Jirimaya 20 - DAWAN BÎLA AISKA

Pashur bui Jirimaya ra saura luki kan ba dahra aisisa

¹ Pashur, Imer luhpia waitna, witin ba prîs kan bara witin tempel main kaiki nani ba wihtka kan, bara witin walan Jirimaya baha bîla dahra nani aisi ba,

² bara upla blikan wan Jirimaya ra wipaia bara dus unta klauhbanka ra mangki priskaia, Benjamín Getka ba lamara, baha ba tempel wal baila sa.

³ Yu kum luan ningkara upla blikan wan Jirimaya ba dus unta klauhbanka ba wina sakan, bara Jirimaya witin ra win: “Ninam ba Dawan mita wala mâkisa Magor-misabib.

⁴ Kan Dawan aisisa: ‘Man silp sirang iwi kaia mai daukaisna, uplikam nani ra sin sirang iki kaia; man namkra ni kaiki kama man uplikam nani ba waihlam nani sordka ra kauhi kabia. Juda uplika nani ba sut Babilon kingka mihta ra mangkamna, upla tila witin Babilon ra brih wabia, wala nani skiru ni ikbia.

⁵ Naha tawanka ba sin waihla nani mihta ra swimna diara nani bri ba sut, diara mana tara nani dukia bâra ba, Juda kingka kukanka nani ba sin, baha sut Babilon ra brih waia.

⁶ Bara, Pashur, man Babilon ra mai brih wabia tamya nani sut aikuki. Man bahara pruma, bahara sin mai bikbia man uplikam nani ba sut aikuki; man bui witin nani diara dahra ba aisi katma ba.’ ”

Jirimaya brukwi ai pura sunisa

⁷ Dawan, man kunin ai munram, bara yang sin kunin ai munan takri; man kau karna sma, bara puri luram. Piu sut upla ai kaiki kikaia dukia kum takri; upla sut yang laiwaska kikisa.

⁸ Aisisma ba sika piua bani aisisna bara lâ krikanka nani bara sauhkaia sturka baman sa; piu sut maipara saura aisisa bara laiwaska sin kikisa man aisisma bîla ba yang aisisna ba mita.

⁹ Yang naku wimna: “Yang Dawan ra kau luki kamna apia, witin ai nina bri yang kli aisamna apia”, bara man aisinkam nani ba biaira bilara ai angkisa pauta klauhan baku, ai sauhkisa dusi nani kat. Bapi buaia trai munisna, sakuna sip apia.

¹⁰ Upla nani pusbi aisi ba walaia sip sna: ‘‘¡Sibrin tara ba tnaya bani ra bâra sa!” Witin nani wisa: “¡Man nani bal, kaisa yawan bui witin dahra kwahkaia!” Yang upliki aihwa nani ba sin bîla kaikisa kunin lâka ra mini tâi baikan kum lulkamna. Witin nani aisisa: “Ban kra swirka kunin munbiara; bara yawan mita pura lui bara yawan pana witin ra munbia.”

¹¹ Sakuna Dawan, man lika yang laimara sma aiklaklabra kum baku, man puram luaia âpu sa; nini bliki nani ba kauhbia, puri luaia sip apia kabia; sip apia takbia, witin nani swira takan kabia, bahki kulkan ni pura prakan ba âuya tiwbia apia ban kaia ra.

¹² Dawan karnika sut brisma, wapni lâka ba ni laki kaikisna, upla lukanka tihuka ba kat kaikisma, mairiks baha uplika nani ba nahki klala yabaisma ba, dîa yang ra taki ba man mihtam ra swisna bamna.

¹³ ¡Man nani bui Dawan ra aiwans, man nani bui Dawan ra mayuns!, kan witin swaki sakisa sari bri nani ra watawikira nani mihta wina.

¹⁴ ¡Saura pali kabia yang aisubi takri yua ba! ¡Yaptiki yang ai baikan yua ba lilia âpu kabia!

¹⁵ ¡Saura pali kabia papiki ra lilia daukan ba baha sturka ba luhpa waitna kum aisubi takan win ba!

¹⁶ ¡Baha waitnika ba Dawan mita sauhkan tawanka nani ba baku sauhkan ba ban kabia! ¡Titan ra wali kabia latwan pali bri inanka nani ba, bara wan lal kat war winanka ba,

¹⁷ kan Dawan mita yaptiki biara ra pruaia ai swiras kan bamna! Baha lika yaptiki plauya ba raitiki kaia kan, bara yang aisubi takaia apia katna.

¹⁸ ¿Dîa muni plauya ba wina bal takri latwan swira lâka briaia baman, bara baku rayaki ba swira lâka ni pura bikan ba baku bâra ban pruaia?