Jasua 21 - DAWAN BÎLA AISKA

Libait nani tawanka nani

^1-2 Libait daknika wihtka tara nani ba Siló ra wan, Kenan tasbaya ra prîs Eleazar ba wal aisaia, Jasua wal bara Israel wihtka tâ upla taika nani wal sin. Bahara witin nani ra wisata: “Moses bâk Dawan ba lâ yan, wan tawanka nani wankbia anira iwaia ba, baku sîp nani pakaia bara bîp nani sahwaia sin.”

³ Bara Israel luhpia nani bui Libait nani ra ai tasbaya yaban, tawanka nani kum kum ba sîp sahwaia, dîa Dawan win ba kat daukan.

⁴ Pas witin nani lat lulkan ba, Libait masraka Quehat uplika nani ra bal takan bara yan. Quehat masraka nani prîs Eran kiamka nani ba 13 tawan brin, naha ba Juda kiamka wina bal takan, Simian bara Benjamín wina sin.

⁵ Quehat uplika wala nani ra tawan matawalsip yan, baha nani ba Efraín bara Dan kiamka, baku sin Manasés kiamka bakriki ra sin.

⁶ Naha ningkara, Libai masraka Guersón wina bal takata ba ra lika 13 tawan nani yan, witin nani ba lika Isacar, Aser, Neftalí bara Manasés kiamka bakriki ra Basán ra iwi kata ba sin.

⁷ Libait masraka Merarí wina balata ba tawan nani 12 brin, naha nani lika Ruben, Gad, Zabulón kiamka kata.

⁸ Israel luhpia Libait daknika tilara yuan ba, tawan tara bara sîp main kaikaia pliska nani, Dawan bui Moses ra smalki win ba kat daukan.

⁹ Naha tawanka nani nina mâkan ba sika Juda bara Simian kiamka ra yan.

¹⁰ Bara Libait masraka Quehat wina kata ba, witin nani sika Eran uplika wina bal takan ba, witin nani ra pas lat ba bal takan.

¹¹ Il pliska nani ba lika Juda uplika nani ra yan Quiriat-arbá ba, wiaia kaka Hebrón ba. Anac upla tara kiamka ba, tawan tara nani ba yan, bahara sîp main kaikaia pliska ba.

¹² Sakuna tawan sirpi bara tara tasbaya ba lika Caleb Jefuné luhpia ba ra yan.

¹³ Hebrón ba purkara, baha lika yukuwaika pliska kata ba, bâra upla kum mita upla wala ra ikan kaka yukuwaika, baha lika prîs Eran kiamka ra yan, baha ba naha tawanka nani kata: Libná,

¹⁴ Jatir, Estemoa,

¹⁵ Holón, Debir,

¹⁶ Ain, Jutá bara Bet-semes. Naha tawanka 9 ba kulki yan, sîp main kaikaia pliska kan baha sin yan.

¹⁷ Bara Benjamín kiamka lika Gabaón, Gueba,

¹⁸ Anatot bara Almón yaban, wibia kaka tawan walhwal ba, twi langni pain sîp main kaikaia pliska bri ba kira,

¹⁹ bamna baku prîs nani Eran kiamka ra tawan 13 yan, pliska kumi bani ba twi langni pain bara sîp main kaikaia sât pliska.

²⁰ Libait masraka Quehat wina balan ba, Efraín kiamka tasbaya ba yan.

²¹ Efraín ilka nani ra Siquem ba yan, yukuwaika pliska baku, upla kum ikbia kaka wih yukuwaia, baha purkara Guézer.

²² Quibsaim bara Bet-horón, wibia kaka tawan walhwal, twiya langni pain sîp main kaikaia pliska sin baha wal yan.

²³ Dan kiamka wina lika bri banhwan Eltequé, Guibetón,

²⁴ Aialón bara Gat-rimón, wibia kaka tawan walhwal twi langni pain sîp main kaikaia ba sin yan.

²⁵ Bara Manasés kiamka bakriki ba tawan tara wâl brin, Taanac bara Gat-rimón, twi langnika pain sîp main kaikaia dukia ba kira.

²⁶ Baku Quehat masraka ba tawan sut ba ra matawalsip brin, twi langnika pain nani sin sîp main kaikaia dukiara.

²⁷ Libait kiamka wala Guersón luhpia nani ba baha nani ra sin tawan wâl yan, baha nana lika Manasés kiamka bakriki wina ba: Golán, Basán ra kata ba, yukuwaika pliska baku briaia dukiara, bara Beesterá sin.

²⁸ Isacar kiamka wina Quisión bara Daberat sin yan,

²⁹ baku sin Jarmut bara En-ganim, wibia kaka tawan walhwal bara twi langni pain ba sîp main kaikaia dukiara sin.

³⁰ Aser kiamka wina Misael bara Abdón yaban,

³¹ baku sin Helcat bara Rehob, wibia kaka tawan walhwal, langni pain sîp main kaikaia tasbaya ba kira.

³² Neftalí kiamka wina tawan yumhpa yan, twi langni pain ba sin sîp main kaikaia pliska baku briaia: Quedes, Galili ra kan ba, yukuwaia pliska baku yus munaia dukiara, Hamot-dor bara Cartán.

³³ Baku bamna, Guersón masrika ra tawan yan sut pali ba 13, kumi bani twi langnika pain ra, sîp main kaikaia tasba ba sin pain kata.

³⁴ Libait masraka nani ra kau ban takaskan ba ra, wibia kaka Merarí kiamka nani ba, yabi banhwan Zabulón kiamka wina: Jocneam, Cartá,

³⁵ Dimna bara Nahalal, wibia kaka tawan walhwal bara twi langni ba sîp main kaikaia pliska nani ba sin.

³⁶ Ruben kiamka wina yan ba Béser, Jahas,

³⁷ Cademot bara Mefáat, wibia kaka tawan walhwal twiya langni pain ba, sîp main kaikaia pliska ba sin.

³⁸ Gad kiamka wina lika Ramot Galaad ra ba yan, bahara ai yukuwaika pliska bribia dukiara, Mahanaim.

³⁹ Hesbón, bara Jazer, wibia kaka tawan walhwal bara ai twiya langni ba sin sîp main kaikaia pliska pain ba brin.

⁴⁰ Bamna Libait masraka kau takaskan ra yan kan tasba kau bâra kan ba, wibia kaka, Merarí kiamka nani ra, bara asla sut 12 tawan yan kata.

⁴¹ Israel tasbaya ra Libait tawanka nani sut bâra kan ba 48 kata, kumi bani twi langnika kira sîp main kaikaia pliska pain bri kan,

⁴² bara tawanka nani kumi bani ba kutbi kir bri kan. Bara naha tawanka nani kumi bani ra sim baku kata.

Dawan ba kasak sa

⁴³ Baku sika Dawan mita Israel luhpia nani ra tasba sut yan ba, ai damika nani ra swer daukan ba kat, bara witin nani bahara takaski iwan.

⁴⁴ Dawan ba ai pramiska kat daukan bara tasbaya iwi kan ba sut ra kupia kumi lâka yan. Ai waihla nani bui mapara sip unsabras kan, Dawan mita baha nani ra pura luaia yan bamna.

⁴⁵ Dawan bui Israel luhpia nani ra pramis painkira nani daukan ba wina, bîla kumi sin aimakras lika apia kata.