Jan 8 - DAWAN BÎLA AISKA

¹ Sakuna Jisas lika Oliv Ilka ra wan.

² Bara yu wala titan pali kli tempel ra balan. Upla sut ai lamara balan, bamna witin iwi mahka baha nani ra smalkan.

³ Baku mika Lâ Smasmalkra nani bara parisi nani mita, mairin kum marit lâka sauhki kan ba alki brih balan. Bara mairka ba baha nani bâra kan ba lilapas kat yan buan,

⁴ bara witin nani bui Jisas ra win: —Smasmalkra, naha mairka na lika marit lâka sauhki kan ba minitka ra alkan.

⁵ Bamna Moses lâka lika wan wisa, naha sât uplika na, walpa ni sabi ikaia sa. ¿Bara man dîa wisma baha dukiara?

⁶ Witin nani baku win traika kaikaia dukiara, bara baku sip kabia dahra kwahkaia. Bara Jisas ai lal makupi, tasba ra ai mihta tâ ni ulbi kan.

⁷ Sakuna baha nani mita kli makabi wali kan. Bara Jisas ai lal buki, naku win: —Man nani tilamra ya saurka luha ba, baha mita pas mairin ba ra walpa ni lulki sabia.

⁸ Bamna Jisas kli ai lal makupi, tasba ra ulbi kan.

⁹ Sakuna witin nani naha walan ba ra, kumi kumi taki mahka aidruban, almukka nani ba pas tâura taki wan, ningkara wala nani sut, bara Jisas yakan takaskan kan bara mairin ba sin.

¹⁰ Bara Jisas ai lal buki, witin ra makabi walan: —Mairin, ¿uplika nani kata ba anira sa? ¿Upla kumi sin pât ra mai dingkras ki?

¹¹ Mairin ba bila: —Apia, Dawan, upla kumi sin pât ra ai dingkras. Pana Jisas win: —Bamna yang sin pât ra mai dingkras sni; nanara mahka was, kuna kli saura yapara.]

Jisas, tasba ingnika

¹² Jisas kli upla nani ra aisi, win: —Yang sika upla nani ingnika; ya yang nini bliki ba, raya kaia yabi ingnika ba bri kabia, bara kli sin tihmia ra tauki kabia apia.

¹³ Bara parisi nani win: —Man lika yakan dukiamra witnis aisisma: baha lika bahki.

¹⁴ Jisas pana win: —Yang yakan dukira witnis aisamna kra, kuna dîa aisisna ba lika kasak pali sa, bamna yang kaikisna ani wina balri ba, bara anira sin kli auna ba; sakuna man nani lika kaikras sma ani wina taki balri bara anira sin auna ba.

¹⁵ Man nani lika lâ aisi daukisma naha tasba lâka ba kat. Yang mita upla kumi sin lâka aisi daukras;

¹⁶ sakuna ban kra lâ aisi daukamna kaka, yang lâ daukisna ba lika kasak sa, kan yang yakan lâ aisi daukras sna, sakuna Aisa mita ai blikan ba, yang wal lâ daukisa.

¹⁷ Man nani lâmka ra ulban sa, upla wâl witnis aisabia kaka, baha lika kasak kulkaia sa.

¹⁸ Yang yakan witniski aisisni, bara Aisa ai blikan ba sin, yang witniski aisisa.

¹⁹ Bamna baha nani mita makabi walan: —¿Man aisikam ba anira sa ki? Jisas pana win: —Man nani bui yang ai kakaira apia sma, bara Aisiki sin kakaira apia sma; yang ai kakaira banhwi katma kaka, Aisiki ra sin kakaira kaia kapram.

²⁰ Jisas naha diara nani na aisin, witin kau tempel ra smalki kan ba ra, Gâd ra prisant auhbaia bakska bâra kan pliska ra. Sakuna upla kumi mita sin witin ba alki priskras kata, kan ai piua ba kau aimakras kan.

“Anira yang auna pliska ba ra, man nani sip wama apia”

²¹ Bamna Jisas kli baha nani ra win: —Yang mahka auna, bara man nani ai plikma, sakuna saurkam nani tilara pruma; kan yang auna ba ra man nani sip wama apia.

²² Bara Ju nani win: —¿Dîa witin yakan pruaia lukisa ki, bara baha mita aisisa: ‘Anira auna ba ra man nani sip waras’?

²³ Bamna Jisas mita win: —Man nani lika mâya tani wina sma, sakuna yang lika pura tani wina sni; man nani naha tasba wina sma, kuna yang lika naha tasba wina apia sna.

²⁴ Baha mita sika mai wîri man nani saurkam nani wal ban pruma; man nani kasak luki banhras sma “Yang sika Yang sna” ba, bamna saurkam wal ban pruma.

²⁵ Bamna baha nani mita makabi walan: —¿Man ba ya sma ki? Jisas pana win: —Pas ba, ¿dîa kan yang bui man nani wal aisaia sna?

²⁶ Diara ailal brisni mai wiaia, bara man nani lâmka aisi daukaia sin, sakuna ai blikan ba lika kasak ba aisisa, bamna witinka wina walri ba sika tasba ra aisisna ba.

²⁷ Sakuna baha nani mita sip tânka briras kan, Jisas witin nani ra Aisa dukiara aisi kan ba.

²⁸ Bamna Jisas baha nani ra win: —Man nani mita Upla Luhpia Waitna purara bukma, bâra mika kaikma “Yang sika, Yang sna” ba tânka, bara yang yakan lika daukras, Aisa ai smalkanka ba baman lika aisisni.

²⁹ Kan witinka ai blikan ba yang wal sa. Aisiki mita yang na yakan ai swiras, kan witin kupia lâka ba kat daukisna.

³⁰ Jisas naha diara nani aisin ba ra, upla manis witin ra kasak lukan.

Gâd luhpia nani bara saurka albika nani

³¹ Ju nani kasak luki banhwan ba sut ra Jisas mita win: —Dîa mai wisna ba kat kasak kama kaka, man nani ba kasak yang disaipilki nani kama.

³² Bamna diara kasak tânka ba kaikma; bara kasak tânka ba mita sin pri mai sâkbia.

³³ Baha nani pana win: —Yang nani na lika Ebraham kiamka, bara kau aima kumi sin yang nani upla albika takras; ¿bamna nahki man wisma, yang nani na pri lâka bri kamna?

³⁴ Jisas baha nani ra win: —Kasak pali mai wisni, baha nani saura dauki ba lika saurka lâka albika sa.

³⁵ Alba ba utla ra ban kaia apia sa, sakuna luhpia ba lika utla ra ban kaia sa.

³⁶ Baku bamna, Luhpia mita pri mai sakisa kaka, man nani lika kasak pali pri kama.

³⁷ Yang kaikisna man nani ba Ebraham kiamka, sakuna man nani ai ikaia want sma, kan yang dîa mai wisna ba alki daukras sma.

³⁸ Aisa mita dîa ai marikan ba sika, yang aisisna ba; man nani diara daukisma ba lika Aisikam mai win bamna.

³⁹ Baha nani pana win: —¡Yang nani aisiki ba lika Ebraham! Jisas pana win: —Man nani ba kasak Ebraham luhpia nani katma kaka, dîa witin daukata ba, man nani dauki kaia kapram.

⁴⁰ Gâd mita ai marikan tânka kasak pali ba mai wîri, ban sakuna man nani want sma ai ikaia. ¡Ebraham aima kumi sin baku daukras kata!

⁴¹ Man nani daukisma dîa aisikam daukan ba. Baha nani pana win: —¡Yang nani lika bastar apia; Aisa kumi baman brisna, baha ba Gâd!

⁴² Bamna Jisas pana win: —Gâd ba kasak man nani aisikam kata kaka, latwan ai kaikaia katma, kan yang lika Gâd wina ai blikan nahara sni. Yang yakan balras, sakuna Gâd mita ai blikan.

⁴³ ¿Dîa muni man nani ra diara mai wisna ba sip tânka briras sma? Baha lika man nani mita smalkanki ba walaia want apia sma bamna.

⁴⁴ Man nani aisikam ba lika dibil; man nani ba witin wina atia sma, bamna dîa witin brin dauki ba kat daukisma. Dibil ba tâ pali piua wina upla âikra sa. Aima kumi sin kasakka lâka ra aibapi buras sa. Witin kunin aisi ba ra, ai tânka ba kat aisisa, kan witin lika kuninkira pali sa bara sin kunin aisika sa.

⁴⁵ Yang na diara kasak ba aisisna bamna, man nani sip kasak ai lukras sma.

⁴⁶ ¿Man nani tilam wina ya mita sip sa ki saurka kum brisna kaka, ai marikaia? Bara diara kasak ba aisisna kaka, ¿dîa muni sip kasak ai lukras sma ki?

⁴⁷ Ya Gâd wina sa kaka, Gâd bîla nani ba aman walisa; sakuna man nani na Gâd wina apia sma ba mita, walaia want apia sma.

Ebraham âpu piua wina Kraist bâra sa

⁴⁸ Bamna Ju nani Jisas ra win: —Yang nani aisisna ba lika kasak sa: man ba Sameria uplika kum sma bara pirit saura brisma.

⁴⁹ Jisas baha nani ra win: —Yang pirit saura kumi sin âpu. Diara daukisna ba lika Aisiki mayunaia dukiara, sakuna man nani lika saura ai wisma.

⁵⁰ Yang lika maiyunra ba plikras, sakuna wala kumi lika bâra sa, yang baha maiyunra plikisna, bara baha mita lâ daukisa.

⁵¹ Kasak pali mai wisni, ya yang aisisna ba alki bribia kaka, witin prubia apia ban kabia.

⁵² Bara Ju nani pana win: —Nanara yang nani kasak kaikisna, man lika pirit saura kum brisma. Ebraham bara prapit nani sut pruan, bamna man wisma: ‘Ya yang bîli alki bribia kaka, prubia apia ban kaia ra.’

⁵³ ¿Dîa man na wan aisika Ebraham wal kau tara sma ki? Ebraham bara prapit nani sin pruan. ¿Bamna man na ya sma damra walisma ki?

⁵⁴ Jisas pana win: —Yang yakan maiyunra daukisna kaka, baha maiyunra ba lika bahki sa. Sakuna Aisiki mita maiyunisa, man nani mita witin ra Gâd wisma ba.

⁵⁵ Ban sakuna, man nani bui witin ba kakaira apia sma. Yang lika witin ra kakaira sni; bara witinka ba kaikras wimna kaka, yang sin man nani wal baku kuninkira sna. Sakuna kasak pali mai wisna, witin ba yang kakaira sna, bara ai bîla sin wali daukisni.

⁵⁶ Man nani damikam Ebraham ba, yang ra ai kaikaia kan ba ai kaikan baha mita lilia ni aibanhwan kata.

⁵⁷ Ju nani Jisas ra win: —Man ba kau mani 50 sin alkras sma, ¿bara wisma Ebraham ba kaikram?

⁵⁸ Jisas pana win: —Kasak pali mai wisni, Ebraham kau aisubi takras kan ba wina, yang pat bâra sni.

⁵⁹ Baku mika Ju nani mita walpa wahbi brin, Jisas ra sabaia; sakuna witin yukuwi, tempel wina taki wan.