Jasua 20 - DAWAN BÎLA AISKA

Israel luhpia nani yukuwaika tawanka nani marikisa

¹ Dawan Jasua ra aisan bara win:

² “Israel luhpia nani wal aisas bara wis, tawan uplika yukuwaika pliska kum sakaia, yang Moses wal aisi wîri ba baku daukaia.

³ Upla kum ai walka ra ai dahra walras ikbia kaka, lukan saura âpu ni, sip sa plapaia baha pruan taika kau lamara ba mita baha tawanka kum ra yukuwaia.

⁴ Baha uplika swakwaia pliki ba, baha pliska nani kum ra wabia tawan dimaika kat, bara tawan almukka nani mawanra ai dahra param saki wibia. Bara witin nani ra yaka dimbia, bara plis kum yabia bahara iwaia.

⁵ Pruan ba taika kau ai lamara ba mita uplika ba ikaia nina blikisa kaka, baha yukuwaia tawanka almukka nani ba mita mihta ra mangkbia apia, witin nani kaikisa ikan uplika ba pâtkas sa kaka, misbara kaikras ikan kaka.

⁶ Bara yukuwi uplika ba yukuwaia tawanka ra ban bâra kaia sa, upla sut mawanra ai lâka daukbia kat. Bara ban bâra kabia prîs tara, baha yua nani wark dauki kata ba prubia ba kat. Baha ningkara witin kli ai pliska ra wabia.”

⁷ Bara Israel luhpia nani yukuwaika pliska nani bâk saki brin ba, Quedes, Galili ra, Neftalí ilka nani ra, Siquem ba Efraín ilka nani ra, bara Quiriat-arbá, tawanka na nina Hebrón mâki kata, Juda ilka nani ra.

⁸ Jordan baila wala wina, Jeriko lalma tani ra upla iwras tasbaya ra, Béser ba pliki saki brin, Ruben kiamka wina; Galaad tasba ra Ramot ba wahbi sakan, baha lika Gad kiamka dukia; bara Basán tasbaya ra Golán ba wahbi sakan, baha lika Manasés kiamka dukia.

⁹ Naha tawanka nani ra sika Israel luhpia nani sut, tringsar nani sin baha nani tilara iwi banhwi ba yukuwaika pliska daukan sa. Ya ya kabia, ai dara walras upla kum ikbia kaka, witin baha tawanka ra yukuwaia sip kabia. Baku natka ra pruan ba taika, apia kaka aslika nani bal pana muni, witin ba ikbia apia, tawan ba mita witin lâka ba kau daukras ba kainara.