Jasua 6 - DAWAN BÎLA AISKA

Jeriko ra dimaia ridi takan ba

¹ Upla kumi sin Jeriko ra dimaia bara bal takaia sin sip apia kata, kan tawan getka ba sut praki bri kan, param swika Israel luhpia nani ba bal tawan ra dimbiara sîa.

² Sakuna Dawan Jasua ra win: “Jeriko tawanka kingka bara suldiarka nani ba sin sut, man mihtam ra mangkri sa.

³ Man nani Israel suldiarka nani yu matlalkahbi ba, yu bani naku dauki bas: Yu bani aima kumi tawan kutbanka lata tani ba kir wapi tawi bas.

⁴ Prîs 7 Dawan lâka auhbaia watla ba twilki wapi ba, upla sut tâura wapi kabia, kumi bani sîp aringka ni daukan trumpitka kum bri kabia, bara yu matlalkahbi pura kumi yua ba, yu kumi bilara 7 taim tawan ba mawanra wapi tawbia, bara prîs nani ba lika trumpit ba puhbi kabia witin nani wapi ba ra.

⁵ Man nani wali kama trumpit puhbi binka ba bin sât aihka kum puhbia, bara upla sut sin ai karnika aiska ni karna ai pura winbia, bara man nani kaikma tawan kutbanka ba sasakwi kauhbia. Bâra mika man nani aihni plapi tawan ra dimma.”

⁶ Bara Jasua bui prîs nani ba paiwi sturka ba win: “Man nani bui Dawan lâka auhbaia watla ba brih was, bara man nani wina 7 ba, Dawan lâka auhbaia watla ba twilki tâura wapi bas, bara kumi bani sin mihtam ra sîp aringka ni daukan trumpitka ba bri bas.

⁷ Bara witin bui upla nani ra bara suldiar nani ra sin win: ‘‘Man nani was bara tawan kutbanka ba kir wapi tawi bas. Suldiar nani ba sin, Dawan lâka auhbaia watla twilki ba mawanra wapi kabia.”

⁸ Jasua upla nani ra dîa daukaia win ba witin nani sut baku daukan. Prîs nani 7 ba witin nani Dawan lâka auhbaia ba watla twilki tâura wapan, trumpit nani ba sin puhbi, lâ auhbaia watla ba witin nani nina bliki kan.

⁹ Suldiar nani ba prîs nani tâura wapi kan, bara upla nani sut ba lika lâ auhbaia watla ba ninara wapi kan, bara prîs nani ba lika trumpit ba takaskras puhbi kan.

¹⁰ Sakuna Jasua aiklaklabra nani sut ra win, witin nani bin kumi sin daukaia apia, sâp pali wapi tawi kaia, ahkia witin mita witin nani sut ai karnika aiska ni ai pura winbia wibia ba kat bin daukaia kan.

Jeriko dakbi brin ba

¹¹ Jasua adar yaban Dawan lâka auhbaia watla ba, tint watla wina saki aima kum tawan ba kir wapaia. Baha ningkara kli kiamp ra tawi bal, witin nani tihmia bahara lalawan.

¹² Yu wala titan pali, Jasua pat buan bara prîs nani ba sin bara witin nani Dawan lâka auhbaia watla ba saki brin.

¹³ Prîs nani 7 ba Dawan lâka auhbaia watla ba brih tâura wapi kan, takaskras trumpit ba sin puhbi wan, suldiar nani ba tâura, bara wala nani ba lika ninara lâ auhbaia watla ba nina bliki kan.

¹⁴ Yapra wala ba yu wala daukan ba baku kli daukan, tawan kutbanka ba kir wapi tawi, kli tint watla ra bri si swin. Bara yu matlalkahbi yu bani baku dauki kan.

¹⁵ Bara yua 7 ba, lalma kahbi kan, witin nani pat buan bara tawan kutbanka ba kir pat wapi tawan, yu wala nani wapi tawi kan ba baku, sakuna baha yua lika 7 taim wapi tawan.

¹⁶ Prîs nani ba 7 yua ba trumpit puhban, bara Jasua sin upla nani ra win: “¡Nanara man nani sin puram wins! Tawanka na Dawan bui man nani mihtam ra mangkan sa.

¹⁷ Bamna tawanka ba, bilara diara nani bâra ba, sut pali ba aiska sauhki tikaia sma, kan Dawan adarka ba baku win. Rahab rug mairin ba, baha ai watla bîla uplika nani bâra ba baha nani baman raya ban swima; witin nani ba ikpara, kan tawan tânka pliki kaikaia blikan waitnika nani rayaka ba, witin mita yukuki swaki sakan bamna.

¹⁸ Man nani aman kaiks, tawan bilara diara nani ba wina diara kumi sin bripara, mihtam sin kangpara, kan diara sut bâra ba dukiara pat adar win sa baha sut sauhki tikaia, baku daukras kama kaka, Israel kiampka Dawan mita lahtuban kabia bara sari lâka tara twilkbia.

¹⁹ Sakuna gul bara silbar nani ba, bras ni bara ayan ni daukan dukia nani sut ba lika, Dawan dukia yaban kabia bara Dawan lalahka watla ra mangkbia.”

²⁰ Upla nani ai pura winan bara trumpit nani sin puhban. Israel luhpia nani sut pali trumpit puhban bin daukan walan ba ra, witin nani ai kârma kalki karna winan, bara tawan kutbanka kata ba bal kauhan. Bara witin nani aihni plapi dimi tawan ba alki brin,

²¹ bara witin nani sord ni waitna, mairin, wahma, tiara, almuk, bîp wainhka, sîp, biriku nani sut ikan. Diara sut ba sauhki âpu tiki banhwan.

²² Bara tasbaya ba tânka saki pliki kaikaia Jasua mita waitna wâl saki blikan kan ba, waitnika nani ra win: “Man nani rug mairin ba watla ra was, bara mairka ba, baku sin upla wala nani baha watla bilara bâra ba sut latara sâks, bara man nani lika witin nani aikuki wal dîa pramis daukram ba kat nanara bîlam kat witin nani wal dauks.”

²³ Witin nani wan, Rahab watla ra diman, bara aisika, yaptika, muihnika, lakrika bara taika nani sin sut latara sakan, bara Israel luhpia nani tintka lata tani ra plis kum ra bri si swin.

²⁴ Baha nani sakan ba ningkara, tawanka ba witin nani mita pauta ni angkan, bara dîa dîa bilara ba sut ami luan. Silbar, gul, bras, ayan ni daukan dukia nani ba baman amras kan, bara baha dukia nani ba lika Dawan lalahka watla ra swin.

²⁵ Sakuna Jasua bui Rahab taika nani baman lika ikras swin, kan witin Jeriko tawanka ba tânka pliki kaikaia waitna wâl blikan kan ba, mairka ba mita ai watla ra yukuki brin bamna. Baha piua wina Rahab bara ai kiamka nani ba sin Israel luhpia nani aikuki ai tilara iwan.

²⁶ Baha ningkara Jasua swer taki naku aisin: “Dawan nakra ra ya pali kli Jeriko tawanka ba paskaia bubia ba, saura pali kaikan kabia. Ai luhpia tawahkia ba purara tawanka playka tara ba sunbia, bara ai luhpia sirpika ba purara tawanka getka ba sunbia.”,

²⁷ Dawan bui Jasua ra tâ baikan, bara witin wark daukan sturka ba baha tasbaya aiska ra upla sut walan.