Jems 3 - DAWAN BÎLA AISKA

Wan twisa ba

¹ Muihki nani, man nani tilamra smasmalkra ailal kaia apia sa, kan man nani pain kaikisma, yawan smasmalkra nani ba lika, wan lâka kau karna daukan kabia.

² Yawan sut watawi uya daukisa; bara ya ai bîla aisi ba wal watawi kumi sin daukras kaka, baha ba upla wapni sa; witin ai wîna tara aiska ra sin alki takaskaia sip sa.

³ Aras un wilkaia kiwka ba wilkisa wan bîla walbia dukiara, baku dauki araska wîna aiska ba, yawan mita alki takaski tâ brisa.

⁴ Man nani duri tara nani ba ra sin kaiks: baha nani nahki tara kabia sin, pâsa karna nani mita brih taukisa, sakuna wawakra waitna ba wakaika sirpi kum ni, anira witin want ba kat brih wisa.

⁵ Wan twisa ba sin baku sa; wan wîna pîska sirpika kum sa, sakuna lukisa diara tara nani daukaia. ¡Pauta klauhan sirpi ba wal dus nani pâwi ba sut angkisa!

⁶ Bara wan twisa ba pauta klauhan kum baku sa. Wan twisa wan wîna tara ra mangkan ba lika, watawan lâka ni aibanhwan pali sa; bara wan wîna aiska sauhkisa. Hil pauta pali ba mukan sa, bara baha mita wan rayaka aiska mukisa.

⁷ Upla mita daiwan kraskira sât sât tim daukaia sip sa: daiwan tnawira nani, piuta nani, kabu daiwra nani, bara baha nani ba tim daukaia sip sa.

⁸ Sakuna wan twisa ra lika upla mita sip tim daukras. Upla mita ai pura yan luras sa, bara upla ra ikaia puisinka ni banhki sa.

⁹ Naha sim twisa ni, wan Aisika Dawan ra mayunisa, bara upla nani Gâd ai lilka kat paskan nani ba ra lahtubisa.

¹⁰ Sim bîla wina mayunra nani bara lahtuban nani sin takisa. Muihki nani, naha na naku kaia sip apia sa.

¹¹ Lî kârma kum wina sip lî damni bara lî tahpla taki laiwras.

¹² Muihki nani, ¿kwah damni dusa kum sip sa ki batana mâ nani sakaia, bara wain dusa kum sip sa ki kwah damni mâ sakaia? Baku bamna, lî kârma kum sip sâl laya bara lî damni sakras.

Sins lâka kasak ba

¹³ Man nani tilamra upla sinskira bara diara tânka kakaira kum bâra sa kaka, latan marikbia witin wapni tauki ba lâka ni, ai sinska mita bawikira lâka yabi ba ni.

¹⁴ Sakuna man nani kupiam ra tuman lâka tahpla pali brisma ba ra, wînam dukiara sin diara nani daukisma kaka, sinskam ba dukiara wînam ra tara lukpara, kan baha ba kasak lâka mapara kunin aisisma, apia sin wisma.

¹⁵ Nahmuna sinska lâka, Gâd wina balras; naha tasba sinska sa, upla lukanka wina, Sitan pali wina sa.

¹⁶ Kan anira tuman lâka nani bara wan wîna dukia plikanka bâra kaka, bahara tanis turban lâka, daukanka saura sât sât sin bâra sa.

¹⁷ Sakuna Gâd wina sinska lâka bri uplika nani ba, tâura ai rayaka ba sunu brisa; baha ningkara, kupia kumi lâka brisa, upla ra pain munisa, bara diara tânka kat dauki uplika nani sa. Umpira lâka brisa bara ai uplika ra yamni munisa; witin nani kasak kat daukisa kunin lâka âpu.

¹⁸ Bara kupia kumi lâka pliki nani ra, wapni iwbia dukiara kupia kumi lâka ra mangkisa.