Jirimaya 14 - DAWAN BÎLA AISKA

Piu kum lî auhras kan ba

¹ Lî auhras kaia kan piua ba dukiara, Dawan Jirimaya ra aisi, naku win:

² “Juda sari bri inisa, tawanka tara nani sari ba mita, upla nani ba tasba kat prawisa. Jerusalem sin hilp brin dauki wini inisa.

³ Yuyakira nani albika nani ba lî panhkaia laihura blikisa; lî watla tara nani ra witin nani auya, sakuna lî sakras ai mihta ra, lî watla nani ba bîla man kli tawi aula. Kunin munan swira tara takan, ai lal pura biki tawi aula.

⁴ Insla dadaukra nani ba witin nani ra sin kunin munan ai dara walisa bara ai lal pura bikisa, kan lî auhras ba mita tasba lâwan pali sa.

⁵ Sula nani ba sin twi ra, ai luhpia baikan swap lupia ba lulki swih auya, kan twi âpu ba mita.

⁶ Biriku wail nani ba yul sâtka daiwra nani ba baku diara pâwras kiuhsika nani ra uli ai lal buki pâsa aubisa; nakra pukni takisa, kan ai pata piaia twi âpu ba mita.”

Prapit ba upla nani hilpka ra ai pura sunisa

⁷ ¡Dawan, yang nani saura daukri saurka ba mita daihra sakisa, ninam ba pain kulkaia ba mita baku dauks! Aima ailal yang nani na man mampara yamni apia katni, yang nani lika man mampara saura daukri.

⁸ Israel bîla kaikanka, piua karna nani tilara yang nani swaki ai sasakra, ¿dîa muni man upla tringsar kum wan tasbaya ra tauki ba baku taukisma ba, impapakra kum tihmia kum man takaski mahka auya ba baku?

⁹ ¿Dîa muni sirang ikan uplika kum baku sma ba, aiklaklabra kum ai walka ra hilp munaia sip apia ba baku sma ba? Sakuna, Dawan, man lika yang nani tili kat sma, upla sut tânka brisa yang nani lika man uplikam sna; ¡ban wan luki wan swipara!

¹⁰ Dawan naku aisisa Israel luhpia nani ba dukiara: “Naha uplika nani na iwi kapras ban tauki kaia lihkisa. Baha mita yang bui witin nani ra yamni kaikras sna. Bamna yang nanara witin nani saura dauki ba luki kaikisna, baha mana ba witin nani ra kulkaia.”

¹¹ Dawan bui ai win: “Naha uplika nani ra yamnika yaia wisa yang ra puram sunpara.

¹² Witin nani kaiki plun piras nahki ai pura suni kabia sin, makabanka nani ba yang walamna apia, plun nani prisantka nahki aiki kabia sin, sakuna baha yamni kaikamna apia. War blikaisna witin nani ba sauhki tikaia, bara sanglang, siknis sin.”

¹³ Sakuna pana yang Dawan ra wîri: “Dawan, prapit nani ba aisisa, upla nani ra wisa war âpu, sanglang sin âpu kabia, man mita naha tasbaya na kupia kumi lamni baman kaia daukma.”

¹⁴ Bamna Dawan pana ai win: “Prapit nani ba yang nini bri baku aisisa kaka, kunin aisisa. Yang bui witin nani ba blikras, witin nani ra sin yang aisaras, witin nani aisaia sin yang wiras. Witin nani nahki kunin aisaia tânka ba param kaikan, upla ra kunin munaia tânka ba param brin, ai lukanka kat luki kaikan ba. Baha prapitka nani ba sika naha kunin aisaia dahra ba man nani ra aisisa.

¹⁵ Bamna yang Dawan sna ba, aisisna baha prapitka nani yang mita blikras, witin nani ban nini brih kunin aisi ba, naha kuntrika ra war âpu kabia, sanglang sin apia aisi ba: dahra aisasarika nani ba war ra bara sanglang mita sin prui banhbia.

¹⁶ Witin nani smalkanka wali uplika nani ba sin, war ra bara sanglang ra prui banhbia, mairka nani ba, luhpia waitna nani luhpia bara mairin nani sin. Pruan uplika nani ba Jerusalem yabalka ra lulkan kabia, bara upla âpu kabia bikaia ba. Baku witin nani watawika lâka mana ba aibapaia daukamna.

¹⁷ Bamna man upla nani ra naha bîla na wis: ‘Tihmia ra bara kakna ra naikra laya takaskras ban kauhisa, yang upliki nani pât tara saura ra diman ba luki, saura pali insauhkan ba sarka.

¹⁸ Yabal ra taki auna ba ra, war ra upla pruan ba kaikisna; tawan ra bal dimuna ba ra, upla nani sanglang mita pruan nani ba kaikisna. Prapit nani bara prîs nani ba sin kaikisna witin nani kakaira apia ba kuntrika ra auya.’ ”

Prapit ba Dawan ra aisisa

¹⁹ Dawan, ¿Juda ba man aiska pali lulki swiram sa ki? ¿Saion tawanka ba dukiara man tayat pali takram ki? ¿Dîa kan yang nani sip kli rawaia apia kat ai insauhkram? Yang nani lika yamnikam wankma bîlam kaiki katna, sakuna yang nani maipara diara saura baman takan. Yang nani rawaia aihwaki katna, sakuna sirang tara ai iki ba baman bâra sa.

²⁰ Dawan, yang nani daira wali banhwisna watawi daukri ba dukiara, baku sin yang nani damiki nani pâtkira takan ba sin; man mampara saura dauki banhri.

²¹ ¡Ninam ban yamni kulkan kaia ba tâwan wan lulki wan swipara; naha tawanka tara na ban saura kulkpara bahara man iwaikam pranakira bâra ba! ¡Yang nani wal lâ daukram ba kau luki bas, baha âmya tiwbiara!

²² ¿Idan nani aidulka nani ba tila wina bâra sa ki yaka lî auhaia? ¿Kasbrika yakan ban bâra ba wina bara krawi lî auhaia sip sa ki? ¡Apia, Dawan wan Gâdka! Man mita sika baha nani ba blikisma ba, man sika baha warkka sut daukisma; ¡baha mita yang nani lika man bîlam kaikisna!