Jasua 5 - DAWAN BÎLA AISKA

Wîna ra klaki Aisa sainka mangkan

¹ Jordan awala baila wala muna tani ra amorreo nani kingka nani sut, Mediterráneo kabuka lamara ba, Kenan uplika nani kingka nani ba sut sin, sturi takan ba walan, Dawan mita Jordan awala ba lâki bri kan, bara Israel luhpia nani ba awala baila wala luan ba. Baha sturka witin nani ra kasak sibrin daukan, baha mita witin nani kumi sin Israel luhpia nani ra ai mihta bukras kan.

² Baha diara nani sut baku takan ba ra, Dawan Jasua ra aisi, win: “Walpa nani ba ni skiru nani dauks, bara Israel luhpia nani ba wîna ra klaki Aisa sainka ba mangks.”

³ Jasua skiru nani ba paskan, bara Israel luhpia waitna nani ba sut Aralut ilka ra wan, bara Aisa sainka ba mangkan,

⁴ kan Israel luhpia nani war aiklabaia manka alkan Idsip wina takan nani Aisa sainka mangkan waitnika nani kan ba sut yabal ra upla iwras tasbaya ra pruan bamna.

⁵ Waitna nani Idsip wina takan nani ba sut Aisa sainka ba mangkan, sakuna baha nani ningkara yabal ra wala nani aisubi takan nani ba apia, upla iwras tasbaya yabalka ra baha nani sainka ba briras kan.

⁶ Israel luhpia nani ba upla iwras tasbaya bâk 40 mani watauki kan bamna, war aiklabaia manka bri kan waitnika nani ba sut pruan. Baha waitnika nani ba Dawan lâ daukan bîla ba wali daukras kan, baha mita Dawan bui witin nani ra swer taki win, tasba ai damika nani ra yabaia win ba tasbaya ra baha nani dimbia apia; baha tasbaya ra sika tialka laya bara nasma laya lî laiwi baku laiwisa.

⁷ Baha mita Dawan bui Jasua ra win baha waitnika nani luhpia nani ba, witin nani ai watlika ra baikan ba Aisa sainka ba mangkaia, kan witin nani kau yabal ra auya kan ba mita Aisa sainka ba kau mangkras kan.

⁸ Waitna nani ba sut Aisa sainka ba mangkan kan, bara witin nani sut utla ra takaski sâp bâra kan insauhkanka ba pain takan ba kat.

⁹ Baha daukan ba ningkara Dawan kli Jasua ra win: “Naha Aisa sainka mangkri na wal, Idsip uplika nani wina swira lâka briram ba sakisna.” Naha daukanka tâka ba mita, baha tasbaya ba naiwa kat ban nina Guilgal mâkisa.

¹⁰ Israel luhpia nani ba Guilgal ra Jeriko lamara ai tintka watla ba bapan, kati 14 yua aimakan tutnika ba. Baha yua ra, witin nani tihmia ra prura insalka bal lui wan ba yua liliaka tara ba daukan.

¹¹ Baha yua pali ba witin nani brit îs âpu dauki plawar kâki pin, plun tara dauki pin, bara baha yua yapra wâl ba wina mahka plun nani sâtka sut tasba wina pâwi taki ba pin.

¹² Baha yua wina manâ ba kli kauhras, Israel luhpia nani manâ kli piras takaskan, bara baha manka aiska witin nani Kenan ra insla pata wina plun pin.

Dawan mita blikan waitnika ba Jasua wal

¹³ Yu kumi, Jasua Jeriko tawanka lamara bûi kan, witin ai lamara kaikan waitna kum sord kum ai mihta ra alki bri ai mawanra bûi kan. Jasua kau witin ai lamara dimi wan, bara waitnika ra makabi walan: —¿Man ba yawan uplika nani kum sma, apia kaka wan waihla nani wina kumika sma?

¹⁴ —Kumi sin apia, wala ba sin apia —waitnika ba pana win—. Dawan aiklaklabra nani bri ba, baha nani pura wihtka baku yang balri. Bara Jasua lika witin mawanra ai mawan ai lal tasba kat bawan, bara makabi walan: —¿Dawan mita man nampakan ra dîa wiaia brin mai daukisa?

¹⁵ Bara Dawan daknika aiklaklabra nani pura wihtka ba bila witin ra win: —Sûskam ba daiks, baha tasbaya ra buisma ba holi sa bamna. Bara Jasua dîa win ba kat daukan.