Jirimaya 1 - DAWAN BÎLA AISKA

Tâ krikanka bîla nani ba

¹ Jirimaya aisan bîla nani bara diara nani daukan ba. Jirimaya Hilquías luhpia waitna prîs nani kiamka tila wina ba, Benjamín tasbaya ra tawan kum nina Anatot, witin baha tasbaya ra iwi kan.

² Dawan ba Jirimaya ra aisin, ba piua ra Josías Amón luhpia waitna ba pat 13 mani Juda kingka aimaki kan.

³ Baku sin Josías luhpia waitna Joaquim Juda kingka kan ba piua ra sin Dawan bui witin ra aisin, bara baku ban aisi kan Sedequías Josías lupia waitna ba 11 mani Juda kingka aimaki kan piua ba kat; bamna wibia kaka baha manka ra kati 5 aimakan ba katka ra sika Jerusalem uplika nani ba priski tasba wala ra brih wan ba.

Dawan bui Jirimaya ra paiwisa

⁴ Dawan ba yang ra aisi si bara naku ai win:

⁵ “Man kau mamikam biara ra aimakras katma ba kaina wina pat man ba yang warkki daukaia bâk mai saki mai paiwri kan; kau mai baikras kata ba yua ba wina pat aihka mai sakri kan; tasba aiska ra waia nisan nani ra yang daihra aisaia dukiara.”

⁶ Yang pana wîri: “¡Ay, Dawan! ¡Yang sika wahma pali sna, sturi aisaia sin lan âpu sna!”

⁷ Sakuna Dawan bui ai win: “Man aisapara uba wahma sma. Yang anira mai blikamna ba, man bâra waia sma, baku sin yang dîa aisaia maikamna ba baha sika aisama.

⁸ Man upla kum ra sin sîa briaia apia sma, kan yang lika man wal kamna kainam sunaia. Yang, Dawankam, aisisna.”

⁹ Bara Dawan ai mihta sakbi uni ra kangbi bara ai win:

¹⁰ “Yang aisaia sna ba man unam ra mangkisna, bara naiwa karnika sut maikisna king nani purara, nisan nani purara sin, daikaia, batakaia, sauhki tikaia, kriki tikaia, baku sin paskaia bara mangkaia.”

¹¹ Dawan ba yang ra aisi, naku ai win: “Jirimaya, ¿man dîa kaikisma?” “Amans tnawa kum kaikisna” —wîri.

¹² Bara Dawan ba pana ai win: “Baku aisaia raitkam brisma. Bamna yang wali aihwaki kamna diara sut ra, baku mika yang bîli mai wîri ba kat aimakaia.”

¹³ Bara Dawan ba yang ra aima wala ra aisi, naku ai win: “¿Man dîa kaikisma?” —yang ra makabi walan. “Dikwa kum lukwisa, yahbra tani ra laiwaia pat baila pali baku kaikisna” —wîri.

¹⁴ Bamna Dawan bui ai win: “Yahbra ba wina pât tara ba balbia naha tasbaya uplika nani ba purara.

¹⁵ Yang, Dawan, man nani ra kasak mai wisna, yahbra tani king tasbaya nani ba sut paiwrika balbia, kingka nani sin balbia bara baha kingka nani ba Jerusalem getka pali ba kat ai iwaika nani ba bapbia tawan kutbanka ba kir, Juda tawanka tara nani ba sin kir kutbi bribia.

¹⁶ Naku sika klalka yabaia lâ daukaia sna ba, baha saura dadaukra nani ai lulki ai swin ba mapara, witin nani sika dus mâka kîa pain angki bara upla wala nani ra witin ai tasbaya wina apia nani gâdka lilka klauna paski bri kata ba, bahara ai pura suni mayunan.

¹⁷ Bamna man, kupiam karna bris; was bara yang dîa mai wîri ba baha wis. Man lika witin nani ra sibri apia sma, baha apia kaka yang bui mai munrika man bui witin nani mawan ra tatatwi kama.

¹⁸ Kan naha yua ra yang mai blikisni, man ba tawan tara kum ai kaina kutbanka bri ba baku, ayan playka ni bapan baku, bras ni kutban tawanka baku, Juda tasbaya aiska mapara buma: kingka nani ba mapara, wihta nani, prîs nani ba mapara, uplika nani sut ba mapara sin.

¹⁹ Witin nani mampara war aiklabia, sakuna puram lubia apia, kan yang lika man wal kamna kainam kahbaia. Yang, Dawan ba, yang bîli mai wisna.”