kli aima wâl ra sin, ai dukia dadaukra, ai prapitka nani ba man nani ra blikan, man nani bui witin nani ra walras, aisi ba sin walan mai daukras bara bîla wali sin daukras.

⁵ Witin nani bui man nani ra mai win: ‘Wapankam saura nani ba swis bara daukankam saura nani ba sin swis; bara baku Dawan bui man nani ra maikan bara damikam nani ra sin yaban ba tasbaya ra iwi ban kaia.

⁶ Man nani bui gâd wala nani nina blîkpara; baha nani ra puram suni mayunpara. Dawan kupia tuskpara baha gâdka nani man nani paski baha ra mayunisma ba tâka, witin bui man nani ra diara saura kum sin blîkbia apia.’

⁷ Sakuna nanara, Dawan aisisa: ‘Man nani bui yang aisisna ba walras kapram ba mita, kupi tuskram man nani paskram ba gâdka ra mayuni, baha sika man nani mita daukram saurka ba.’

⁸ “Baha mita Dawan karnika sut bri aisisa: ‘Yang bui man nani ra kupiam krauki aisari walan mai kaikras kapram bamna,

⁹ Nabucodonosor yang warkki dadaukra Babilon kingka ba, yahbra tani uplika nani ba sut balaia paiwisna, witin nani bal naha kuntrika ra upla nani sut iwi ba, nisan nani sut lamara ba wal iwi nani ba mapara sin. Witin nani ba sauhki âpu pali aiklabaia daukaisna. Baha nani ba sut sauhki âpu daukaisna. Baku sauhkan ban kaia swiaisna, sirang wan iki bara sibrin wan dingki kaia.

¹⁰ Yang daukamna witin nani ai tilara lilia mita aiwani lilia kaia kli daukan kaia apia, maya baiki lawana sin aiwanaia apia, akbaia walpaya nani binka sin walaia apia, lamp angki ingnika nani ba sin kli kaikaia apia.

¹¹ Naha kuntrika aiska na sauhki tikan slingban bâra kabia. Piua ba 70 mani kabia naha nisanka nani bani ba Babilon kingka munhtara kabia.

¹² Bara 70 mani ba alkbia ningkara, Babilon kingka ra makabamna nisanka ra sin, witin nani saura daukan ba wapnika daukaia, bara Caldea uplika nani kuntrika ba, sauhki tikamna ban kaia ra. Yang, Dawan, kasak aisisna.

¹³ Yang dîa aisari nani ba sut naha kuntrika purara batakamna, naha wauhkataya ra dîa ulban ba sin: Jirimaya sin naha nisanka nani mapara yang nini ra dahra aisin ba sin sut.

¹⁴ Nisan tara nani bara king nani karnika tara bri ba, witin nani sin mina ra kauhbia. Bara baku witin nani dîa daukan ba mana briaia aitani ni mana aibapamna.’ ”

Nisan nani klala brin ba

¹⁵ Dawan, Israel Gâdka ba, yang ra ai win: “Naha kapka na kaiks kupi baiwanka wainka banhki na. Man bris bara nisan nani sut ra yas diaia, witin nani diaia blikisna.

¹⁶ Witin nani dibia bara mahka aikabi kabia bara grisi baku takbia war nani blikuna ba tâka mita.”

¹⁷ Dawan mihta wina kapka ba yang briri, bara baha nisanka ra waia Dawan ai blikan ba baha nani sut ra yabri diaia.

¹⁸ Bara Jerusalem ra yabri din Juda tawanka tara nani ra ba ra, king nani ra, wihta tara nani ra sin yabri diaia witin nani sauhki tikaia, bara baku sauhka ban swiaia, upla nani ra sirang iki sibrin dingki kaia, watawika lâka daukan patrangka naiwa kat baku ban sa.

¹⁹ Baku sin king fero Idsip kingka ra sin yabri din, wihta tara nani pura kakaira nani ra sin, uplika nani sut ra sin yabri din,

²⁰ bara upla wala nani masraka sât sât nani bâra ba nani ra sin; Us tasbaya kingka nani sut ra, filisteo nani tasbaya aiska ra: Ascalón, Gaza, Ecrón, Asdod ra takaski nani ba sin;

²¹ Edom ra, Moab ra bara Amón ra sin;

²² Tiro, Sidón kingka nani sut ra sin; Mediterráneo kabuka tawanka nani kingka ra sin yabri;

²³ Dedán kiamka nani ra, Temá ra, Buz ra, bara upla nani ai tâwa irbi banhwi ba ra sin;

²⁴ Arabia kingka nani sut ra yabri; nisan sât sât iwi kingka nani sut ra upla iwras tasbaya ra iwi nani ra;

²⁵ Zimrí kingka nani ra, Elam bara Media kingka nani ra sin yabri:

²⁶ yahbra tani ra kingka nani ai lamara bara sakbi ra iwi nani ba ra sin dakakri. Wibia kaka, king nani iwi ba tasbaya sut baha dibia. Baha ningkara Babilon kingka sin dibia.

²⁷ Baha ningkara Dawan kli ai win: “Witin nani ra wis yang, Dawan karnika sut brisna, Israel Gâdka ba, adar yabisna dih bla takbia ba kat bâra aikabia bara tasba ra kauhbia bara baha wina kli bubia apia, war man nani ra blikamna ba tâka mita baku takbia.

²⁸ Witin nani man mihta wina kâp ba bri diaia apia wibia kaka, witin nani ra wis: ‘Dawan, karnika sut bri ba, aisisa: Diaia apia wibia sin witin nani diaia sa.

²⁹ Bamna yang mahka klala nani ba blikamna yang ra aikan tawanka ba purara. ¿Bara lukisma man nani lika klala brima apia? Apia, man nani klala briras kama apia, kan upla nani tasba ra iwi ba sut purara war ba yang blikaisna. Yang, Dawan, karnika sut brisna ba, baha kasak aisisna.’

³⁰ “Jirimaya, man bui yang nini ra naha sturka nani na witin nani ra wis: ‘Dawan ba pura wina alwani baku ai bîla baikra ba blikisa, ai iwaika holikira iwi ba wina. Ai sîpka nani ba mapara winisa wain tataibra nani wini ba baku, tasba ra upla nani iwi ba sin mapara.

³¹ Binka tara ba tasba aiska kir ra auya, kan Dawan nisan nani mapara diara daukuya ba kahbi auya pruikira nani ba sut lâ ra paiwaia, watawikira nani pruaia pâtka ra lakaia. Dawan baku kasak aisisa.’ ”

³² Dawan, karnika sut bri ba, aisisa: “Sauhkaia klalka ba nisan kum ra alkbia, kli wala ra alkbia; pâsa saura karna kum tasba kir wina krawbia.”

³³ Dawan mita daukbia baha yua ra upla nani prubia ba, tasba tâ kum wina tâ wala kat pruan nani ba prawi kabia. Upla kumi sin baha nani pura mata inbia apia, upla kumi sin baha nani bikaia alki bukbia apia; daiwan kânka nani baku tasba ra pruan kabia.

³⁴ ¡Sepad nani, man nani karna wins! ¡Latwan mita inan nani karna wins! ¡Man nani sîp daknika tâ brisma ba, tasba ra aikarwi banhs! Iki tikaia piua ba nanara bal aimakan bara man nani mai ikan kabia sîp wainhka batanira nani baku.

³⁵ Sepad nani ba sip plapbia apia, daknika tâ bri ba sip yukuwbia apia.

³⁶ Sepad nani ba karna winisa, latwan mita karna winisa baha nani sîp daknika tâ bri ba, kan Dawan mita pata nani ba sauhkan bamna.

³⁷ Dawan ai kupia baikan bara twi langnika nani ba sauhkan.

³⁸ Ai watla wina takan layan kum baku, witin nani ai kuntrika sauhki tikan ba kat takaskan, Dawan kupia baiwanka ba buki klauhan bamna, war saura pali kum blikan.