Jasua 15 - DAWAN BÎLA AISKA

Juda tasbaya pîska

¹ Juda masraka kiamka luhpia nani ra tasba yan ba, Edom piarkika wina waupasa tani upla iwras tasbaya kat.

² Baha baila wala tani ba Juda luhpia nani brin, upla bri ba kulkanka ba kat, tani wala ra waupasa Kabu Pruan kat,

³ ningkara impaki kata waupasa tani ra Acrabim ilka bâk, Sin ra upla iwras tasbaya bara Cadés-barnea waupasa tani bâk lui; baha ningkara ban Hesrón kat wi kan, Adar kat uli bara Carcá bâk plapi tawi kan,

⁴ baha wina kli taki wan Asmón kat, Idsip tingnika ra taki muni Mediterráneo kabuka kat takaski kan. Naha na waupasa tani piarkika kata.

⁵ Lalma tani ra, piarkika ba Kabu Pruan kata, Jordan plapi kilwi taki ba kat. Baha wina baiwi takan yahbra tani piarkika ba,

⁶ Bet-hoglá bâk uli wi, yahbra ba Bet-arabá ra luata, bara baha wina Bohan-Ben-rubén Walpaya ba kat;

⁷ ningkara Acor ilka biara bâk uli wata, Debir ra bara Guilgal tani bâk tawi balata Adumim mawanra, tingnika ba waupasa tani ra; baha ningkara piarkika ba En-semes ra tingni bâra bâk lui, En-roguel kat wi kata.

⁸ Baku ba ra Ben-hinom ilka bîla biara bâk luata, muna ra lika Jebús il tnaya witnika bâk, wiaia kaka, Jerusalem. Ningkara Hinom ilka bahna bâk uli wata, waupasa tani ba, bara Refaim ilka biara ra.

⁹ Kli tawi balata, ilka ba wina, Neftóah laya kârma aubi ba kat. Ningkara Efrón tawanka nani ilka kat wan; ba wina Baalá bâk lui kata, baha sin Quiriat-jearim mâkisa.

¹⁰ Baalá wina baila wala bâk tawi balata muna tani ra Seír ilka kat, bara Quesalón bâk luata, Jearim il yahbra tani tnaya ra. Ningkara Bet-semes kat bal iwaia dukiara bara Timná bâk luan.

¹¹ Baha wina Ecrón ilka witnika nani bâk lui Sicrón ra tawi wan ban Baalá ilka bâk lui Jabneel ra wan, bara baha wina ban Mediterráneo kabuka kat takaskan.

¹² Bara lâs kulkan ba, Mediterráneo kabuka baila wala muna tani ba. Baha tasbaya ba sika Juda kiamka nani ai tasbaya brin, bara baha tasbaya ba witin nani ai tilara yui brin.

Caleb bui Hebrón bara Debir aiklabi pura luisa

¹³ Jasua Caleb Jefuné luhpia, Juda kiamka nani ba tasba tar baiki yaban. Dawan dîa witin ra win ba kat, Hebrón ba yaban, baha lika Anac waitna tarka tara masraka nani tawanka kau tara ba.

¹⁴ Caleb baha tawanka wina Anac kiamka nani yumhpa ra kangbi sakan, baha nani nina mâki kan Sesai, Ahimán bara Talmai.

¹⁵ Ningkara Debir ra iwi banhwi kata mapara wan, tâura tawanka ba nina Quiriat-séfer mâki kata ba.

¹⁶ Bara witin win: “Ya aiklabi bara naha tawanka tara na pura lubia kaka, yang luhpi mairin Acsa ba yabamna ai maya bribia.”

¹⁷ Tawanka pura luan ba lika Otoniel luhpia diwra, Quenaz luhpia ba, bara Caleb bui ai luhpia mairin Acsa witin wal maya baikan.

¹⁸ Witin nani utla wina taki auya kata bara Otoniel Acsa ra aisi kan ai aisa ra makabia witin ra insla daukaia tasbaya yabia, bara Acsa âu win. Bamna witin biriku wina iwan, bara Caleb ra makabi walan: —¿Dîa brin mai daukisa?

¹⁹ —Diara kum mamkabi walan ai daukisa —witin baku pana aisi win—. Man pat tasba aikram Négueb upla iwras tasbaya ba; bamna lî kârma plapi nani ba sin aik. Bara witin ra lî kârma yan, aubi ba pura wina bara tasba wina sin.

Juda kiamka tawanka nani ba

²⁰ Naha sika Juda kiamka nani ra tasba kulki kaiki yan kan ba, dîa upla ba kulkanka kat.

²¹ Tawanka nani yan kan ba lika, waupasa tani tasbaya nani ba, Edom piarkika tani ra, baha nani ba naha nani kata: Cabseel, Éder, Jagur,

²² Quiná, Dimoná, Adadá,

²³ Quedes, Hasor, Itnán,

²⁴ Zif, Télem, Bealot,

²⁵ Hasor-hadatá, Queriot, Hesrón (nina wala Hasor mâki kan ba),

²⁶ Amam, Semá, Moladá,

²⁷ Hasar-gadá, Hesmón, Bet-pélet,

²⁸ Hasar-sual, Beerseba, ai tawanka sirpi nani kira,

²⁹ Baalá, Iim, Ésem,

³⁰ Eltolad, Quesil, Hormá,

³¹ Siclag, Madmaná, Sansaná,

³² Lebaot, Silhim bara En-rimón. Tawanka tara bara sirpi nani asla prakan ba 29 tawan nani kata.

³³ Twi tasbaya langnika nani wina naha nani yabata: Estaol, Sorá, Asná,

³⁴ Zánoah, En-ganim, Tapúah, Enam,

³⁵ Jarmut, Adulam, Socó, Azecá,

³⁶ Saaraim, Aditaim, Guederá bara Guederotaim, wibia kaka tawanka tara bara sirpi sut ba 14 kata.

³⁷ Tawanka tara nani Senán wina ba, Hadasá, Migdal-gad,

³⁸ Dileán, Mispá, Jocteel,

³⁹ Laquis, Boscat, Eglón,

⁴⁰ Cabón, Lahmam, Quitlís,

⁴¹ Guederot, Bet-dagón, Naamá bara Maquedá, wibia kaka tawanka tara bara sirpi asla prakan ba 16 kata.

⁴² Libná tawanka, Éter, Asán,

⁴³ Iftah, Asná, Nesib,

⁴⁴ Queilá, Aczib bara Maresá, wibia kaka tawanka tara bara sirpi nani ba sut asla 9.

⁴⁵ Ecrón tawanka ba bara tawanka sirpi nani ba sut,

⁴⁶ bara Ecrón wina kabu tani ra Asdod tawanka lamara, ai tasbaya pîska nani ba kira.

⁴⁷ Asdod tawanka tara bara tawan sirpi nani ba sut, bara Gaza tawanka tara ai tawanka sirpi nani kira, Idsip tingnika kat bara Mediterráneo kabuka piarkika nani kat.

⁴⁸ Il tasbaya nani Juda brin ba, naha nani tawanka kata: Samir, Jatir, Socó,

⁴⁹ Daná, Quiriat-saná (nina wala Debir mâki kan ba),

⁵⁰ Anab, Estemoa, Anim,

⁵¹ Gosen, Holón bara Guiló, wibia kaka tawan tara 11 ai tawanka sirpi nani kira.

⁵² Arab tawanka tara ba, Dumá, Esán,

⁵³ Janum, Bet-tapúah, Afecá,

⁵⁴ Humtá, Quiriat-arbá (nina wala Hebrón mâkisa), bara Sior, wibia kaka tawan tara 9 ai tawanka sirpi nani kira.

⁵⁵ Maón tawanka tara ba, Carmel, Zif, Jutá,

⁵⁶ Jezreel, Jocdeam, Zánoah,

⁵⁷ Ken, Guibeá bara Timná, wibia kaka tawan tara matawalsip ai tawanka sirpi nani kira.

⁵⁸ Halhul tawanka tara ba, Bet-sur, Guedor,

⁵⁹ Maarat, Bet-anot bara Eltecón, wibia kaka tawan tara 6 ai tawanka sirpi nani kira.

⁶⁰ Quiriat-baal tawanka, nina wala Quiriat-jearim mâki ba, bara Rabá, ai tawanka sirpi nani kira.

⁶¹ Upla iwras tasbaya ra brin ba Bet-arabá tawanka, Midín, Secacá.

⁶² Nibsán, Sâl Tawanka Tara ba, bara En-gadi, wibia kaka tawan tara 6 ai tawanka sirpi nani kira.

⁶³ Juda kiamka nani ba mita sip Jerusalem wina sakras Jebús uplika nani ra bâra iwi kata ba, bamna baha tâka mita naiwa kat kau ban iwisa Jebús uplika nani ba Jerusalem ra Juda kiamka nani aikuki.