Jasua 7 - DAWAN BÎLA AISKA

Acán saura daukan ba

¹ Sakuna waitna kumi bâra kan, Juda taika tila wina, nina ba Acán, Carmí luhpia waitna, Zabdí mulika bara Zérah snawika. Diara nani sut sauhki tikaia kan ba tila wina witin diara nani ba brin, bamna baha daukan ba tâka Israel luhpia nani sut Dawan mawanra pâtkira kulkata, kan Dawan bui witin nani ra pat kasak win kata diara sut sauhki tikaia. Baha tâwan, Dawan kupia baiwanka ba witin nani mapara balan.

Saurka mana aibapan: Ai uplika mita pura luan

² Jasua mita tila waitna nani ba Jeriko wina, Ai tawanka tara ra waia blikan kan, Betel lalma ra, Bet-avén lamara. Witin nani ba blikan kan baha tawanka uplika nani iwanka ba lâka tânka ba laki kaikaia. Bara witin nani Ai tawanka tânka ba wapi kaikan,

³ bara witin nani kli tawi balan bara diara kaikan ba sturka ba sut Jasua ra win: “Yang nani kaikisna wan uplika nani na sut Ai mapara wih aiklabaia apia sa, upla 2,000, apia kra 3,000 wabia kaka, baha aitani sa tawanka ba dakbi briaia. Kan uplika nani ba maura lupia baman ai tawanka ba kan kahbi aihwakisa. Bamna wan uplika nani sut blîkpara.”

⁴ Baku win bamna, waitna 3,000 bahmuna blikan Ai uplika nani ba mapara aiklabaia waia. Sakuna Ai uplika nani mita panaura aiklabi pura lui bara munan plapan;

⁵ Israel luhpia nani ra tawan getka lama ba wina munan plapan, bara nina bliki ban walpa tara nani ba tila kat wan. Bara il bîla ra iwaia ba kat wan ba ra, 36 waitna baku ikan. Baha baku takan tâka, Israel luhpia nani sut kupia kriwan bara kau aiklabaia karnika âpu takan.

⁶ Baha yua Jasua bara Israel almukka nani sut, ai prâka kalkan bara ai lal purara yamhpus yakabi sari bri tukinka ba daukan. Bara baha yua aiska witin nani Dawan lâka auhbaia watla ba lamara ai mawan tasba kat aimakupi bâra kan.

⁷ Bara Jasua lika Dawan ra naku ai pura sunan: —¡Ay, Dawanki! ¿Dîa yang nani na, amorreo nani mihta ra aimakaia baman Jordan awala baila wala ra lui banhri ki, bara witin nani mita ai sauhki tikaia? Naku takaia ba win kata kaka, yang nani Jordan awala baila wala ra ban bâra kaina.

⁸ ¡Ay, Dawan! ¿Israel luhpia nani, ai waihla nani mawan wina ai nina tawi plapan ba, nanara yang dîa wimna?

⁹ Kenan uplika nani naha tasbaya ra iwi ba dîa takan na sturka ba sut walbia, bara witin nani sut asla taki bara wan mapara bal aiklabi rau wan sauhki âpu wan daukbia, bara upla sin wan sturka aisaia sin âpu kabia. ¿Bara baha kat man ninam kulkanka tara ba dîa kabia ki?

¹⁰ Bara Dawan pana Jasua ra win: —¿Man bâra dîa daukisma? Bahara prawisma ba wina mahka bus.

¹¹ Israel luhpia nani saura daukan, witin nani wal lâ daukri lâka ba witin nani sauhkan. Diara nani sut sauhki tikbia wîri ba dukia nani ba, witin nani ai dukia brin. Witin nani saura daukuya ba tânka bri kan, sakuna ban implikan, baha diara brin nani ba ai tilara yukuki brisa.

¹² Baha mita Israel luhpia nani ba ai waihla nani mapara sip bubia apia. Baha nani mawan wina witin nani plapaia sa, kan nanara Israel luhpia nani ba aitani sa sauhki tikaia lâka ra mangkan kaia. Bara man nani mahka pali, baha dukia nani sut slingbi tikaia mai wîri ba slingbi tikras sma kaka, yang lika man nani wal ban kamna apia.

¹³ Bus bara upla nani sut paiws balbia. Witin nani ra wis upla sut ridi takbia yauhka yang maiwanra bal buaia. Yang Dawan, Israel Gâdka, yang naha bîla nani man nani ra aisaia brisna: ‘Man, Israel, diara sut sauhki âpu tikaia kapram ba dukia nani ba wina diara nani briram, bara baha dukia nani ba sut sauhki lulki swiras kama kaka, waihlam nani mapara sip buma apia.’

¹⁴ Yauhka kiamka kumi bani ai daknika ba kat maiwanra bal bubia, ani kiamka ba kat yang sturi aisamna ba, witin nani kumi bani ai masraka uplika nani aikuki asla taki maiwanra balbia. Bara masraka uplika nani ba kat aisamna kaka, baha taika ba tila wina waitna kumi bani yakan wapi maiwanra balbia.

¹⁵ Bara ani waitnika baha implikan dukia nani bri ba, witin ai taya nani ba, ai dukia nani ba sut aikuki angki sauhki âpu tikbia, kan witin bui Israel luhpia nani tilara baha swira lâka daukan bara Dawan lâka ra lâ daukan ba kat daukras kan ba tâwan.

Acán taika nani ba aikuki ikan

¹⁶ Yapra wala titan pali Jasua pat buan, bara upla nani ra win kiamka kumi bani ai daknika kat ai mawanra balbia. Witin nani aidrubi balan ba ra, Dawan Juda kiamka ba kat aisin.

¹⁷ Bara Juda kiamka ra win: man nani kumi tilam kat, masraka wal daknikam kat maiwanra bal bus, bara Dawan Zérah masraka daknika kat aisin. Bara Zérah masraka daknika ba tila wina, Zabdí watla bîla uplika nani kat Dawan aisin.

¹⁸ Bara Zabdí watla bîla uplika ba wina, waitna nani ba kumi taki wan, bara Dawan Acán kat marikan Carmí luhpia waitna, Zabdí mulika bara Zérah snawika, Juda kiamka tila wina waitnika ba.

¹⁹ Bara Jasua bui Acán ra makabi walan: —Luhpi, pain kulkan mayunan lâka ba Dawan Israel Gâdka ra yas, man dîa daukram ba damra ba yukukpara, ai wis.

²⁰ Bara Acán pana witin ra win: —Âu, kasak pali, yang daihra sakisni, Dawan Israel Gâdka mapara saura daukri. Naha saurka nani sika yang daukri ba:

²¹ Jeriko ra diara nani yang nani dakbi briri ba tilara, kaikri Babilon ra daukan kwala tara maman painkira kum bâra kan silbar mâ 200, wala gul ni dus kum daukan paun kum pura bri kan. Baha dukia nani ba sika yang pain pali kaikri bara briri; dukia nani ba, tintki watla bilara tasba salhki, lalahka ba munhtara mangki bara diara wala nani ba baha purara biki swiri sa.

²² Bara Jasua waitna nani saki blikan, Acán tintka watla ra waia baha dukia nani ba sakaia, bara waitna nani ba wan dukia nani ba sut bara lalahka nani ba tasba ra bikan kan ba sin sakan.

²³ Witin nani dukia nani ba bri si Jasua ra yaban, Israel luhpia nani sin sut kaikan, bara witin nani dukia nani ba Dawan mawanra bri si kahban.

²⁴ Baha wina witin nani kli kwala ba, silbarka ba, gul ni daukan dusa ba sut saki brin. Bara Acán, luhpia waitna nani ba, luhpia mairin nani sut, bîpka wainhka nani, birikuka nani, sîp nani, tintka watla, dukia wala nani bri kan ba sin sut saki brin.

²⁵ Bara Jasua bui Acán ra win: —¿Naha saura lâka tara na, dîa muni man wan purara bri balram? Bamna nanara, naha saurka lâka tara bri balram na mana, Dawan mita saurka ba man puramra batakuya. Witin baha aisin ba ra, Israel luhpia nani sut ba mita Acán ra, luhpia nani, dukia nani sut ba purara walpa ni sabi baha kat iki pauta ni angkan.

²⁶ Angkan ba ningkara, witin yamhpuska ba purara walpa nani ailal paski swin. Baha walpaya paskanka tara ba, naiwa kat ban bâra sa. Baha tâwan baha ilka bîla ba nina mâkan Acor. Baku daukan ba kat, Dawan kupia baiwanka ba Israel luhpia nani mapara lamni takan.