Jan 20 - DAWAN BÎLA AISKA

Jisas raiti wina buan

¹ Wik yua pas, Meri Magdalin ba raiti ra wan titan pali, kau tihmia kata witin kaikan, walpa raiti pura prakan kata ba sakan kan.

² Bamna witin plapi wan Saiman Pita ra bara disaipil wala Jisas mita latwan pali kaiki kan ba ra sin, bara naku win: —¡Upla mita Dawan ba raiti wina saki brih wan, yang nani sin kaikras ani pali ra bri si swin sapa!

³ Pita bara disaipil wala ba kira taki raiti ra wan.

⁴ Wâlsut plapi auya kan, kuna disaipilka wala ba kau karna plapan Pita ba wal, bamna witin pas raiti ra balan.

⁵ Witin bawi kaikan linin kwalka nani lika bahara swin kan, kuna raiti bilara lika witin dimras kata.

⁶ Witin ninara Saiman Pita sin balan, bara ban raiti bilara diman. Saiman Pita kaikan linin kwalka bahara swin kan ba,

⁷ sakuna Jisas lal ra angsar wilkan kan ba linin kwalka ni baha ba asla apia kan, sakuna karbi tani wala ra swin kata.

⁸ Disaipilka wala raiti ra pas balata ba sin raiti bilara diman, bamna witin sin kaikan dîa takan ba, bara kasak lukan.

⁹ Kan witin nani kau Ulbanka tânka kaikras kan, nahki Jisas pruan nani wina kli buaia kan ba.

¹⁰ Ningkara, disaipil nani ba kli ai watla ra mahka wan.

Jisas Meri Magdalin ra latan takisa

¹¹ Sakuna Meri Magdalin lika latara raiti ba lamara ini kan. Witin kau ini ban raiti bilara bawi kaikan ba ra,

¹² kaikan insal wâl kwala pihni dimi iwi kan, Jisas wîna tara tnikan kan ba pliska ra, kumi ba lal tani bara wala ba mina tani ra.

¹³ Bamna insal nani ba mita makabi walan: —Mairin, ¿dîa muni inisma ki? Meri Magdalin bila: —Kan yang Dawanki ba saki brih wan, bara yang kaikras anira bri si swin sapa.

¹⁴ Meri Magdalin naha aisin na ningkara, witin ai ninara tawi kaikan, Jisas bahara bûi kan, sakuna witin lika kaikras kan baha ba Jisas kata.

¹⁵ Baku bamna, Jisas mita makabi walan: —Mairin, ¿dîa muni inisma? ¿Ya plikisma ki? Meri Magdalin luki kan baha lika raiti main kakaira ba, bamna naku win: —Waitna, man mita witin ba brih waram kaka, pliskam ai wis anira bri si swiram ba, bara yang mita witin ba saki brih wamna.

¹⁶ Jisas mita win: —¡Meri! Meri Magdalin tawi, Hibru bîla ra win: —¡Rabuni! (baha bîla tânka ba lika “Smasmalkra”).

¹⁷ Jisas win: —Ai alkpara, kan yang Aisa bâra ba pliska ra kau uli wih asla takras sni. Sakuna muihki nani ra wih wis, uli auna Aisiki ra bara man nani Aisikam ra, yang Gâdki ra bara man nani Gâdkam ra.

¹⁸ Bamna Meri Magdalin mita disaipil nani ra wih maisa pakan, witin pali mita Dawan ba kaikan, bara sturi nani Dawan bui witin ra win ba sin maisa pakan.

Jisas disaipil nani ra latan takisa

¹⁹ Baha sim piua tihmika tutni pali ra, disaipil sut asla taki kan, bamna utla durka nani sut prakan kan, Ju nani sîa. Jisas bal dimi, disaipil nani lilapas kat buan, baha nani ra lakula dauki, naku win: —¡Kupia kumi lâka man nani wal kabia!

²⁰ Naha aisin ningkara, ai mihta nani bara ai tnaya mina sin baha nani ra marikan. Disaipil nani lika Dawan kaikan ba ra, lilia pali takan.

²¹ Baha ningkara Jisas kli win: —¡Kupia kumi lâka man nani wal kabia! Aisa mita yang ai blikan ba baku, yang mita man nani ba mai blikisna.

²² Jisas mita disaipil nani sut ra ai wingka puhbi, naku win: —Man nani Spirit Holikira ba bris.

²³ Ani uplika saurka nani ba man nani mita swih tikma kaka, baha nani ba pâtka swih tikan kabia; sakuna ani uplika saurka nani ba swih tikras kaka, baha saurka nani ba ban swih tikan kabia apia.

Dawan raiti wina buan ba Tamas kaikisa

²⁴ Sakuna disaipil nani wina kumi nina Tamas, upla nani mita Sutki wi ba, Jisas balata piua disaipil wala nani tilara witin âpu kan.

²⁵ Bamna ningkara, disaipil wala nani ba mita Tamas ra win: —Yang nani lika Dawan ba kaikri. Sakuna Tamas bila: —Witin ai mihta nani ra silak ni saban untika nani ra bara tnaya mina untika ba ra mihti sirpika ni dingki kaikras sna kaka, yang sip kasak lukamna apia.

²⁶ Yu 8 luan ningkara, disaipil nani ba kli utla kum ra asla taki banhwan kan, bara naha piua lika Tamas sin baha nani tilara kan. Bamna dur nani ba sut prakan kan, sakuna Jisas ban dimi disaipil nani lilapas kat buan, lakula dauki, naku win: —¡Kupia kumi lâka man nani wal kabia!

²⁷ Ningkara Jisas mita Tamas ra win: —Mihtam kulkaika ba nahara dingki, mihti nani na kaiks, bara mihtam ba sakbi tnaiya mina untika na ra dingki kaiks. ¡Bamna lukras ban kapara, sakuna kasak luks!

²⁸ Tamas mita pana win: —¡Yang Dawanki bara yang Gâdki!

²⁹ Bamna Jisas bila: —Tamas, ¿man ai kaikram ba kat ra kasak lukisma? Yamni pali sa baha uplika nani ai kaikras sakuna kasak luki ba.

Naha wauhkataya dukiara

³⁰ Bamna Jisas mita sain aihka wala nani bara wark aihka wala nani sin manis daukan disaipil nani mawanra, sakuna baha nani sut naha wauhkataya ra ulbras sa.

³¹ Ban sakuna, naha nani na lika ulban sa, man nani kasak lukma Jisas ba Misaya Gâd Luhpia sa, bara naha kasak lukanka nâk raya ban kaia lâka bri kama.