Jasua 1 - DAWAN BÎLA AISKA

Dawan bui Jasua ra paiwan ba

¹ Dawan napakanka Moses ba pruan ningkara, Nun luhpia waitna Jasua ba Moses hilpika aimaki kan ba, Dawan bui witin ra aisin, bara naku win:

² “Naipakan Moses ba pruan, bamna nanara Israel luhpia nani ba man tâ bri Jordan awala baila wala ra bri si lukaia sma, yang bui man nani ra tasba maikisna ba tasbaya nani ra.

³ Moses ra pramis munri baku, man nani minam anira taima ba tasbaya sut maikamni.

⁴ Man nani tasbayam ba maikamna, upla iwras tasbaya ba wina ban Líbano ilka nani bâk, awala tara Éufrates kat, hitita nani tasbaya ba sut, bara ban Mediterráneo kabuka ba kat.

⁵ Rayakam yua nani sut ra upla kumi sin man nani wal aiklabi, puram lui mai batakbia apia; yang lika man nani wal kamna, Moses wal kapri ba baku, lamamra ban kamna bara lulki mai swimna apia ban kaia ra.

⁶ Kupiam karna bri bapi bûi bas, naha uplika nani tasbaya ba man kulki kaiki kiamka kumi bani ra dukia yabaia sma bamna, tasbaya ba witin nani prapatika sika, ai damika nani ra yabaia yang pramis munri ba.

⁷ Diara kumi baman yang bui man ra mamkabisna ba man daukaia sma, kupiam karna pali bri bapi bûi kama, naipakan Moses lâ nani daukaia maikan ba sut dauks. Lâka nani daukaia maikan ba, kumi sin daukras swipara; sakuna titikbi dauks, baku man bui diara sut daukisma ba yamni baman takbia.

⁸ Piua bani Dawan lâka bîla wauhkataya ba aisi kaiki bas, kakna bara tihmia bahara dîa daukaia ulban ba dauki kaia dukiara. Baku diara sut daukisma ba yamni baman takbia.

⁹ Yang sika mai blikisna kupiam karna bara bapi bûi kama dukiara. Si bripara, kupiam lukanka sin swapni takbiara, man ani anira wama ba, yang, man Dawankam bara man Gâdkam, man wal kamna.”

Jasua ai waihla nani pura luaia ridi takisa

¹⁰ Bara Jasua mahka diara daukaia adarka nani ba tawanka wihtka nani ra yaban:

¹¹ “Man nani kiamp nani sut ra was bara witin nani ra wis witin nani plun nani kwahki bri balbia bara ridi daukbia. Kan kau yu yumhpa lubia ba ningkara, yawan Jordan awala baila wala ra lui waia ridi takisa, baha tasbaya ba Dawan wan Gâdka ba mita yawan ra wankbia ba briaia, bamna tasbaya ba yawan wan dukia alki briaia sa.”

¹² Jasua bui Ruben bara Gad kiamka nani wal sin aisin bara Manasés kiamka nani bakriki aikuki sin, bara witin nani ra win:

¹³ —Man nani sin luki bas, Dawan napakanka Moses bui man nani ra aisin ba, witin bui man nani ra mai win ba, Dawan man nani Gâdkam ba mita baha tasbaya man nani ra maikbia ba ra, man nani baha tasbaya ra ris bri kama.

¹⁴ Bamna man nani mairin nani, tuktan nani, daiwan nani sut sin Jordan awala, naha tani ra Moses wina maikan ba tasbaya ra swis. Sakuna waitna nani sut, war aiklabaia sip takan ba, war aiklabaia dukia nani ba alki brih, muihkam nani tâura taki was, witin nani ba tâi baikbia,

¹⁵ Dawan mita muihkam nani ra ris briaia pliska kum yabia ba kat, man nani ra maikan ba baku, witin nani sin tasba dawanka nani takbia, Dawan bui witin nani ra yabaia kan ba. Baha ningkara man nani sip kama tasbayam nani ra kli tawi waia awala lalma tani ra, baha ba man nani tasbayam pali brima, Moses Gâd napakanka maikan ba.

¹⁶ Bara witin nani pana witin ra win: —Yang nani ra diara daukaia ai wiram ba, yang nani sut daukamni, anira waia ai blîkma ba yang nani baha ra sin wamna.

¹⁷ Bîlam wali dauki kamna, yang nani bui Moses bîla wali dauki kapri baku. Diara kumi baman brin wan daukisa, mamkabisna Dawan Gâdkam ba man wal kabia, Moses lamara ban kan ba baku.

¹⁸ Man bui diara nani daukaia wima ba, daukaia apia wisi bîlam walras mampara bubia uplika nani ba lika, prubia. Bamna yang nani mamkabisna kupiam karna brih bapi bûi bas.