Jirimaya 13 - DAWAN BÎLA AISKA

Israel sip kasak lukras ba tânka marikanka

¹ Dawan bui ai win: “Was linin ni maisa wila daukan ba kum atki bris, bara maisam ra wilks, sakuna lî buskpara.”

² Bara Dawan ai win ba baku daukri, maisa wila ba atki briri, bara maisi ra wilkri.

³ Bara Dawan bui yang ra kli aisin, bara ai win:

⁴ “Maisa wila atki wilki brisma ba bris, bara was Éufrates awala un ra walpa untika kum ra yukuki swis.”

⁵ Ningkara Éufrates awala ra wari bara yukukri, Dawan dîa adar aikan ba baku.

⁶ Yu ailal luan ba ningkara, Dawan bui ai win: “Éufrates awalka ra was, maisam wilkaika yukukaia mai wisatna ba saki bri bal.”

⁷ Bara yang Éufrates awala ra kli wari yukukri ba pliska ra pliki tasba wina sakri, sakuna pat sukwan kan bara hilp kum sin âpu sa.

⁸ Bara Dawan kli kau aima kum yang ra aisin,

⁹ bara ai win: “Naha sukwan na baku natka ra Juda Jerusalem wal prautka lâka ba sauhkamna.

¹⁰ Naha uplika watawikira nani na, yang adarki nani daukaia wîri ba bîli wali daukras, bara kiama karna ai kupia lukanka nani ra baman tniwisa. Witin nani gâd wala nani nina ra warkka daukaia mayunaia wan, baha maisa wila ba baku diara hilp âpu ba.

¹¹ Upla ai maisa wila ai maisa ra aubi wilki ba baku, Israel bara Juda upliki nani ba baku laima pali kat bri katna, yang upliki nani kaia, bara witin nani bui upla wala nani ra yang nini ba wiaia, yang ra pain ai kulki praina dauki uplika nani kaia. Sakuna witin nani bîli wali daukras. Yang, Dawan, kasak aisisna.

Kupia baiwanka wala aula

¹² “Naha sin witin nani ra wis: ‘Dawan, Israel Gâdka, aisisa: Ani ani laya watla ba wain laiki banhkaia sip sa.’ Bara Israel luhpia nani ba mamkabi walaisa: ‘¿Dîa yang nani ba tânka brisna lukisma kasak aihwa pali ani laya watla ba wain ni banhkaia ba?’

¹³ Bara man pana witin nani ra wima: ‘Dawan ba aisisa: Naha kuntrika ra iwi uplika nani ba sut yarka bla takbia; king nani Debit iwaika ra iwi ba sut, prîs nani ba, prapit nani bara Jerusalem ra iwi nani ba sin sut.

¹⁴ Bla takbia bara lî watla nani kalki baku kalkamna, pana pana mapara kabia, aisika nani luhpia nani sut baku daukbia. Witin nani ra luki kupi kriwan takbia apia: pâtkas umpira wimna apia; yamni kaikras lâka ra. Yang, Dawan, kasak aisisna.’ ”

Israel ra maisa pakan

¹⁵ ¡Israel luhpia nani, Dawan aisin! Man nani prautkira kapara, aisin ba aman wals.

¹⁶ Man nani bui Dawan Gâdkam ba pain kulki bas, witin bui man nani ra tihmia tara ba kau bri balras bara kiasma ilka nani ra kau minam prukras sma ba ra; baha ingnika bîla kaikisma witin mita kau tihmia tara ba bri balras dista tara ba kau daukras ba ra.

¹⁷ Man nani naha walras kama kaka, yukuwan ra ini kamna praut lâka brisma ba tâwan; naikra nani wina laya ba plapi kabia, kan silak ra bri auya sa Dawan sîpka daknika ba.

Gâd wina king ra ai bîla blikan ba

¹⁸ “King ra, yaptika ra sin wis: ‘Man nani iwaikam ba wina, man nani tasba ra iws, kan man nani lamla wina kraunka pramna kata ba kauhan bamna.’

¹⁹ Négueb tawanka nani ba waihla mita kutban sa; upla kumi sin sip bahak luras sa. Juda uplika nani ba tasba wala ra brih wan, upla sut brih wan.

²⁰ Man nani lamla buki kaiks waihlam yahbra wina nahki aula ba. ¿Yang maikatna daknika ba anira sa, baha daknika ba ra luki mamyuni katma ba?

Israel tasba wala ra brih wabia ba aisin

²¹ “Jerusalem, ¿man dîa wima, man mita smalkram uplika nani ba man nani puram wihta aimakbia kaka? Mairin kum luhpa baikaia latwanka bri ba baku latwan kum mai alkbia.

²² Bara man makabi walma kaka, tânka briaia sma kau diara saura pali daukram ba tâka mita sika; ¡baha mita witin nani susu mai dauki bara saura mai munan!

²³ ¿Upla taya siksa kum sip sa ki mapla wala briaia? ¿Limi bulni kum sip sa ki ai bulnika ba tikaia? Bamna man nani sin sip apia, saura dauki kaia pat lan takram ba wina swiaia, bara yamni daukaia.

²⁴ Baha mita man nani ba ani anira mai yakabamna yahbra payaska mita rais taya bri pâli baku.

²⁵ Israel, baha sika man briaia sma ba yang kli maikaia sna ba man daukram ba. Yang, Dawan, kasak aisisna. Man bui yang ra âmya lap ai tikram bamna, bara lukankam ba aidulkam nani ra kasak lukram.

²⁶ Yang sin sut susu mai daukaisna upla mawanra mai swiaisna swiram takaia.

²⁷ Yang mai kaikri man nahki rug lâka dauki ailihki kapram ba, swiram dauki ur taki saura taukram ba, daukankam saura kaikan ai daukras ba dauki kiuhsi nani ra insla nani ra taukram. ¡Jerusalem, sarkam pali ai daukisa!, ¿ahkia kat man tâski ban kaisma?”