Jan 21 - DAWAN BÎLA AISKA

Jisas disaipil 7 ra latan takisa

¹ Bamna naha diara nani ningkara, Jisas kli ai disaipilka nani ra latan takan Tiberias lakunka un ra. Baku bamna witin naku daukan:

² Saiman Pita, Tamas, upla nani mita Sutki mâki kan ba, Natanael, witinka Kena Galili wina ba, Sebedi luhpia nani bara disaipil wala kau wâl ba kumi ra asla kan.

³ Saiman Pita baha nani ra win: —Yang inska alkaia auna. Disaipil wala nani ba bila: —Yang nani sin man wal wamna. Bamna witin nani wih duri kum ra aimakan, sakuna baha tihmika aiska diara kumi sin alkras pali kata.

⁴ Mahka yu baiwaia man kan ba ra, Jisas lakun un ra bal buan, sakuna disaipil nani kaikan baha ba Jisas sa.

⁵ Bamna Jisas bila: —Tuktan nani, ¿inska alkram ki? Pana disaipil nani bila: —Diara alkras.

⁶ Bamna Jisas bila: —Tân ba duri aihkika tani ra lulks, bara inska alkma. Baku daukan, bamna tân ba lî wina kli sip aubi sunras kan, inska uya ailal alkan kan ba mita.

⁷ Baha disaipilka Jisas mita latwan kaiki kan ba Saiman Pita ra win: —¡Naha na Dawan sa! Saiman Pita lika baha ba Dawan sa win walan ba ra, witin kwala brih ai taya prakan (kan witin ai taya man kan), bamna liura pâli dimwan.

⁸ Disaipil wala nani lika duri brih lakun un ra wan, tân ba raski brih, inska ni banhwan kan bamna. Baha nani lika sauhka wina ban laihura apia kan, handat yar baman kata.

⁹ Disaipil nani sauhka ra nan ulan ba ra, kaikan pauta kum mukan kan, bara baha pautika purara inska kum kahban ami kan, bara brit sin bâra kan kaikan.

¹⁰ Bamna Jisas bila: —Inska wiria bri bal, bisiura alkram ba wina.

¹¹ Saiman Pita duri ra aimaki tân ba sauhka ra raskan, bara tân ba inska tara ni aibanhwan kan, asla 153 inska nani kata. Inska ailal pali kan sakuna, tân ba kalras kata.

¹² Bamna Jisas bila: —Man nani mahka bal, titan pata pis. Disaipil nani tila wina kumi sin makabi walras kata, witin ba ya sa sapa, kan witin nani sut nu kan baha ba Dawan sa.

¹³ Ningkara, Jisas baha nani lamara wih, brit ba ai mihta ra brih muni disaipil nani ra yan, ningkara inska ba wal sim baku daukan.

¹⁴ Naha kat aima yumhpa Jisas ai disaipilka nani ra latan takan, witin pruan wina buan ningkara.

Jisas Saiman Pita wal aisin ba

¹⁵ Bamna titan pata pin ba ningkara, Jisas mita Saiman Pita ra makabi walan: —Saiman, Jan luhpia, ¿man ba naha nani purkara yang ra kau latwan ai kaikisma ki? Pita mita pana win: —Âu, Dawan, man kaikisma nahki yang bui man ra latwan sna ba. Jisas bila: —Baku sa kaka, sîpki luhpia nani ba plun dakaks.

¹⁶ Kli Jisas aima wala makabi walan: —Saiman, Jan luhpia, ¿latwan ai kaikisma ki? Pita pana win: —Âu, Dawan, man kaikisma nahki yang bui man ra latwan sna ba. Jisas mita win: —Baku sa kaka, sîpki nani ba main kaiks.

¹⁷ Jisas aima yumhpa ra kli makabi walan: —Saiman, Jan luhpia, ¿man latwan ai kaikisma ki? Pita naha kat sari takan, kan Jisas naha kat aima yumhpa witin ra latwan kaiki sapa makabi walan bamna. Baku mika Saiman win: —Dawan, man diara nani sut ba kaikisma, bamna man kaikisma yang bui man ra latwan sna ba. Jisas bila: —Baku sa kaka, sîpki nani ba plun dakaks.

¹⁸ Bamna yang kasak pali mai wisni, man kau wahma katma ba ra, kwalkam dimi anira waia want kapram ba ra taki wi katma, kuna man almuk takma ba ra, mihtam sakbi brima bara wala kum mita kwalkam mai dingki, bara anira waia want apia sma ba pliska ra mai brih wabia.

¹⁹ Jisas naha aisi kan ba lika mariki kan, Pita nahki pruaia kan ba tânka, baku ni Gâd ra mayunaia dukiara. Baha ningkara, Jisas Pita ra win: —¡Nini blîks!

Jisas mita disaipil kum ra latwan pali kaiki kata ba

²⁰ Pita ai ninara tawi kaikan, Jisas mita latwan kaiki kan disaipilka ba ai ninara aula kata. Baha sim disaipilka sika tutni pata pi kan ba ra, Jisas lama pali ra kan, bara witin mita sika makabi walan: “Dawan, ¿ya pali mita waihla mihta ra mai mangkbia ki?”

²¹ Pita baha disaipilka kaikan ba ra, Jisas ra makabi walan: —Dawan, ¿naha disaipilka na ra dîa takbia?

²² Jisas pana win: —Witin na yang kli balamna kat raya kabia want sna kaka, ¿baha ba dîa sa man mampara? Sakuna man lika yang nini blîks.

²³ Bamna baha disaipilka prubia apia sturka ba disaipil nani sut tilara sahwan. Sakuna Jisas lika wiras kan baha disaipilka ba prubia apia, witin win: “Witin na yang kli balamna kat raya kabia want sna kaka, ¿baha ba dîa sa man mampara?”

²⁴ Naha sim disaipilka sika naha diara nani witnis aisi ba bara sin ulban ba. Bamna yawan pain kaikisa, witin aisi ba lika kasak pali sa.

²⁵ Diara kau manis bâra sa Jisas daukan ba, bamna baha nani sut ba ulbaia kaka, kumi bani yang lukisna tasba aiska ra sip alkbia apia.