Jasua 10 - DAWAN BÎLA AISKA

Israel uplika mita amorreo nani ra pura luan

^1-2 Jerusalem kingka Adonisédec ba walan, Jasua Ai tawanka sauhki tiki ai mihta ra brin, bara sin Jeriko kingka ra dîa daukata ba baku Ai king ba ra sin daukan, bara Gabaón uplika nani ba lika kupia kumi daukan Israel luhpia nani aikuki, bara nanara lika witin nani tilara aikuki iwi kata. Naha walan ba ra sibrin daukata, kan Gabaón ba tawan tara kum kata, Ai ba wal kau tara, ai kingka lâka sin bara uplika nani ba kupia karnira kan.

³ Naha tâka mita Adonisédec bui king Hoham, Hebrón kingka ba ra, Piram, Jarmut kingka ba ra, Jafía, Laquis kingka ba ra, baku sin Debir, Eglón kingka ba ra ai bîla bliki naku win:

⁴ “Man nani nâra uli bal hilp wan muns Gabaón mapara aiklabaia, kan witin nani ba Jasua wal lâ kum daukan kupia kumi kaia bara Israel luhpia nani wal sin.”

⁵ Bara amorreo kingka nani matsip ba, wibia kaka Jerusalem king nani ba, Hebrón, Jarmut, Laquis bara Eglón, aikuki asla takan bara ai aiklaklabra sut asla taki wan Gabaón mapara aiklabaia.

⁶ Bara baku sin Gabaón ra iwi kan nani ba mita Jasua ra ai bîla bliki win, witin lika Guilgal kiamp ra kan ba: “Dukiam dadaukra nani ra man nani bui hilp wan munaia apia lika wipara. Pat muni bal hilp wan muns, wan tâ baiki hilp wan muns, kan amorreo kingka nani sut unta ra banhwi ba asla takan sa wan mapara aiklabaia.”

⁷ Bara Jasua Guilgal wina aiklaklabra kupia karnira sut aikuki taki wan,

⁸ bara Dawan Jasua ra win: “Witin nani ra si bripara, kan yang bui witin nani ba mihtam ra mangkamni, bara witin nani kumi sin mampara buaia karnika âpu kabia.”

⁹ Jasua baha tihmika Guilgal wina taki wan kau lamara, bara ai dara walras kan taim amorreo nani mapara aiklaban.

¹⁰ Dawan mita witin nani kupia ra sibrin dingkan, Israel sîa briaia baku, bara Jasua Gabaón uplika ailal ra ikan. Ningkara Bet-horón yabalka ra nina bliki iki sauhki tikan, ban nina bliki ikan amorreo nani ra Azecá bara Maquedá kat.

¹¹ Amorreo nani ba Bet-horón ra plapi auya kan taim, Israel luhpia nani sîa plapi kan ba ra, Dawan ba witin nani purara ais klaswan baku yakaban, bara amorreo nani kau ailal pruan Israel luhpia nani sordka ra pruan ba wal.

¹² Dawan mita amorreo nani ba Israel luhpia nani mihta ra mangkan ba ra, Jasua upla nani mawanra bûi Dawan ra aisi, naku win: “Yu lapta, Gabaón purara takaski bâra bas; kati, Aialón langnika purara takaski bâra bas.”

¹³ Bamna lapta bara kati ba sin takaskan, upla nani ba ai waihla nani sut pura luan ba kat. Naha na Upla Kasakkira Wauhkataya ra ulban kata. Yu lapta ba kasbrika purara ba lilapas ra takaskan, bara ban yu aiska bâra kan.

¹⁴ Kainara bara ningkara sin baha yua baku âpu kata, Dawan upla kumi bîla baikra walan ba, kan Dawan ba Israel tâwan aiklabi kata.

¹⁵ Ningkara Jasua bara Israel luhpia nani aikuki ai kiampka Guilgal ra tawi balan.

¹⁶ Bara kingka nani matsip ba plapi wih, Maquedá walpaya untika ra yukuwan.

¹⁷ Bara kingka matsip Maquedá walpaya unta ra yukuwi kan pliki sakan, bara baku Jasua ra win.

¹⁸ Bara Jasua naha adarka yaban: “Walpa tara nani karbi bri si dimaia untika ba ra praks, bara dimaia pliska ra waitna nani swi banhs aihwaki kaia dukiara.

¹⁹ Bara sim piua ra, man nani lika mai takaskbiara. Waihla ninara was bara nina tani wina aiklabi banhs. Kli yarka ai tawanka nani ra tawi wabiara, kan Dawan man nani Gâdkam ba bui mihtam ra mangkan sa.”

²⁰ Jasua bara Israel luhpia nani bui amorreo nani sut sauhki tikan ningkara, witin nani manis iki tiki, bara kau amorreo nani raya kan ba lika plapi ai tawanka ra diman.

²¹ Sakuna Israel luhpia nani ba pain, wîna ra diara takras ai kiampka Maquedá ra tawi balan Jasua bâra kata pliska ra. Bara upla kumi sin Israel luhpia nani mapara diara aihka aisaras kan.

²² Bara Jasua bila win: “Walpaya untika ra dimaika prakan ba bukuts, bara kingka nani matsip ba sâks.”

²³ Bara baku daukan, Israel luhpia nani ba Jerusalem kingka matsip tasbaya untika ba wina sakan: Hebrón, Jarmut, Laquis bara Eglón kingka sin.

²⁴ Jasua mawanra bri balan ba ra, witin bui Israel luhpia nani ba sut paiwan, bara win suldiar wihtka wal bâra kan nani ra: “Lamara was bara minam nani ba naha kingka nani nana ra mangks.” Bara witin nani baku daukan.

²⁵ Bara Jasua baha nani ra win: “Man nani si bripara, sirang sin iwpara, sakuna kupiam karna bas, karna sin bûi bas, kan Dawan naku sin daukbia man nani waihlam nani ba wal.”

²⁶ Ningkara Jasua bui king nani ba ikan, bara blikan kumi bani ba dus kum ra pami swiaia bara baku swin ban yu diman ba kat.

²⁷ Bara baku yu lapta ba tutni taki ban ba ra, Jasua upla blikan dus ra paman ba wina alahbaia, bara kli sin tasba untika ra yukuwata ba ra dingki swin. Ningkara walpa nani wal dimaika kata prakan, bara naiwa kat kau ban bâra sa.

Pura luanka wala nani

²⁸ Baha sim yua, Jasua Maquedá tasbaya brin bara sut sauhki tikan, tawanka ra iwi kan nani sut ba sord napa malika ra ikan. Bara upla bani sin raya swiras, Maquedá kingka ra daukan, sim Jeriko ra daukan ba baku.

²⁹ Ningkara Maquedá wina Jasua bara Israel luhpia nani sut aikuki wan Libná tawanka ra, bara aiklabi pura luan.

³⁰ Dawan ba baha tawanka ba bara kingka ba sin ai mihta ra mangkan, diara nani bâra kan ba âpu daukan, upla rayaka sin sut, Libná kingka ra bara Jeriko kingka ra munan ba baku munan.

³¹ Bara Jasua Israel luhpia nani sut aikuki Libná wina Laquis ra wan, bahara mapara aiklabi pura luan.

³² Yua wâl ra, Dawan ba Laquis Israel luhpia nani mihta ra mangkan, bara Libná kata baku, Israel luhpia nani mita sord ni uplika nani sut ikan, daiwra nani sut sin.

³³ Horam, Guézer kingka ba, bal takan aiklaklabra nani ba wal Laquis tâ baikaia dukiara, sakuna Jasua mita sut sauhki tikan, bara upla kumi sin raya swiras kan.

³⁴ Laquis wina, Jasua bara Israel luhpia nani aikuki Eglón tawanka ra luan, bara ai kiampka lamara takaski bara mapara wih aiklaban.

³⁵ Baha sim yua dakbi brin, bara ailal ikan bahara iwi kan nani ba sut, tawanka aiska ba sut sauhki tikan, Laquis ra daukata ba baku.

³⁶ Eglón wina, Israel sut aikuki Hebrón ra wan bara aiklabi pura luan.

³⁷ Tawan ba brin ba ra, aiska pali sauhki tikan, bara sord malka ni ikan king ra, upla nani bara daiwan nani baha tawanka lamara nani kata ba sin sut, Eglón ra daukata ba baku daukan.

³⁸ Baha wina, Jasua bara Israel luhpia nani kira Debir tawanka tani ra wan, bara mapara aiklaban.

³⁹ King ba ikan sord malka ba wal, bara uplika nani sin sut, tawanka lamara kan nani ba sin, Debir tawanka uplika kumi sin raya swiras, sut âpu daukan. Bamna Hebrón ra daukata baku, bara Libná king nani wal sin baku daukan.

⁴⁰ Baku bamna, Jasua tasbaya pîs ra iwi kan nani ba sut pura luan, unta biara ra iwi kan kingka nani sut sin sauhki tikan, Négueb wina langni nani ra kan ba, bara il tnaya witni nani ra kan ba, sut sauhki tikan, sut sin iki tikan. Diara kumi sin takaskras, upla bani sin raya swiras kan, Israel Gâdka dîa win ba kat daukan.

^41-42 Bara Jasua Cadés-barnea wina Gaza kat sauhki tikan, bara Gosen tasbaya wina Gabaón kat. Naha kingka nani ai tasbaya nani sin, Jasua sut dauki brin, kan Dawan Israel Gâdka, witin nani tâwan aiklabata bamna.

⁴³ Ningkara Jasua Guilgal kiampka ra tawi balan Israel luhpia nani sut aikuki.