Jirimaya 22 - DAWAN BÎLA AISKA

Juda kingka watla ra wih aisaia bîla blikan ba

¹ Dawan bui ai win: “King watla ra was bara naha maisa pakanka na wis

² Juda kingka mawanra bûi, Debit iwaika ra iwi ba wihta tara nani ba mawanra sin, upla nani tawan ra ba sin wali kaka aisas:

³ ‘Kasak lâka bara wapni lâka ba man nani naha tasbaya ra dauks, man nani tataibra nani ba mihta wina taiban uplika nani ba pri sâks, tringsar nani ba mâyara kulkpara bara sin rausauhkpara, rau nani ba bara piarka mairin nani ba sin. Upla pâtkas nani ba sin ikpara.

⁴ Yang bui man nani ra naha mai wisna na daukma kaka, Debit iwaika ra king nani ban iwi kabia, ai araska nani ra ai waginka nani ra uli naha getka nani ra bal dimi kabia king watla ra wihta tara nani ba aikuki, tawan uplika nani ba sin.

⁵ Sakuna naha maisa pakanka na walras kama kaka, king watla na slingban kabia. Yang, Dawan, kasak aisisna.’ ”

⁶ Kan Dawan Juda kingka watla ba dahra aisisa: “Man ba yang maipara Galaad ilka baku sma, Líbano bahna ba baku, sakuna diara âpu mai daukaisna, upla iwras tasbaya kum mai daukaia.

⁷ Aiklabaia dukia bri uplika nani ba mampara blikaisna, man nani âpu mai dauki si balaia. Yalam dusa playka painkira nani ba klakbia bara pauta ra angkbia.

⁸ “Baha ningkara nisan ailal uplika nani ba naha tawanka bâk bal lubia, bara pana pana ai walka ra makabi walbia: ‘¿Naha tawanka tara na dîa muni Dawan mita naku sauhkan?’

⁹ Bara witin nani pana wibia: ‘Dawan ai Gâdka witin nani wal lâ daukan lâka ba witin nani swin ba mita, bara gâd wala nani ra witin nani mayuni ai pura sunan ba tâwan baku munan.’ ”

Jirimaya Salum (Joacaz) dahra aisin ba

^10-11 Man nani king Josías ra luki inpara, witin pruanka ba pura mata inpara; sakuna kanra yamni kabia man nani ai luhpia waitna Salum mata inaia, witin auya ba wina kli balbia apia; witin bahara aisuban tasbaya ba kli kaikbia apia. Kan Dawan, Salum, Josías luhpia waitna ba dukiara aisisa witin Juda kingka ba, witin ai aisa Debit ningkara iwaika ra iwan ba, naha tasbaya wina taki wan ba: “Kli tawi balbia apia,

¹² sakuna baha tasbaya ra brih wan ba ra prubia, naha tasbaya ra kli bal kaikbia apia.

Joaquim dahra aisin ba

¹³ “¡Saura pali kabia man ra watawi lâka dauki kasakka lâka daukras wamtla mâkisma, utla tara nani mâkisma, upla wala nani yaram wark takisa mana aibapras!

¹⁴ Man aisisma: ‘Yang waitla tara pali aihwa kum mâkaisna, rum bîla tarka tara nani paskamna pura rumka ra.’ Windar nani sin paskisma, tnaya ba yalam tatka sabisma, prâka pauni dingkisma.

¹⁵ ¿Man lukisma yalam tatka kainam kir brih iwisma ba mita king sma? Man aisikam ai raya ba lilia brin, sakuna kasak lâka wapni lâka ra ai warkka dauki kan, baha mita diara sut dauki kan ba yamni man taki kan.

¹⁶ Umpira nani, taiban uplika nani ba raitka tâwan aisi kan, ba mita dauki kan ba yamni man taki kan. Baha tânka sika man ai kakaira takaia sma. Yang, Dawan, kasak aisisna.

¹⁷ “Sakuna man lika yakan briaia trabil taki lukisma saura dauki sakram ba wina, pâtkas nani ba ikaia daukram, uplikam nani ba taibisma bara dukia dakbisma.”

¹⁸ Bamna Dawan Joaquim, Josías luhpia waitna Juda kingka ba dahra aisisa: “Witin prubia ba sarka inaia upla âpu kabia. Upla kumi sin âpu kabia pura mata ini aisaia: ‘¡Alai, muihki! ¡Alai, laikra! ¡Alai, Dawan! ¡Alai, king tara!’

¹⁹ Biriku biki baku: witin nani bal Jerusalem wina raski saki bri si lulki swibia.”

Jerusalem uplika nani ra smalkan ba

²⁰ “¡Juda, Líbano ilka purara uli wins! ¡Bîlam baikra karna wins Basán ilka nani ra! ¡Abarim kiuhsika nani ba wina wins lamtwankira nani ra pat pura luan bamna!

²¹ Yang bui man ra aisari, man piua yamni bri kapram ba ra, sakuna man walaia apia wiram. Man wahma kapram ba yua wina baku daukisma: ¡yang bîli baikra ba lan mai daukras sa!

²² Pâsa mita wihta tara nani ba sut bri balbia, lamtwankira nani ba tasba wala ra brih wabia. Swiram mai daukan laya ra mai kulkan kabia watawika lâka nani daukram ba tâka mita.

²³ Man nanara man wamtla ra âmyapah sma, yalam nani Líbano wina bri balan ba tilara, ¡sakuna pat pali pât wauhma latwan ba bal mai alkbia ba ra, luhpa baikanka latwanka ba!”

Gâd bui Jeconías ra aisin ba

²⁴ Dawan ba, Jeconías,, Joaquim Juda kingka ba ra pat win kan: “Yang rayaki ni swer takisna man ra: Man ba mihti aihkika ra sîl mihtadingka baku bâra kama kaka sin, sakuna baha wina mai daikaisna

²⁵ waihlam upla âikra nani ba mihta ra mai mangkaia, man baha nani sîa pali mai dauki ba, Nabucodonosor Babilon kingka, Caldea uplika nani ba mihta ra aimakma.

²⁶ Man yaptikam wal tasba wala ra mai blikamna man bahara aisubi takras tasbaya ra, man lika witin wal bâra pruma.”

²⁷ Baku bamna witin nani kli tawi balan dauki pali kabia, sakuna balbia apia.

Dawan prapitka ba wih inan ba

²⁸ ¿Jeconías ba sumi kriwan baku yus âpu takan sa, upla kum sin want apia watlika kum takan sa ki? ¿Dîa muni witin ai luhpia nani aikuki saki lulkan ba, tasba kum witin kakaira apia ba ra?

²⁹ ¡Tasba, tasba, tasba; Dawan aisi bîla ba wals!

³⁰ Dawan aisisa: “Man nani naha waitnika na ulbi swis waitna kum luhpias kan baku, upla kum ai rayaka ra diara daukras kan baku. Kan ai kiamka nani kumi sin Debit kiamka iwaika ra iwbia apia Juda ra kli king aimaki kaia.”