Jirimaya 19 - DAWAN BÎLA AISKA

Sumi yuya sirpi ra kriwan ba smalkanka

¹ Dawan bui ai win: “Was bara lî watla kum slaubla ni paskan ba atks, bara tila tawan uplika almuk nani ba, prîs almuk nani ba sin paiws.

² Baha ningkara Ben-hinom ilka langnika ra was Dipasta Yakabaika ra, getka ba mawanra bahara naha smalkanka mai wisna na upla nani ra smalks.

³ Wis: ‘Juda kingka nani Jerusalem ra iwi uplika nani, Dawan karnika sut bri ba, Israel Gâdka, smalkanka na man nani wals: Pât tara kum naha tasbaya ra blikaisna, baha sturka walbia uplika nani sut ba sinska lap tiwbia.

⁴ Kan Israel luhpia nani ai lulki ai swin bara tasbaya na upla tringsar tasbaya daukan; nahara gâd wala nani ra diara kîa pain nani angki yabi kan, baha gâdka nani ba witin nani sin apia ai damika nani Juda kingka nani sin kakaira apia ba, upla pâtkas nani sin nâra iki tâlia laikan.

⁵ Baha purkara Baal altarka nani sin paskan, baha purara ai luhpia nani ba angki yabaia, baha daukaia yang aisaras, adar sin yabras katna ba, yang lukanki ra sin baku daukaia tânka sin lukras katna ba.

⁶ Baha mita yua nani balbia naha nina Tófet, Ben-hinom ilka bîla mâki ba, ban baku mâki kabia apia, sakuna wibia Upla Iki Tikan ilka bîla. Yang, Dawan, kasak aisisna.

⁷ Juda Jerusalem wal diara nani daukaia luki kaikan ba, yang naha tasbaya ra baha yuya sirpi daukamna. Yang daukamna ai waihla nani upla âikra nani ba mita bal iki pura luaia, bara wîna nani ba tnawira wîna papira nani ba daiwan wail nani pata takbia.

⁸ Naha tawanka tara na upla iwras tasbaya daukamna, sirang wan iki kaia bahmuna tânka baman bâra kabia. Ya sut bahak bal lui kabia ba sirang iwi tâ iwan ra baha sut sauhkan ba kaiki kabia.

⁹ Witin nani ai luhpia waitna bara ai luhpia mairin nani ba piaia daukamna, witin nani ai walka nani sin piaia, baha waihla nani upla âikra nani ba bal tawanka ba kutbi bri kabia ba tâka.’

¹⁰ “Baha sut wina ningkara, upla nani man wal bâra mai kaiki kabia ba mawanra, sumikam ba brih ki yuya sirpi dauks,

¹¹ bara witin nani ra wis: ‘Karnika sut bri Dawan ba, aisisa: Uplika nani na kriki yuya baman daukamna naha tawanka ra, upla kum sumi kriki yuya man dauki sip kli paskras ba baku. Plis wala âpu kabia, upla pruan nani sut ba Tófet ra baman bikbia.

¹² Yang daukamna naha tawanka ra iwi uplika nani ra takaia Tófet ra takan ba baku. Yang, Dawan, kasak aisisna.

¹³ Jerusalem watla nani ba, king watla nani ba Juda ra, utla purara iwaia pliska nani ba, baha watla nani sut ra witin nani kîa pain nani angki kan slilma nani ra, ai gâdka nani ra yaia wain laiki kan, witin nani tânka ba luki kaikbia ba ra, Tófet wal baku tâski takan sa.’ ”

¹⁴ Baha ningkara Jirimaya Tófet wina kli Jerusalem ra wan, Jerusalem ra sika witin ba blikan kan bahara Dawan nina ra dahra aisaia, bara witin tempel barandika ra buan, upla nani ra aisin:

¹⁵ “Karnika sut bri Dawanka, Israel Gâdka ba, aisisa: ‘Naha tawanka tara ra yang klala yabia aisari ba daukaia, tawan nani witin ai lamara nani ba sut blikaisna klala yabia, kan witin nani lal karna takan yang aisari ba wali daukras kan bamna.’ ”