Jasua 11 - DAWAN BÎLA AISKA

Jasua mita Jabín ra bara uplika nani ra sin sauhki tikan ba

¹ Jabín, Hasor ra kingka ba baha sturi ba sut walan, bara witin king wala nani ba aikuki lâ daukaia luki upla blikan: Jobab Madón ra king ba, Simrón, Acsaf ra king ba,

² bara yahbra tasbaya ra il nani tilara king wala nani iwi ba ra sin, baku sin Jordan langnika ra Quinéret lakunka waupasa tani ra king nani iwi ba ra sin, bara baku sin muna tani ra Dor ra waia piarkika ra iwi kingka nani ba ra sin,

³ ban Kenan uplika nani lalma tani ra bara muna tani ra tawanka nani ra, amorreo nani, hitita nani, ferezeo nani, Jebús uplika nani il nani tasbaya ra iwi ba, heveo nani, Hermón ilka ra, Mispá tasbaya aiska ra king nani sut bâra iwi nani ba ra baha nani wal ai bîla blikan.

⁴ Naha kingka nani sut taki balan, ai aiklaklabra nani sut sin, ai araska nani bara wagin nani, upla sip kulki sakras, kabu auhika mâ kabu un ra ba baku kata.

⁵ Naha kingka nani sut asla takan, bara Merom awala ra ai kiampka sut dauki asla bâra takaskan, Israel luhpia nani mapara aiklabaia dukiara.

⁶ Sakuna Dawan Jasua ra win: “Witin nani ra sîa yapara, kan yauhka sim naha awarka witin sut mihtam ra mangkamni ikaia, bara man bui araska mina nani sut krikma, aiklabaia waginka nani sut pauta ni angkma.”

⁷ Jasua ai aiklaklabra aikuki Merom awala ra bal, dahra walras kan aiklabi pura luan.

⁸ Bara Dawan ba Israel luhpia nani mihta ra yan pura luaia, baku ban rausauhki pura lui Sidón bara Misrefot-maim tawanka tara ba kat wan, bara lalma tani Mispá twiya kat upla kumi sin raya swiras kata.

⁹ Jasua dîa Dawan win ba kat daukan, ai waihla araska mina nani sut kriki tikan, bara aiklabaia waginka nani sut angkan.

¹⁰ Bara tawi balan ningkara Hasor tawanka brin, baha pali kat sika baha nani ai lâka daukata ba, bara kingka kata ba ikan,

¹¹ bara baha nani sut bahara iwi kata. Sut pali sauhki tikan, bara tawanka ba sut angki tikan.

¹² Bara baku sin tawan wala nani sut sauhkan, kingka nani asla taki ai lâka nani daukata nani sin sut alkan, bara kingka nani sut ikan. Bara sut sauhki tikan, Dawan napakanka Moses bui win kata ba baku.

¹³ Ban sakuna, Israel luhpia nani ba tawan nani il purara kan ba, kumi sin angkras, Hasor baman angkan.

¹⁴ Baha tawanka ra iwi kan ba sut sord napa malika ra pruan, upla kumi sin swakras, daiwra nani bara diara sut bâra kan ba brin.

Jasua dîa Moses win ba sut daukan

¹⁵ Dawan bui Moses ra ai adarka yan, bara Moses mita Jasua ra yan, baha adarka nani kumi sin yan luras kata.

¹⁶ Baha tasba pîska ra iwi kan nani ba sut, Jasua mita pura luan, wibia kaka, il, unta tasbaya nani ba, Négueb sut, Gosen tasbaya nani sut, Jordan twiya ilka bîla, Israel ilka langnika nani sut.

¹⁷ Halac ilka wina, Seír tani ra bûi ba, ban Baal-gad kat, Líbano langni ba, Hermón ilka playa ra ba sut brin bara ikan, kingka nani bâra kan ba,

¹⁸ aima ailal ra Jasua naha kingka nani wal war aiklaban ningkara.

¹⁹ Tawan kumi baman Israel luhpia nani wal ai lâka daukan ba lika, heveo nani Gabaón wina. Sakuna wala nani sut lika, ai karnika ni brin,

²⁰ kan Dawan mita ai waihla nani ba kupia karna daukan, Israel luhpia nani mapara buaia, baku ba ra, Israel luhpia nani mita sut sauhki tikaia, umpira kaikan luha, Moses ra Dawan mita adar yabata ba baku.

²¹ Baku sin baha yua nani ra, Jasua pura lui sut sauhki tikan, Anac uplika nani tawanka nani Hebrón ilka ra iwi kata ba, Debir ra, Anab ra bara Juda wihki Israel ilka nani ra sut,

²² bara baku Anac upla tara kiamka kumi sin raya swiras, Israel tasba piarkika ra iwi kan nani ba. Anac kiamka tara Gaza ra, Gat bara Asdod ra iwi kan nani baman takaskan.

²³ Baku bamna, Jasua tasba ba pura luan, dîa Dawan bui Moses ra win ba kat. Ningkara Israel kiamka nani tilara tasba ba pîs ra baiki yan, ai tasbaya prapatika baku. Baha ningkara kupia kumi lâka bâra kan, baha tasbaya ra war âpu kan.