Jirimaya 12 - DAWAN BÎLA AISKA

Prapit ba Gâd ra aisin

¹ Dawan, yang na man wal aisi blahwamna kaka, man piu bani aisisma ba sut ba rait baman sa; ban sakuna, yang diara mamkabi walaia brin ai daukisa diara kum kum ra tânka bâra sa. ¿Dîa muni watawikira nani dauki ba sut yamni man taki ba? ¿Dîa muni upla âiatkra nani ai âuyapah iwi ba?

² Man mita witin nani ba mangkram, bara witin nani pâwi ai wakia alki ai mâ sakisa. Ai un nani ba wina lata tani ra, witin nani ai lamara mai brisa, sakuna ai kupia lukanka ra witin nani man wina laihura sa.

³ Sakuna yang tani, Dawan, man ai kaikisma; man tâinka brisma bara nu sma kupi dahra wal ra man mampara dîa brisna ba. ¡Baha uplika nani ba sîp nani baku daiwan ikaia watla ra brih was; bri si swis ikaia yua piua ba mangki swis!

⁴ ¿Ahkia kat tasba ba lâwan kabia bara twi tasbaya ra twi nani srawi ban kabia? Daiwan tnawira nani ba pruisa baha kuntrika uplika nani watawika dauki ba tâka, lukisa witin nani dîa dauki ba man aihka kaikras sma.

Gâd pana aisin ba

⁵ “Upla nani wapi auya ba mapara plapi baku pali swapram kaka, ¿upla nani aras ra uli auya ba mapara nahki karna ki? Tasba langni ra man âmyapah damra walisma, ¿sakuna Jordan awala un ra sisikra nani ba tilara nahki plapma ki?

⁶ Muihkam nani pali sin, tamya nani pali ba sin, witin nani mai atkan, man ninamra saura aisi wini banhwisa. Man lika witin nani ra kasak lukpara, bîla pain nani witin nani man ra aisabia sin.

Dawan sari brisa ai uplika nani pât ra diman ba dukiara

⁷ “Upliki nani ba yang lulki swiri, yang tasbayi kata ba briras swiri. Witin ai waihla nani mihta ra mangkri yang latwan pali kaikisna nisanka nani ba.

⁸ Naha tasbaya, yang upliki nani kata ba, nanara yang maipara layan kum unta ra bâra ba baku takan; yang maipara uhbisa, baha tâwan misbara kaikisna.

⁹ Yang upliki nani ba tnawira taya painkira kum baku sa, tnawira wala nani ba bal alkaia want sa. ¡Daiwan wail nani, man nani bal; aidrubi bal pata tara daukaia!

¹⁰ Waihla nani ailal wihtka nani ba mita wainki awa nani ba sauhkan, naisla ba ai mina ni uli taiban. Yang want pali kapri tasbaya ba witin nani mita upla iwras tasbaya dauki bîla man swin.

¹¹ Upla iwras tasbaya bîla man dauki swin, bara yang kaikisna ai pura mata inisa. Kuntrika aiska ba upla iwras tasbaya takan sa, sakuna upla kumi sin baha kaiki trabil taki lukras sa.

¹² Upla iwras tasbaya ilka nani bâk sasauhkra uplika nani ba balan, kan yang, Dawan, sord kum brisna kuntrika na tâ kum wina tâ wala kat sauhkbia, plis kum ra sin kupia kumi kabia apia.

¹³ Witin nani plawar mâ mangkan sakuna kiaya dâkan; wark nani daukan ba sut bahki takan. Pata mâ nani ba sut aisawi luan yang lawanki ba tâka mita.”

Israel lamara iwi nani ra waia win ba

¹⁴ Dawan naku aisisa, baha uplika watawikira nani Israel lamara iwi nani ba dukiara, witin mita ai tasbaya ba Israel luhpia nani ra yan ba baha uplika nani mita sauhkan: “Bamna yang bui witin nani ba wakia wal daikamna, witin nani ai tila wina Juda sakamna.

¹⁵ Baha daukamna ningkara kli yang kupi kriwan takbia witin nani ai sarka, bara witin kli ai kuntrika ra ai tasbaya ra balaia daukamna.

¹⁶ Witin nani mita saki yang upliki nani ba Baal ra swer takaia smalkan ba, sakuna nanara upliki nani tilara iwaia sip kabia, upliki nani nini mâki maiyuni ba witin nani sin aitani lukbia bara nini bri swer taki aisabia: ‘Dawan raya ba mita.’

¹⁷ Sakuna ani nisanka kabia bîli wali daukras kabia kaka, wakia wal daiki slingbamna. Yang, Dawan, kasak aisisna.”