Jirimaya 16 - DAWAN BÎLA AISKA

Jirimaya Dawan wina adar nani brin ba

¹ Dawan ba yang ra aisi, naku ai win:

² “Man naha kuntrika ra mayam bripara, luhpiam nani sin sâkpara.

³ Yang mai wimna, baha tuktika nani naha tasbayi ra aisubi taki nani bara dîa takaia ba baku sin aisika nani ra sin takbia ba.

⁴ Siknis saura witin nani ra alkbia, prui banhbia bara upla kumi sin bal pura mata inbia apia, bikbia sin apia; daiwan kânka nani baku tasba ra prawi kabia. War aiklabi ba mita, sanglang mita sin witin nani ba âpu daukbia; daiwan tnawira nani bal, daiwan wail nani sin bal pruan nani ba pibia.”

⁵ Dawan bui sin naku ai win: “Utla kum ra upla pruan pura mata sari bri kaka bahara dimpara; man inpara bara sarka brisma ba tânka sin marikpara, kan naha uplika nani tila wina sakri kupia kumi lâka ba, laitwanka lâka ba bara umpira kaikaia lâka ba sin. Yang, Dawan, kasak aisisna.

⁶ Naha kuntrika ra almuk nani ba tuktan nani ba prubia, upla kumi bal baha nani bikbia apia, pura mata sin inbia apia, sarka brisa wisi ai taya ra klaki ai tâwa sin irbi banhbia apia.

⁷ Taika nani ba maisa nihkaia wisi upla kumi sin plun piaia bri balbia apia, bikaia yula kahbi sin wabia apia, aisika bara yaptika pruan kabia maisa nihkbia apia.

⁸ “Utla kum ra plun ailal piaki kaka bahara dimpara, witin nani aikuki iwi piaia bara diaia luki

⁹ Yang, Dawan karnika sut brisna, Israel Gâdka, param aisisna: Naha kuntrika ra lilia lawana nani aiwani, lilia dauki ba maya baiki aiwani ba sut takaskaisna. Naha sut man nani yuam ra baku takbia, bara man nani baha kaikma.

¹⁰ “Naha bîla nani na man bui witin nani ra wima ba ra, upla nani ba pana man ra mamkabi walbia: ‘¿Dîa muni Dawan baha saurka tara ba yang nani maipara daukaia baku adar yaban? ¿Dîa saurka yang nani Dawanki Gâdki mapara dauki banhri ki?’

¹¹ Bara man bui witin nani ra wis: ‘Dawan kasak aisisa: Damikam nani ba yang ai swin bara gâd wala nani ninara wan, baha nani ra ai pura suni mayunan, baha mita sika baku taki ba; ai lulkan, witin nani diara daukaia smalkri ba sin daukras.

¹² Bara man nani kau saura daukram damikam nani ba wal, man nani kumi bara lamla karna lukankam ra dîa daukaia brin mai dauki ba bîla wali daukram, sakuna yang bîli lika wali daukras.

¹³ Baha tâwan, naha kuntrika wina man nani mai saki kuntri wala ra mai lulkaisna, man nani damikam nani sin kakaira apia kan ba tasbaya ra, bahara Gâd wala nani warkka dauki kama, yang bui man nani ra kupi swapni brimna apia.’

¹⁴ “Sakuna piua kum balbia —yang, Dawan, kasak aisisna— witin nani kli swer taki aisi kabia apia: ‘Dawan raya, Israel luhpia nani ba Idsip wina saki bri balan’,

¹⁵ sakuna witin nani naku aisabia: ‘Dawan raya bamna, Israel luhpia nani ba yahbra tani kuntrika wina, kuntri wala nani ra yakabi swin ba wina sin saki bri balan.’ Yang daukamna man nani kli tasbayam ra balaia, damikam nani ra yabri ba tasbaya ra.

¹⁶ “Inska âialkra nani ailal balaia daukamna —yang, Dawan, kasak aisisna— Israel luhpia nani ba miski alkaia. Yang sin daukamna antin uplika nani ailal balaia, il nani ra walpa unta nani ra, kiuhsi nani ra sin antin dimi uplika nani ba sakaia.

¹⁷ Daukankam nani sut kaikisna; diara kumi sin yang wini yukuwan ra âpu sa, saura nani daukisma ba yukuwan ra apia sa kaikisna.

¹⁸ Man nani watawi lâka saura nani sin daukram ba mana pas aima wâl aibapaia daukamna, yang tasbayi ba aidulkam misbara kaikisna pruan nani ba ra mayuni tâski daukram, witin nani ai tasbaya prapati baku yabri ba sut ra yang saura kaikisna ba daukan.”

Jirimaya Dawan ra ai pura sunisa

¹⁹ Dawan, yang karniki bara kaini kakahbra, yang yukuwaiki trabil brisna piua ra; nisan nani ba man ra balbia, tasba paskanka takaskan ba wina bal, bara mai wibia: “Kunin gâdka nani, diara bahki, karnika âpu nani ba baman, damiki nani ba ai dukia kukanka baku brin.

²⁰ ¿Upla ba sip sa ki witin mita ai gâdka nani paski briaia? ¡Ban kaka, baha nani ba gâd kasakkira apia sa!”

Dawan pana witin ra aisin ba

²¹ “Baha mita aima kumi ra diara sut, karniki ba witin nani ra marikaia sna; baku witin nani tânka bribia yang nini ba Dawan.