Jirimaya 11 - DAWAN BÎLA AISKA

Wal aisi lâ daukan kata ba krikan

¹ Dawan ba yang ra balan, Jirimaya, bara yang ra ai win:

² “Israel luhpia nani aman walbia naha wal lâ daukan bîla nani na. Bara Juda Jerusalem wal uplika nani ra man aisas,

³ bara man bui witin nani ra naku wis, yang Dawan, Israel Gâdka, param aisisna, saura pali kabia baha uplika ra naha wal lâ daukan lâka bîla nani ba kat wali daukras ba.

⁴ Naha lâka ba sika yang damikam nani wal daukri, witin nani Idsip wina sakri ba piua ra, Idsip kuntrika ba lapta pali kan ayan angki slilki kubuska baku. Yang bui witin nani ra wîri: Man nani lika yang bîli wali daukma bara upliki nani kama, yang sin man nani Gâdkam kamna.

⁵ Man nani bîli walma kaka, damikam nani ra swer taki aisari ba kat daukamna, tasba kum witin nani ra yabaia wîri ba, baha tasbaya sika nanara witin nani bri ba bahara tialka laya nasma wal lî baku aubisa.” Bara yang pana wîri: “Âu, Dawan.”

⁶ Bamna Dawan bui ai win: “Naha smalkanka na man Juda tawanka yabalka ra Jerusalem ra sin aisas. Upla nani ra wis: ‘Lâ daukan bîla nani aisin ba man nani wals, bara baha wali dauks.

⁷ Man nani damikam nani yang bui Idsip wina sakri ba ra, witin nani ra kupia krauki wîri yang ra baman bîli wali kabia, baha piua wina yang kupia krauki ban sna naha piua kat.

⁸ Ban sakuna, witin nani lika yang aisisna ba walras, bîli wali daukras, kiama karna takan, ai lukanka saura nani ra tniwan bara baha mita raski brih wan. Witin nani daukaia adarka nani wîri ba daukras kan, bara baha wina yabri klala ba witin nani ra balbia lâ daukan piua ra aisi kata ba.’ ”

⁹ Dawan kau ban aisi ai win: “Juda uplika nani bara Jerusalem uplika nani sika maipara buisa.

¹⁰ Ai damika nani saura daukan, saurka ba witin sin daukan, damika nani ba bîli wali daukaia apia win, bara gâd wala nani ninara wan, baha gâdka nani ra mayunan. Israel luhpia nani bara Juda uplika nani sin damika nani wal lâ daukri lâka ba krikan.

¹¹ Baha tâwan pât tara kum yang bui witin nani ra blikamna, baha wina sip swak takbia apia. Nahki kat witin nani bui yang ra hilp makabi ai winbia, sakuna yang lika witin nani ra walamna apia. Yang, Dawan, kasak aisisna.

¹² Baha taim Juda uplika nani Jerusalem nani sin witin nani kîa pain angki yabi ba gâdka nani ra hilp makabaia wabia, sakuna pât tara ba balbia bara baha gâdka nani sin witin nani ra sip swaki sâkbia apia.

¹³ Juda gâd nani ailal pali brisa tawan nani ailal bri ba baku, Jerusalem ra iwi uplika nani ba sin kîa pain angki Baal ra yabaia altar nani ailal paskan sa tawan ra yabal ailal ba baku.

¹⁴ Bahamna Jirimaya, man, naha uplika nani tâwan puram sunpara; witin nani hilpka ra makabi yang ra puram sunpara, kan witin nani pât tara ra dimbia bara hilp briaia yang ra ai pura sunbia sakuna walamna apia.

¹⁵ “Israel, yang upliki, ¿man kasak diara saura ailal dauki si ba ra lika, nanara yang tempelki ra dîa plikisma? ¿Man nani lukisma daiwan batanka wîna nani sakripais dauki aikisma ba mita pât tara balras takaskbia, baku ba ra witin plapi swak takbia wisma?”

¹⁶ Kaina piua ra yang Dawan mita, man ninam ba mâki katna, ‘oliv dusa wahia sisitni mâ ailal painkira’. Sakuna nanara alwani karna lulki ba tilara, wahiam nani bara tnamwa nani ba sut angkaia sna.

¹⁷ Yang, karnika sut brisna Dawanka ba, yang mita sika mai angkri, bara yang mita sika pât tara ba man ra balaia daukri, Israel man Juda wal watawika lâka nani manis yang maipara daukram bamna, man nani Baal ra kîa pain angki yabi yang kupi baikram.

Waihla nani ba aikuki aisin Jirimaya ikaia

¹⁸ Dawan mita baha tânka mairikan naikra ilingkan waihla ba diara saura ai munaia wisi maipara diara dauki kan ba kaikaia.

¹⁹ Yang sika daira walras katna, sîp kum daiwan ikaia watla ra bri auya ba baku, yang maipara diara daukaia witin nani aikuki aisi kan ba. Witin nani aisi kan: “Baha dusa ai karnika aiska bri pâwi ba kaisa yawan klakaia; naha tasba wina daiki sâkpi rayaka bri nani ba tila wina, bara upla kumi sin witin ra kli ai kupia kraukbia apia.”

²⁰ Sakuna Dawan, man lika karnika sut brisma ba, man ba wihta kasak kum sma; upla kupia lukanka kat dîa luki ba sut kaikisma ba. Aik kaikamna man baha uplika nani ra nahki klala yabaisma ba, yang ra diara nani takaia ba man mihtam ra swiri bamna.

²¹ Anatot uplika nani yang ai ikaia luki kan, witin nani ai win Dawan dahra aisamna apia, aisi ban kamna kaka ai ikaia ai win,

²² karnika sut bri Dawanka ba witin nani ra wisa: “Yang bui man nani wal diara kulki kaikaisna: wahma nani ba aiklabi bara prubia, luhpia waitna luhpia mairin mani sin plun bla prubia.

²³ Witin nani kumi sin raya kabia apia, kan yua ba aula baha yua ra yang bui man nani aikuki diara kulki kaikamna, Anatot uplika nani, bara man nani puramra pât tara ba bri balamna.”