Jan 6 - DAWAN BÎLA AISKA

Jisas bui upla 5,000 plun dakakan ba

¹ Naha ningkara Jisas Galili lakunka baila wala ra wan, baha sika sim Tiberias lakunka ba.

² Upla ailal ai nina bliki kan, sain aihka nani daukan kaikan ba mita, siknis bri uplika nani ra sin raki kan kaikan bamna.

³ Bamna Jisas il kum purara uli wih, ai disaipilka nani aikuki iwan.

⁴ Insal luan Yua Liliaka Ju nani dauki ba sin pat baila kata.

⁵ Jisas ai nakra buki kaikan, upla ailal pali ai nina bliki aula kan, bamna Pilip ra win: —¿Ani wina yawan plun atkbia naha uplika nani na dakakaia?

⁶ Pilip ba dîa aisabia sapa kaikaia wisi, Jisas baku wisata, kan witin pain nu kan dîa daukaia ba.

⁷ Bamna Pilip pana win: —Lalah mâ handat wâl brit plun atkbia sin, naha uplika sut na baha wina wiria pan sin pibia apia.

⁸ Bamna disaipil wala kumi nina Andru, Saiman Pita muihnika ba bila:

⁹ —Nahara lika tuktan waitna lupia kum, barli mâ britka matsip brisa bara inska sin wâl; sakuna, ¿baha ba dîa sa ki naha upla ailal na mapara?

¹⁰ Bamna Jisas bila: —Witin nani ra wis sut iwbia. Baha pliska ra twi manis pâwi kan, bara upla 5,000 ba iwan.

¹¹ Bara Jisas brit nani ba ai mihta ra brih, Gâd ra tingki wih, bara upla nani iwi kan ba tilara yuan. Inska wâl ba ni sin baku daukan, sut want kan ba praiska kat.

¹² Sut pih ai biara banhki daukan ba ningkara, Jisas ai disaipilka nani ra win: —Yuya nani kau takaskan ba wahbi bris, wiria sin tiwan kaia apia ba mata.

¹³ Wahbi banhwan ba ra, upla nani barli mâ britka matsip pin yuyaka nani ba 12 baskit wahban kata.

¹⁴ Bamna upla nani ba Jisas naha sainka aihka pali daukan kaiki, naku win: —Kasak pali, naha sika prapit tasba ra balaia kan ba.

¹⁵ Sakuna Jisas kaikan baha uplika nani mita witin ba priski bri si king mangkaia kan bamna, witin yakan mahka taki wan, il ba purara.

Jisas lî purara wapisa

¹⁶ Pat tihmia iwan kan ba ra, Jisas disaipilka nani ba lakun ra iwi wan,

¹⁷ bara duri tara kum ra aimaki mahka lakun baila wala ra lui Kapernaum ra auya kan. Pat sin tihmu kan, kuna Jisas lika kau balras kan.

¹⁸ Baku bamna, mahka pâsa karna kum krawan, bara rip nani sin tara buki kan.

¹⁹ Disaipilka nani ba pat 3, apia kaka 4 mail praiska lakun un ba wina tihu ra takan kan ba ra, witin nani kaikan Jisas duri tara ba lamara aula kan, lî pura bâk wapi; bara witin nani sibrin taki banhwan.

²⁰ Sakuna Jisas mita win: —¡Yang sna, man nani si bripara!

²¹ Bamna witin nani wilin pali, Jisas ba duri ra brin, bara witin nani waia kan pliska ra pat pali wan.

Upla nani mita Jisas plikisa

²² Yu wala, upla nani lakun baila wala ra takaskan ba kaikan, disaipil nani brih wan dwarka ba baman bahara kan, bara Jisas lika baha nani wal waras kata.

²³ Ban sakuna, Tiberias wina duri tara wala nani sin balan, Dawan ra tingki win ningkara, witin nani brit pin ba pliska lamara.

²⁴ Baku bamna, upla nani ba kaikan Jisas ai disaipilka nani ba wal bahara âpu kata, bamna witin nani baha dwarka tara nani ba ra aimaki Kapernaum ra wan, Jisas ra pliki.

Jisas ba raya kaia britka

²⁵ Witin nani lakun baila wala ra lui wan ba ra, Jisas wal prawan. Bara witin ra makabi walan: —Smasmalkra, ¿ahkia man nahara balram ki?

²⁶ Jisas pana win: —Kasak pali mai wisna, man nani ai plikisma biamra banhkram ba mita bamna, sain aihka nani tânka briram ba mita lika apia.

²⁷ Wark taki banhpara, baha pata isti aisawi ba dukiara; sakuna wark taki banhs, ban kaia ra pata ba dukiara, rayaka ban kaia lâka yabi ba dukiara sin. Naha pata ba sika Upla Luhpia Waitna bui maikbia, kan Gâd Aisa mita witin ra bâk sakan sa.

²⁸ Bara uplika nani makabi walan: —¿Yang nani dîa daukaia sna ki, Gâd yamni kaiki warkka ba alki brih daukaia?

²⁹ Jisas pana aisi wisata: —Gâd want sa man nani daukma, witin mita blikan uplika ba ra kasak lukma.

³⁰ Bamna baha uplika kli makabi walan: —¿Dîa sainka sip sma ki wan marikaia, bara yang nani baha kaiki, man ra kasak luki banhwamna? ¿Dîa warkka daukisma ki?

³¹ Wan damika nani upla iwras tasbaya ra manâ ba pin, Ulbanka ra wi ba baku: ‘Gâd mita kasbrika purara ba wina baha britka ba yan pi banhwan.’

³² Jisas pana win: —Kasak pali mai wisni: Moses apia sika baha britka kasbrika purara ba wina yan ba, sakuna yang Aisiki sika brit kasakkira kasbrika purara ba wina yabi ba.

³³ Kan Gâd mita yabi britka lika, kasbrika pura ba wina naha tasba ra bal iwan, tasba ra iwi uplika nani ra rayaka yabaia.

³⁴ Bamna upla nani ba bila: —Dawan, piua bani baha britka ba wanki bas.

³⁵ Bara Jisas pana win: —Yang sika raya kaia yabi britka ba. Ya yang ra aula ba kli plun daukbia apia; bara yang ra kasak luki ba, kli sin diran daukbia apia.

³⁶ Kuna pat mai wîri ba baku, man nani ai kaikram, sakuna man nani kasak lukras sma.

³⁷ Diara sut Aisa aiki ba, yang ra aula; baha nani yang ra aula ba, yang sip kangbi sakamna apia pali.

³⁸ Yang kupi lâka kat daukaia wisi kasbrika pura ba wina balras, sakuna witinka ai blikan ba kupia lâka daukaia mika.

³⁹ Naha sika Aisiki ai blikan ba kupia lâka; witin aikan nani ba wina kumi sin tikamna apia, bamna yang tnata piua ra pruan wina kli bukamna.

⁴⁰ Naha sika witinka ai blikan kupia lâka ba: Upla sut mita Gâd Luhpia ra kaiki kasak lukbia, bara baku mika raya ban kaia ba bribia; bara tnata piua ra, yang mita pruan wina kli bukamna.

⁴¹ Naha aisin ba wali, Ju nani Jisas mapara rangbi aisin banhwan, witin naku aisin bamna: “Yang sika kasbrika purara ba britka sna naha tasba ra bal iwri ba.”

⁴² Bara witin nani bila: —¿Naha na Jisas apia ki, Josep luhpia ba? Yawan nani witin aisika bara yaptika wal kakaira sa. ¿Bamna nahki witin kasbrika purara ba wina bal iwan wisa?

⁴³ Bamna Jisas pana win: —Man nani rangbi aisaia lâka ba swis.

⁴⁴ Upla kumi sin yakan yang ra balras, Aisiki ai blikan ba mita brih balbia lika; bara yang tnata piua ra pruan wina bukamna.

⁴⁵ Prapit nani wauhkataya ra naku wisa: ‘Gâd mita upla sut ra smalkbia.’ Baku bamna, Aisa ra wali uplika nani ba, witin ba wina lan taki yang ra aula.

⁴⁶ “Upla kumi sin Aisa ba kaikras, sakuna witinka Gâd blikan ba lika.

⁴⁷ Yang kasak pali mai wisni, ya yang ra kasak luki ba, raya ban kaia lâka ba brisa.

⁴⁸ Yang sika raya ban kaia yabi britka ba.

⁴⁹ Man nani damikam nani lika upla iwras tasbaya ra manâ ba pin, sakuna sut pruan.

⁵⁰ Sakuna yang aisisna na lika kasbrika purara ba wina bal iwi britka ba dukiara, bamna ani uplika baha pibia ba, prubia apia.

⁵¹ Bara yang pali na sika, baha rayaka britka kasbrika purara ba wina bal iwan ba; ya naha britka na pibia kaka, ban kaia ra raya kabia. Baha britka yang mita yabamna ba lika, yang pali wîni tara ba sika. Yang baha yabamna, upla nani sut raya kabia ba dukiara.

⁵² Bamna Ju nani ba mahka pana pana aisi blahwi, naku aisan: —¿Nahki naha waitna ai wîna pali ba piaia wankbia?

⁵³ Jisas pana win: —Kasak, kasak pali mai wisna, man nani Upla Luhpia Waitna wîna tara na piras bara tâlia sin diras sma kaka, raya ban kaia ba briras sma.

⁵⁴ Ya yang wîni tara pîsa bara tâilia sin dîsa kaka, raya ban kaia ba brisa, bamna yang mita tnata piua ra pruan wina bukamna.

⁵⁵ Kan yang wîni tara ba lika plun aihwa sa, bara tâilia ba lika diaia laya aihwa sa.

⁵⁶ Ya yang wîni tara ba pîsa bara tâilia sin dîsa kaka, witin ba yang wal asla iwisa, bara yang sin witin wal asla sna.

⁵⁷ Aisa rayakira ba mita ai blikan, bamna yang na witin ba mita raya sni. Baku sin ya yang wina plun pi ba, yang wina raya kabia.

⁵⁸ Kasbrika purara ba wina bal iwan britka ba dukiara aisisni. Naha britka na damikam nani pali pin ba sâtka apia sa, kan sut prui tiwan. Ani uplika naha britka pibia ba, ban kaia ra raya kabia.

⁵⁹ Jisas naha diara nani na smalkan, Kapernaum Ju nani priaska watla ra asla aidruban kan ba piua ra.

Raya ban kaia bîla nani

⁶⁰ Naha smalkanka walan ba ra, Jisas nina blikan kan ba wina ailal naku win: —Naha aisi na uya karna sa alki briaia; ¿ya sip kabia naha bîla na walaia?

⁶¹ Bamna Jisas kaikan naha dukiara ai disaipilka nani ba rangbi aisi kan, bamna makabi walan: —¿Naha na minam batakisa ki?

⁶² ¿Ban kaka, dîa takbia ni, Upla Luhpia Waitna kli uli auna kaka man nani ai kaikma ba ra?

⁶³ Spirit ba sika raya kaia yabi ba; wan wîna tara ba lika bahki pali sa. Bara diara nani yang mai wîri ba lika kasak pali spirit tânka nani sa, bara raya kaia sin yabisa.

⁶⁴ Sakuna man nani tilamra upla tila nani kau kasak lukras sa. Kan tâ pali wina Jisas lika kaikan, ani uplika nani ba kasak lukras kan, bara ya mita ai waihla nani mihta ra mangkbia ba sin.

⁶⁵ Bamna Jisas bila: —Baha mita sika yang bui man nani ra mai wîri, upla kumi sin yang ra balbia apia, Aisa mita brih balras sa kaka.

⁶⁶ Baha piua wina, upla manis Jisas nina bliki kan ba mahka swin, bara kli sin witin wal taukras kata.

⁶⁷ Bamna Jisas mita disaipil 12 ba ra makabi walan: —¿Man nani sin mahka waia want sma ki?

⁶⁸ Sakuna Saiman Pita mita pana win: —Dawan, ¿yaura yang nani wamna ki? Man bîlam nani ba lika raya ban kaia bîla nani sa.

⁶⁹ Yang nani pat kasak lukri bara sin kaiki banhwisna, man ba Holikira, Gâd wina sma.

⁷⁰ Jisas pana win: —Man nani 12 sma ba, ¿yang bâk saki mai briri apia? Ban sakuna, man nani wina kumi ba dibil kum sa.

⁷¹ Jisas naha aisin na lika, witin aisi kan Judas Iskariot ba dukiara; witinka Saiman luhpia waitna ba. Kan Judas mita sika Jisas ba waihla mihta ra mangkaia kan, witin ba disaipil 12 ba wina kumi kan sakuna.