Jasua 24 - DAWAN BÎLA AISKA

Jasua lakula daukisa

¹ Jasua Siquem tawanka ra asla takan Israel kiamka nani sut wal. Almuk nani, wihta nani, lâ dadaukra nani, wihta tara nani sut paiwan Dawan mawanra,

² bara upla sut ra win: —Dawan bara Israel Gâdka ba, naku wisa: ‘Blasi piua ra Térah bara ai luhpia nani Ebraham bara Nahor ba aikuki, man nani almukkam nani ba, Éufrates awalka un ra iwi kata bara gâd bahki nani ra mayunan.

³ Éufrates awalka un wina Ebraham ba saki briri, bara Kenan tasbaya ba aiska yâri wapi taukan. Yâri ailal sahwaia, pas ai luhpia Aisak ba sin yâri,

⁴ bara Aisak ra luhpia wâl yâri, Jekob bara Isau. Bara Isau ra Seír tasbaya ilka unta biara ra ba yâri, sakuna Jekob bara ai luhpia nani wal lika Idsip ra wan.

⁵ Bara yang bui Moses bara Eran wal blikri, Idsip ra prura klalka sin yâri, yang bui man nani baha wina mai sakri kat.

⁶ Man nani damikam nani Idsip wina takan ba, Idsip uplika nani ai nina blikan rausauhkaia, wagin, aiklaklabra bara aras wal sin Kabu Pauni kat.

⁷ Witin nani ai winan ba ra, yang bui Idsip uplika nani lilapas ra tihmia tara mangkri, bara kabu ba Idsip uplika nani purara yâri bikan. Man nani ba baha witniska nani sma dîa Idsip ra daukri ba. ‘Ba ningkara man nani twi ra mani ailal, upla iwras tasbaya ra wataukram,

⁸ amorreo nani tasbaya ra mai bri balri ba kat, Jordan lalma tani ra. Witin nani mampara aiklaban, sakuna yang pura luaia maikri; bara man nani sauhki tiki, tasbaya ba dawanka takram.

⁹ Ningkara Balac, Sipor luhpia ba, Moab uplika nani kingka ba, balan man nani mampara aiklabaia. Balac mita Balaam mata blikan, Beor luhpia ba, bal man nani ra saura mai wih mai lahtubaia dukiara.

¹⁰ Sakuna yang Balaam ra swiras kapri saura mai wiaia, bara ban yamni mai munaia kan. Baku man nani swaki mai sakri.

¹¹ Bara man nani Jordan awala lui bara Jeriko kat balram. Jeriko ra iwi kan nani ba amorreo nani, ferezeo nani, Kenan uplika nani, hitita nani, gergeseo nani, heveo nani bara Jebús uplika nani. Man nani mampara aiklaban, sakuna yang pura luaia maikri man nani ra.

¹² Amorreo kingka nani wâl ra man nani sauhki tikras kapram sord bara pantamangka wal sin apia, sakuna yang mita sibrin tara blikri man nani kainamra. Baku ba mita witin nani sut plapan kan, man nani waras kapram kainamra.

¹³ Yang bui man nani ra tasba kum maikri, man nani wark takras katma ba, bara man nani mita tawan kumi paskras katma ba, man nani bahara iwisma, bara man nani wain bara batana sin mangkras katma ba wina pisma.’ Bara Jasua kau pura praki aisin:

¹⁴ —Naha sut ba mita, man nani bui Dawan ra pain kulks, bara ban kasak ai dukia dauks kupiam wina, bara ai lâka aiska kulks. Damikam nani gâd bahki nani ra Éufrates awalka un ra bara Idsip ra mayuni kata ba wina dakwi taks, bara Dawan dukia dauki banhs.

¹⁵ Sakuna man nani lika Dawan dukia daukan mai daukras kaka, pliki sâks naiwa man nani ya dukia daukaisma ba: man nani damikam nani bui Éufrates awalka un ra iwi kan bara gâd bahki nani ra kulkan ba, apia kaka amorreo nani gâdka bahki nani ra mayuni kan ba naha tasbaya ra. Sakuna yang tani ra lika, waitla uplika sut sin, Dawan dukia dauki banhwamni.

¹⁶ Bara upla nani pana aisi, win: —Yang nani Dawan ba swimna apia, gâd wala bahki dukia daukaia dukiara.

¹⁷ Dawan sika yawan ra Idsip wina wan sakan ba, wan damika nani ra sin, yang nani alba katna ba ra. Witin sin wark aihkakira nani ailal wan mawanra daukan, bara witin sin wan kaina kahban, wan tâ baikan yabal ra, tawan ailal tila bâk lui balata.

¹⁸ Wan yabalka ra upla ailal bâra kan ba sut sakan, bara amorreo nani nâra iwi kata ba sin. Baku ba mita, yawan nani Dawan warkka daukpi, kan witin ba wan Gâdka sa.

¹⁹ Sakuna Jasua bui witin nani ra win: —Man nani sip Dawan warkka daukras, kan witin lika Gâd kum holikira sa, bara ai nina tâwan lalawra sa, ban swibia apia kiamapara nani ra bara man nani saurkam daukisma ba sin.

²⁰ Man nani bui witin ba swi si, bara gâd wala nani dukia daukma kaka, Dawan ba pana saura mai munbia, bara sut sauhki mai tikbia, witin bui man nani ra diara pain manis daukan sa kuna.

²¹ Tawan uplika pana aisi, win: —Baha takbia apia. Yang nani Dawan dukia dauki banhwamni.

²² Bara Jasua win: —Man nani pali mita witniskam takisma, pliki sakisma Dawan dukia baman daukaia. Pana witin ra win: —Âu, yang nani baku aisisni.

²³ Jasua bui witin nani ra win: —Man nani tilam wina gâd bahki nani ba sut sâks, bara kupiam aiska kira Gâd ra taws, witinka Israel Gâdka ba.

²⁴ Bara upla nani pana aisi, win: —Yang nani Dawan wan Gâdka dukia dauki banhwamni, bara dîa witin wan wibia ba dauki banhwi kamna.

²⁵ Baha yua wina, bahara Siquem ra, Jasua lâ kumi daukan upla nani wal, bara lâ nani yan, lâ tara wala nani sin,

²⁶ bamna Dawan Gâd wauhkataya ra lâ nani ba sut ulban. Ningkara walpa tara kum brin bara usupum dusa munhtara mangkan, bahara sika Dawan holikira ba pliska bâra kata ba.

²⁷ Bara upla sut ra win: —Naha walpaya na wan witniska kabia, Dawan diara sut wan mata daukan ba dukiara witnis kabia. Man nani mampara witnis kum kabia, Gâdkam wal kuninkira nani kama apia dukiara.

²⁸ Ningkara Jasua mita upla kumi bani ai pliska ra blikan wan.

Jasua pruan ba

²⁹ Piua kunhku ningkara, Jasua Nun luhpia Dawan napakanka ba pruan, mani 110 bri kan ba ra.

³⁰ Witin tasbaya iwi kata ra bikan, baha lika Timnat-sérah, pliska ba Efraín ilka nani ra sa, Gaas untika biara wina yahbra tani ra.

³¹ Israel luhpia nani lika Dawan dukia daukan Jasua raya kan piua ra, bara ningkara sin, almuk nani ba kau raya kan piua ra, baha almuk nani sika Israel luhpia nani dukiara Dawan dîa daukata sut kaikan ba.

Israel luhpia nani Josep wîna tara ba Siquem ra bikisa

³² Josep wîna tara ba, Israel luhpia nani Idsip wina bri balata ba, Siquem ra bikan. baha sika Jekob silbar mâ handat mana atkata ba Hamor luhpia nani wina, witin ba Siquem aisika kata, bara baha ningkara tasbaya ba Josep taika nani ba dawanka takan.

Eleazar pruisa

³³ Eleazar Eran luhpia ba pruan ba ra, bikan ai luhpia Finees ilka ra, baha sika Efraín ilka nani ra yabata ba.