Jirimaya 2 - DAWAN BÎLA AISKA

Israel ba Dawan ra kulkras takan

¹ Dawan bui yang ra aisi, bara ai win:

² “Jerusalem tawanka tara ra was bara aisas; wini karna aisas witin nani pain walbia: ‘¡Dawan naku aisisa! Kupi krawisa man tiara katma piua ba, mayi mai briri bara man wapni kapram, latwan ai kaiki katma bara upla iwras tasbaya bâk nini blikram, baha tasbaya ra diara pâwaia mangkras kan ba.’

³ Israel ba yang baman mayi kan, mâ kau pain nani ba witin wina dâki kapri. Upla kum witin ra saura munuya ba ra, uplika ba klala yabi kapri pât saura nani baha uplika ra bliki. Yang, Dawan, kasak aisisna.”

⁴ Jekob kiamka nani, Israel masraka sut, Dawan aisin bîla man nani wals.

⁵ Dawan aisisa: “¿Almukkam nani ba dîa saura daukri ai kaikan, baha tâwan yang wina laihura taki wan ba? Gâd apia diara bahki nani ba ninara witin nani wan, bara witin nani sin baku diara bahki takan.

⁶ Witin nani lika yang ai plikaia trabil taki lukras kan, Idsip wina yang bui witin nani sakri ba, upla iwras tasbaya bâk tapahki ba, tasba lâwan albangka nani bâk luan ba, lî âpu tasbaya bâk, pât nani pali man taukan ba, upla sin bahara iwras, bahara sin impakras yabalka ra taukan ba sut.

⁷ Tasba disang ra man nani ba mai bri balri, baha mâ nani ba wina man nani pima wisi mâ kau pain ba man nani piaia. Sakuna man nani balram bara tasbaya ba watawi daukram, kuntrika ba kaikisna bara âiya warbisa, yang prapatiki ba.

⁸ Prîs nani ba sin ai plikras kan, upliki nani ra smalki nani ba sin yang lâika ba smalkras tâ bri nani ba maipara buan, prapit nani ba Baal dahra aisin bara aidul nani diara bahki ba ninara wan.

Israel mapara blahwanka

⁹ “Baha mita, yang Dawan ba, kasak aisisni: Daukaia piua kum kau mangkaisna man nani mampara bara mulam nani mapara sin.

¹⁰ Man nani muna tani kî dakura ra was bara bahara kaiks; man nani upla kum Quedar ra blîks witin pain pali laki kaikbia diara ba takan sapa,

¹¹ idan nisanka kum ai gâdka swi si gâd wala brisa kaka. ¡Baha nani ban gâd bahki nani sa! Sakuna yang upliki nani ai swin, yang lika witin prana ban sna, sakuna aidul nani diara bahki ba briaia tâwan.

¹² ¡Kasbrika pura, sirang tara iws naha diara nani taki na sringka! ¡Sibrin tara pali mita tatatwi bas! Yang, Dawan, kasak aisisna.

¹³ “Yang upliki nani aima wâl saura daukan: ai lulki ai swin, yang rayaka laya kârma ra ai briras, witin nani lî watla paskan, laya watla nani ba iswisa sip lî alki takaskras ba.

Israel lukras lâka daukan wina dîa takan ba

¹⁴ “Israel ba alba kum apia sa; witin alba lâka ra aisubi takras. ¿Bamna dîa muni dukia nani ba mihta dakbisa?

¹⁵ ¿Dîa muni witin nani layan ihbi baku, karna ihbi bal alki ba? Kuntrika ba witin nani bal sauhki swin ba; tawanka nani sut angkan, uplika nani sin âpu daukan.

¹⁶ Menfis uplika nani Tafnes uplika nani bal lamla baikan.

¹⁷ Naha diara nani man nani puramra balan man nani ai lulki ai swiram ba tâka, yang sika Dawan, man nani Gâdkam yabal ra tampahki katna ba.

¹⁸ Bamna nanara, ¿dîa brinka brisma Idsip ra waia Nilo awala wina lî diaia? ¿Dîa brinka brisma Asiria ra waia Éufrates awala wina lî diaia?

¹⁹ Watawikam daukram ba mita klala maikbia, kasak lukras sma lâka ba mita pât ra mai lakan kabia. Luki kaiks diara saura tahpla daukram ba ai lulki ai swiram ba tâka kaikma. Bara man bui yang ra yamni ai kulkras sma ba, yang sika dawan Gâdkam. Yang, Dawan, karnika sut brisna, kasak aisisna.

Israel ba Gâd mapara babura takan

²⁰ “Man bui yang maipara buram ba wina pat piu wihka auya, bîli wali daukaia apia wiram. Man aisaram: ‘Warkkam takan ai daukras.’ Bara wala nani warkka daukram il purara nani bani ra dus distika painkira bani ra man ur taki kapram.

²¹ Wain kiwka kau pain ba baku naisla ra mai mangkri, wain kiwka saumuk kau pain saki ba baku. ¡Sakuna man tânkam ba saurkam pali takram bamna, mai kakaira apia lap mai tikri!

²² Tâski pali sikbaika ba ni tamya ba sikma sin, sup nani sut brih aihtama sin, saura daukram tâskika ba kaiki ban kamna. Yang, Dawan, kasak aisisna.

²³ ¿Man nahki ai wima: ‘Yang tâski takras gâd bahki nani ra sin mayunras’? Il bîla ba ra kaiks man tânkam daukram ba, man dîa sut daukram ba bâra sa kiamil mairin wainhka pliki plapi taukan baku taukram ba, tnaya bani ra;

²⁴ biriku wail il tasbaya ra plapi tauki pâsa kwal ra ai kakma uhki wainhka pliki tauki baku. Witin ai brinka lapta taki ba ra, wainhka kum mita plikisa kaka, pliki swapaia apia sa: mairka ba lapta taki taim, piu bani pat bâra sa.

²⁵ “¡Israel, sûs dingkras plapi minam insauhkpara, yabrika lî diras kârmam lâwbiara! Sakuna man wiram: ‘Apia, sip apia baku daukaia; tringsar nani ba latwan sna bara yang lika witin nani wal wamna.’

Israel klala briaia aitani sa

²⁶ “Âimplikra pura baikan piua ra ai swira bri ba baku, Israel ba baku swira takan kabia, upla nani ba, king nani ba, wihta nani ba, prîs nani ba, prapit nani ba sut;

²⁷ man nani dus kum pâwi ba ra wisma: ‘Man ba yang aisiki’, walpa kum ra sin baku wisma: ‘Man ba yang yaptiki’. Bara yang tani ra lika, ninam lakram, mamwan lika apia. Ban sakuna, pât kum aula ba ra lika man nani ai wisma: ‘¡Bal ai swaki ai sâks!’

²⁸ Juda, ¿gâdkam nani paskram kata ba anira sa? ¡Gâd nani ailal brisma tawan nani ailal ba baku! ¡Nanara witin nani bal kaikbia, swaki mai sakaia sip sa sapa pât saura nani ba bal mai alkbia ba ra!

²⁹ ¿Man nani dîa maipara aisi blahwisma, man nani sut maipara babura man takram ba? Yang, Dawan, kasak aisisna.

³⁰ Bahki baman luhpiam nani ra klala yabri, smalkanka ba witin nani lan takaia brin daukras. Man nani klauna layan kras baku, prapitkam nani ba ikram.

³¹ (Man nani sin, naiwa uplika nani, Dawan aisin bîla na wals.) Israel, ¿yang na man nani ra upla iwras tasbaya kum takri sa ki?, ¿tasba kum ingni âpu? Upliki nani, ¿dîa muni naku aisisma: ‘Yang nani pri sna; yang nani sip kli man ra tawi wamna apia’?

³² ¿Mairin kum ba ai prana dauki aiskahki dukia nani ba, marit takan prâka skahkan ba âuya tiwbia ki? Ban sakuna, yang upliki nani lika piua wihka pat ai âuya ai tikan sa.

³³ “¡Latwan mai kakaira nani ba nahki pliki sakaia yabalka ba kakaira pali sa! ¡Man ba skul smasmalkra sma saura daukaia mapa ra!

³⁴ Upla umpira pâtkas nani tâlia prâmka ra alkan sa, baha uplika nani ba diara saura dauki kan man tayahkras kapram.

³⁵ Sakuna man baha sut dauki si bara aisisma: ‘Yang lika pâtkas. Gâd kupia baiwanka maipara âpu sa.’ Bamna aitani, man pat aisisma man saura daukras, sakuna lâ daukaia piua kum mangkaisna.

³⁶ ¿Dîa muni sringkam sma man wal kupia kumi takan nani ba swi si wala plikisma? Idsip sin mai swibia, Asiria pat mai swin ba baku.

³⁷ Idsip wina swiram tara daukka tawi balma, baha nani man ra pain mai kulki ba yang mita lulki swiri, witin nani wal pain sma ba wina diara brima apia.”