Jirimaya 18 - DAWAN BÎLA AISKA

Slaubla ni diara papaskra daukanka wina smalkanka ba

¹ Dawan bal yang ra ai win:

² “Slaubla ni diara papaskra ba watla ra was, bara bahara yang mai aisamna.”

³ Bara yang, Jirimaya, waitnika watla ra wari, witin slaubla ni diara paskaika ba wilbi laki kan.

⁴ Witin paski kan dukia ba pain takras kan ba ra, slaublika ba kli bri kli paski kan witin want ba baku takan ba kat.

⁵ Bamna Dawan bui ai win:

⁶ “¿Yang sin sip apia sna ki man nani Israel wal slaubla nani diara papaskra dauki ba baku daukaia? Man nani ba yang mihti ra sma, diara papaskra slaubla ai mihta ra bri ba baku. Yang, Dawan, kasak aisisna.

⁷ Minit kum ra yang diara sut luki kaikisna nisan kum ba, apia kaka king tasbaya kum ba wakia wal daikaia, dringbaia, sauhkaia.

⁸ Sakuna baha nisanka ba saura dauki ba mahka swibia kaka, klala yabaia ridi daukri ba blikamna apia.

⁹ Piua wala ra yang luki kaikisna nisan kum king tasbaya kum ba kau paski pakaia.

¹⁰ Sakuna baha nisanka saura daukbia kaka, yang smalkanki nani ba briras daukras sa kaka, baha diara yamni nani yang blikaia ridi daukri ba blikras takaskisni.

¹¹ “Bamna wis, Juda uplika nani ra, Jerusalem ra iwi uplika nani ra sin, yang Dawan, witin nani ra wisna: ‘Yang luki kaikisna witin nani mapara diara daukaia; witin nani ba klala yabaia lukisna. Yabal saura ba witin nani mahka swibia; ai daukanka nani bara ai warkka saura nani ba yamni daukbia.’

¹² Bara witin nani man ra mai wibia: ‘¡Man taimkam bahki tikpara! Yang nani nahki iwaia brin ai dauki ba baku iwaia brin ai daukisa, laila karna kupi lukanka saura ra luki tniwi kaia.’ ”

¹³ Baha mita Dawan naku aisisa: “Nisan nani tilara man nani makabi wals, baha sut sturka talia upla kum kum walan sapa. ¡Israel luhpia nani diara saura pali daukan ba!

¹⁴ ¿Líbano ra walpa nani purara sno bâra ba âpu takisa ki? ¿Il nani wina lî kauhla iswi ba lâwbia ki?

¹⁵ Sakuna upliki nani ai âuya ai tikan, kunin gâdka nani ra diara kîa pain angki yabisa. Patitara yabalka almuk ra, aimawahkan, witin kakaira apia ba yabalka nani ra ban auya.

¹⁶ Baku witin nani ai kuntrika ba upla iwras tasbaya daukan, piu sut sirang wan iki pliska takan. Upla bahak lui auya ba sut sirang iwi ai lal wauhisa.

¹⁷ Yang, lalma payaska kum baku taki, Israel ba yakabamna; ai waihla nani wina plapaia daukamna. Yang nini lakamna, witin nani ra kaikamna apia, witin nani klala aiklabaia yua ba balbia ba ra.”

Prapit mapara daukaia lukanka brin ba

¹⁸ Upla nani ba aisin: “Kaisa yawan wark kum daukaia, Jirimaya ba âpu daukaia yawan pri takaia. Prîs nani ba âpu takras ban kabia witin nani wan smalki kaia, sinskira nani lâ wan smalki ba ban kabia, prapit nani Gâd dahra wan aisi ba aisi ban kabia. Kaisa yawan bui witin ba dahra kwahkaia, bara witin ba ikbia. Upla nani aisi ba kumi ra sin yawan walbiara.”

Jirimaya ai pura sunan ba

¹⁹ ¡Dawan, aman yang ra ai wals! ¡Waihli nani aisi ba wals!

²⁰ ¿Dîa saura ba ni yamni mana ba aibapisa baku sa? ¡Witin nani ba yang ai bikaia tasba salhkan! Kupiam krauki bas yang bui man mampara aisi katna ba witin nani dukiara man ra aisari, mamkabi kapri kupiam baiwanka ra witin nani wina baha sâkma.

²¹ ¡Sakuna nanara, dauks ai luhpia nani plun bla, apia kaka sord malka ra prubia; ai maya ba piarka takbia bara sin luhpias kabia! ¡Siknis mita ai waitnika nani ba ikbia bara wahmika nani ba war ra aiklabi prubia!

²² Âimplikra daknika kum witin nani ai dara walras kaka blîks; ¡baha nani wini sirang iki ba walbia! Witin nani tasba salhkan yang bahara ai mangkaia, bara yang yabalki ra mini alkaika nani swin.

²³ Sakuna, Dawan, man bui witin nani dîa dauki ba sut kaikisma, witin nani bui yang ai ikaia daukan. ¡Watawika lâka pâtka ba swih tikpara, saura daukan ba sin âmya tiwbiara! ¡Yas witin nani man mamwanra kauhbia, kupiam baiwan ra lâ ni dauks!