Jan 5 - DAWAN BÎLA AISKA

Jisas bui Betzatá wina waitnika kum rakisa

¹ Naha ningkara, Ju nani lilia piua tara kum bri kan, bamna Jisas kli Jerusalem ra tawi balan.

² Jerusalem pliska ra, Sîp nani Durka wi ba lamara, lî madakura kumi bâra sa, Hibru bîla ra Betzatá mâki ba, bahara dur matsip nani bâra sa.

³ Bahara upla sikniskira ailal tasba ra aitniki kan: kaikras nani, skahwa nani, bara wîna tara lâwi pruan nani sin. [Bara witin nani sut lika lî aiawanka ba bîla kaiki banhwi kata.

⁴ Kan insal kumi ai piua kat baha lî madakura ra bal iwi munan aiawi kan, bara ani uplika pas lî aiawanka ba ningkara dimuya kaka, dîa dîa sât sikniska bri kan ba sut wina rawi kan.]

⁵ Bahara waitnika kum kan pat mani 38 siknis kata.

⁶ Jisas naha waitnika aitniki kan ba kaikan ba ra, pat sin kaikan nahki piua wihka baku ba, bamna makabi walan: —¿Man sikniskam ba wina rawan mai daukisa ki?

⁷ Sikniskira waitna ba pana win: —Dawan, yang ra hilp ai munaia uplika briras sna, lî klahbi ba piua ra, lî madakura ra ai alki ai dingkaia; ani piua yang dimwaisna ba ra, kainira upla wala pat dimisa.

⁸ Jisas mita win: —Man bus, krikrikam ba twilki was.

⁹ Baha sim piua ra, waitnika ba ai sikniska wina rawan, bara ai yapaika wahbi brih, mahka wapan. Sakuna baha piua ba lika ris yua kan bamna,

¹⁰ Ju nani mita ai sikniska wina rawan waitnika ba ra win: —Naiwa na ris yua sa; bamna lâ apia sa krikrikam ba twilkaia.

¹¹ Waitnika ba mita pana baha nani ra win: —Ai rakan waitnika ba mita ai win: ‘Krikrikam ba buki brih, mahka was.’

¹² Bara witin nani mita makabi walan: —¿Ya pali baku mai win: ‘Krikrikam ba twilki brih was’?

¹³ Sakuna waitnika ba kaikras kata ya mita rakan sapa, kan bahara upla uya ailal kan, bara Jisas sin pat taki wan kan.

¹⁴ Ningkara Jisas baha waitnika wal prawan tempel ra, bara win: —Kaiks, nanara man sikniskam ba wina rawram sa, kuna kli saura yapara, diara kau saura mai takbiara sîa.

¹⁵ Waitnika ba mahka wan, bara Ju nani sut ra maisa pakan, baha ba Jisas kata witin ra rakan ba.

¹⁶ Baha mita Ju nani ba Jisas ra ai waihla saki ikaia want kata, kan naha diara nani na ris yua ra dauki kan bamna.

¹⁷ Sakuna Jisas witin nani ra win: —Yang Aisiki piu sut wark takan, bara yang sin wark takisna.

¹⁸ Naha tâwan, Ju nani Jisas ra mahka ikaia want kan, baha lika ris yua kulkaia lâka baman sauhkras, sakuna witin ai wîna ba Gâd wal baku dauki kan, bara Gâd ba ai Aisika pali sa win bamna.

Gâd Luhpia karnika ba

¹⁹ Bamna Jisas bila baha nani ra win: “Yang kasak pali man nani ra wisna, Gâd Luhpia ba witin yakan diara daukras sa, sakuna Aisa dîa daukan kaikan ba sika, witin daukisa. Diara sut Aisa mita dauki ba, Luhpia sin daukisa.

²⁰ Aisa ba ai Luhpia ra latwan kaikisa bamna, dîa witin dauki ba sut marikisa. Bamna witin ra kau diara tara sin marikbia, bara baku mika tâ iwan pali taki banhma.

²¹ Bamna Aisa mita pruan nani ba buki kli rayaka yabi ba baku, Luhpia mita sin witin yaura raya kaia lâka yan dauki ba yabisa.

²² Aisa mita upla kumi sin lâka aisi daukras sa, sakuna lâ aisi daukaia karnika aiska ba, ai Luhpia ra yan sa.

²³ Baku mika, upla sut mita Aisa ra mayunra yabi ba baku, Luhpia ra sin mayunbia. Ya luhpia ra mayunras ba, Aisa ra sin mayunras sa, witinka bui sika ai Luhpia blikan ba.

²⁴ “Kasak pali mai wisna: Yang aisisna ba ra ya aman walisa, ai blikan ba ra sin kasak lukisa kaka, witin raya ban kaia lâka ba brisa, pât ra sin lulkan kabia apia; kuna pruan wina taki pat raya kaia ra luan sa.

²⁵ Kasak pali mai wisna, piua ba aula, bara baha ba lika nanara pali, pruan nani ba Gâd Luhpia Waitna bîla baikra walbia, bara baha nani bîla wali banhbia ba sut raya takbia.

²⁶ Kan Aisa ba yakan raya ban kaia lâka ba brisa; baku sin witin ai Luhpia ra yan, witin yakan raya ban kaia lâka sin briaia;

²⁷ bara lâ aisi daukaia karnika sin yan, kan witin sika upla takan ba.

²⁸ Naha dukiara man nani aihka lukpara, kan piua ba aimakbia, bara pruan nani sut bîla baikra wali,

²⁹ raiti wina buan kabia. Yamni daukan nani ba buan kabia raya kaia lâka ba briaia; sakuna saura daukan nani ba lika buan kabia, pât tara ra lulkan kabia dukiara.

Jisas karnika bri ba tânka kaikan

³⁰ “Yang yakan diara sip daukras. Aisa mita aikan ba kat daukisna, bamna kasakka lâka kat lâ daukisni; yang brinki ba kat daukaia lika plikras, sakuna Aisa ai blikan ba brinka kat mika.

³¹ Yang yakan dukira witnis aimakisna kaka, aisisna ba dukiara raitki ba âpu sa.

³² Sakuna wala kumi bâra sa yang witniski; bamna pain kaikisni witin, yang dukira kasak aisi ba tânka bâra sa.

³³ Man nani mita Jan ra makabi walaia upla blikram, bamna witin dîa aisin ba lika kasak pali sa.

³⁴ Sakuna yang, upla kum witnis aisinka ra sin tniwaia apia sna; naha aisisni man nani swaki mai sakan kabia dukiara.

³⁵ Jan lika lamp kumi baku klauhi ai ingnika saki kata, bara man nani mita wilin banhwi katma piua prahni kum ai ingnika ra lilia kaia.

³⁶ Sakuna yang witniski kum brisna, Jan ba wal kau tara sa. Diara nani daukisna ba, baha daukamna wisi Aisa mita mihti ra mangkan bamna, param mamrikisa yang na, Aisa mita ai blikan sa.

³⁷ Aisa ai blikan ba mita sin, yang dukira witniski aisisa; aima kumi sin man nani mita ai bîla baikra walras bara namkra ni sin kaikras.

³⁸ Ai smalkanka bîla ba sin man nani kupiam ra dimras, kan Aisa mita blikan ba ra kasak luki banhkras sma.

³⁹ Man nani naha Ulbanka nani na, aman kaiki tânka laki kaikma kaka, baha ba wina raya ban kaia ba briaia lukma; ban sakuna, Ulbanka nani na sika, yang dukira aisisa,

⁴⁰ sakuna man nani lika yang ra balaia want apia sma, baha rayaka ba briaia.

⁴¹ “Upla wina mayunra ba plikras sni.

⁴² Baha purkara, yang lika man nani tânkam ba pain kaikisna, man nani bui Gâd ra latwan kaikras sma ba.

⁴³ Yang na Aisa mita ai blikan, man nani ai briras sma; sakuna upla kum yakan ai karnika ra balbia kaka lika man nani brima.

⁴⁴ ¿Nahki man nani kasak lukma, kan man nani ba kumi mita wala ra tawi pana pana mayunra ba brisma, bara Gâd kumi baman ba wina mayunra aula ba lika pliki banhras sma?

⁴⁵ Man nani lukpara yang mita Aisa ra damhra kwahkamna; damhra kwahki uplika ba lika Moses sika, naika diara briaia dukiara witinka ra man nani lukankam mangkram ba.

⁴⁶ Bamna man nani lika Moses dîa aisin ba ra kasak lukras kapram, yang ra sin kasak ai luki banhwaia apia kapram, kan Moses mita yang dukira ulban sa.

⁴⁷ Moses ulban ba ra kasak lukras sma kaka, ¿nahki kasak lukma yang dîa aisisna ba ra?”