Jems 5 - DAWAN BÎLA AISKA

Yuyakira nani ra smalkanka ba

¹ ¡Yuyakira nani, naha na wals! ¡Man nani ini bas, bîlam baikra sin tara wins, trabil saura nani man nani wahwaisma bamna!

² Yuyakam nani ba sut âpu sukwan sa, bara kwalkam painkira nani sin yula nani mita pin sa.

³ Gulkam bara silbarkam sin mâka alkan sa, bara naha mâka na man nani mampara witnis kabia, bara baha mita pauta baku wînam tara pali ba sauhki tikbia. Man nani yuyakam paski sunram naha yua nani ra baha ba lâs kabia.

⁴ Namsla ra wark takan uplika nani ra mana yabras kapram ba, mampara winisa; bara Dawan Gâd, karnika sut bri ba, warkkam tatakra nani winanka ba walan.

⁵ Naha tasba ra man nani prana bara tasba dukia pain baman bri kapram, bara daiwan baku batanwisma. Ikaia yua ba aimakan sa.

⁶ Pâtkas nani ra man nani mita pât ra dingki ikram, bara witin nani mampara sin buras kan.

Wihka bîla kaikanka bara pura sunra ba wal

⁷ Bahamna, muihki nani, man nani wihka bîla kaiki bas insla dawanka baku, Dawan balbia ba kat. Ya insla warkka dauki ba, mâ manakira dâkaia wihka bîla kaikaia sa, lî piua aimaki auhbia ba kat.

⁸ Man nani sin wihka bîla kaiks, kupiam sin dutki bri bas, Dawan balaia yua ba pat baila sa bamna.

⁹ Muihki nani, pana pana brukwanka bripara, baku lâmka daukbia apia; kan Gâd, witinka Wihta aimaki ba, dur lama kat buisa.

¹⁰ Muihki nani, pât wahwaia ba sampla baku bris, Gâd prapitka nani, pât wahwi wihka bîla kaiki, Dawan bîla aisi kan.

¹¹ Kaiks, yawan na pât wahwi bapi buan nani ra, yamni kulkisa. Man nani Job bapi buanka ba pat walram, bara kaikram ningkara nahki munan ba Dawan mita; kan Dawan lika kupia swapni bara sin pihni pali sa.

¹² Sakuna, muihki nani, diara sut purkara swer takpara pali, kasbrika purara ba nina mâki, tasba nina mâki kra, swer sâtka wala sin daukpara. Man nani “âu” wima ba, yarka “âu” kabia, bara “apia” wima kaka, yarka “apia” kabia; baku mika Gâd lika pât ra mai dingkbia apia.

¹³ Man nani tilamra upla kum pât wahwisa kaka, ai pura sunaia sa. Ya ai kupia lilia kaka, Gâd ra mayunra lawana nani aiwanaia sa.

¹⁴ Upla kum siknis sa kaka, serts almukka nani ba paiwaia sa, bara witin ai pura suni, Dawan nina mâki witin ra batana yûkbia.

¹⁵ Bara witin nani kasak luki ai pura sunbia ba ra, siknis uplika ba rawbia, bara Dawan mita witin ra bukbia; bara saurka nani daukan kaka, sut swih tikan kabia.

¹⁶ Baha mita, pana pana saurkam nani damhra sâks, bara pana pana dukiamra sin puram suni bas, bara baku lika rawma. Upla kasakkira pura sunra ba karnika tara brisa.

¹⁷ Prapit Ilayas ba yawan baku upla kum kan; witin lî auhbia apia wisi ai pura sunan ba ra, mani yumhpa pura bakriki naha tasba ra lî auhras kan.

¹⁸ Ningkara, ai pura sunan ba ra, lî kli auhan, bara tasba ba kli ai mâ sakan.

¹⁹ Muihki nani, man nani tilam wina kum kra kasak tânka wina tnaya ra takbia ba ra, upla wala mita kli wapni ra mangkbia kaka,

²⁰ man nani kaiki bas; ya ya mita saura dadaukra kum ra ai yabalka saura wina kli wapni ra mangkbia kaka, baha uplika sulka ba prura wina swaki sâkbia, bara saurka ailal ba sin swih tikan kabia.