Jirimaya 17 - DAWAN BÎLA AISKA

Juda saura daukan bara klala brin ba

¹ “Juda, man saura daukram ba sisil ni klaki ayan ra ulban sa, daimans kakma ni klaki ulban man kupiam walpaya ra, altarkam nani aringka ra, ayan sisilka kakma daimans bri ba ni klaki ulban sa.

² Luhpiam nani baha altarka nani ba ra ai kupia kraukisa, dus plamaya nani aidulka ra mayuni baku, dus nani wahia tara pâwan ba mununhtara kiuhsi nani purara ba ra sin bukisa,

³ tasba langnika il nani purara. Saura nani daukram ba tâwan yuyakam nani kukan kan nani brisna ba witin nani bal implikaia daukamna, kiuhsi nani ra aidul dukia nani ba bribia tasbaya aiska ra bâra ba sut.

⁴ Man prapatikam baku tasba maikri ba tasbaya ba man lulki swiaia sma, waihlam nani ba albika takaia mai daukamna man kakaira apia sma ba tasbaya ra, kan yang kupi baiwanka buki klauhan pauta klauhi ba baku, mai angki âpu mai daukbia.”

Smalkanka sât sât

⁵ Dawan naku aisisa: “Saura pali kabia baha uplika ra ai kupia wina tnaya ai laki ba, ai lukanka ba upla nani ra kasak luki ba, witin nani wina hilp briaia pliki ba.

⁶ Upla iwras tasbaya ra kiaya baku kabia, upla mita main kaikras: walpa nani tilara pâwi kabia, sâl tasbaya ra, bahara upla kumi sin iwras ba.

⁷ “Sakuna yamni pali sa baha uplika yang ra kasak luki ba, bîla kaikanka yang ra bri ba.

⁸ Dus kum awala un ra mangkan ba baku kabia, wakia nani ba lî aubi ba ra pâwisa, lapta taki bara witin sibrin daukras, wahia nani ba sisitni sangni sa. Lî auhras ba piua ra sâp sa, piu sut mâ nani ba bâra sa.

⁹ “Upla kupia lukra kuninkira pali warha ba baku kau diara wala âpu sa. ¿Ya sip sa baha tânka ba briaia?

¹⁰ Yang, Dawan, upla kupia tânka pliki kaikisna, bara lukanka nani ba tihuka ra kaikisna; witin nani dîa briaia aitani ba kat kumi bani ra mana yabisna.”

¹¹ Kasak lâka dauki wina apia yuyakira taki uplika ba, daiwan tnawira kum tnawira wala âpan ba purara bawi luhpa baiki ba baku sa. Kau ai karnika aiska ban bri bara ai yuyaka nani ba sut lulki swibia bara tisku upla sinskas kum taki bâra kabia.

¹² Yawan wan tempelka ba lika iwaika pranakira kum sa, blasi pali wina purara bâra swin sa.

¹³ Dawan, man sika Israel bîla kaikanka. Baha nani sut mai briras mai swin ba swira takan kabia. Baha nani sut man wina kitwi laihura taki ba upla nina tasba pukpuka ra ulbi swin tiwi ba baku lap tiwbia, man lî kârma kauhla, mai briras mai swin ba mita.

Jirimaya Dawan ra ai pura sunisa

¹⁴ Dawan, siknis wina ai râks, bara aiska rawi takamna; swaki ai sâks, bara aiska swaki ai sakan takamna, man ra baman yang mamyunisna bamna.

¹⁵ Upla nani ai wisa: “¿Dawan aisinka nani kata ba dîa takan? ¡Diara taki aisin ba nanara mahka takbia!”

¹⁶ Ban sakuna, yang mita taibi mai wiras sna man baha ba mahka dauks, sauhki tikanka witin nani purara blikaia, baku sin yang brinki apia sa man bui witin nani ra sauhki tikaia. Dîa aisari ba man nu sma, kan man lamam kat mai aisari bamna.

¹⁷ Yang ra sirang ai ikaia daukpara, man sika yukuwaiki watla yang pât tara ra sna ba piua ra.

¹⁸ Nini bliki nani ba lawaska kikaia dauks, yang lika apia; witin nani sirang tara iwbia ba ra, yang lika apia. Witin nani purara sari balaia dauks, kriki, kli kriki âpu pali dauks.

Ris yua lâka ba laki kaikanka

¹⁹ Dawan bui ai win: “Was, Upla Dimi ba getka ra bus, Juda kingka nani bahak dimi taki ba, bara baha wina Jerusalem getka wala nani sut ba ra sin wih bus.

²⁰ Bara upla nani ra wis: ‘King nani bara Juda uplika nani sut, Jerusalem uplika nani sut naha get nani bâk bal dimisma ba,

²¹ Dawan aisisa: Ris yua ra man nani rayakam ra luki kaiki, man nani diara twilki bal Jerusalem getka nani ra dimpara.

²² Wamtla wina sin ris yua ra diara twilki sâkpara, baha yua ra wark kumi sin daukpara. Baha yua ba yang yui aik, damikam nani ra aisi adar wîri ba baku.

²³ Witin nani lika yang ra walras bîli wali daukras kan, sakuna kau lal karna takan wali lan taki wapni takan daukras.

²⁴ ‘Yang, Dawan ba, kasak aisisni: Man nani bîli wali dauks kasak aisisna, ris yua ra man nani diara kwahki bal tawan ra dimpara; baha yua ba yang yui aik, bara wark wala baha yua ra daukpara.

²⁵ Man nani baku daukma kaka, piu bani king nani bâra kabia Debit iwaika bâra iwi kaia, waginka nani ba araska nani ba prana dauki uli bal tawan getka nani bâk dimi kabia, wihta tara nani ba sin witin nani aikuki, bara Juda uplika Jerusalem uplika nani sin aikuki tauki kabia. Jerusalem ra sin upla ailal bâra ban kabia.

²⁶ Juda tawanka nani Jerusalem kir ra bâra ba wina upla nani balbia, Benjamín tasbaya wina sin, il kuntrika nani Négueb ra bâra ba wina sut. Daiwan nani tempel ra bri balbia aiska angkaia, bara sakripais wala nani daukaia plun nani prisantka sin, bara dus mâka ba ra tingki wiaia prisantka nani sin.

²⁷ Sakuna man nani lika yang lâ aisari ba wali daukras, baku yua ba yang yui aikras, ris yua ra Jerusalem getka ra diara twilki dimaia apia wisna ba sin walras sma kaka, bâra lika yang tawan getka nani ba ra pauta mukamna, pauta klauhan kum king watla Jerusalem ra bara upla kumi sin sip daskbia apia.’ ”