Jan 2 - DAWAN BÎLA AISKA

Kena Galili ra marit liliaka kum daukan ba

¹ Yu yumhpa aimakan ra, marit lâka kum bâra kan Kena, Galili tasbaya ra. Jisas yaptika bâra kan,

² bara Jisas ai disaipilka nani wal sin marit pata ra paiwan kata.

³ Wain laya ba danh takan, bamna Jisas yaptika win: —Wain laya âpu, danh takan sa.

⁴ Jisas pana win: —Mairin, ¿dîa kan man bui yang ra baha ai wisma ki? Yang awarki ba kau balras sa.

⁵ Jisas yaptika bui wark dauki nani ra win: —Dîa dîa witin bui man nani ra mai wibia ba, dauki banhs.

⁶ Bahara lî watla walpa ni paskan 6 bâra kan, Ju nani klin takaia dukiara yus muni kan ba. Laya watla bani ba batil 50, tila nani ba 70 alki kan.

⁷ Jisas wark tatakra nani ra naku win: —Naha laya watla nani na, lî laiki banhki dauks. Baku bamna, witin nani mita banhki daukan.

⁸ Ningkara Jisas bila win: —Nanara wirâ laiki saki, naha lilia paiwanka tâ uplika ba ra bri si yas. Witin nani baku daukan.

⁹ Bamna lilia dauki tâ uplika ba, lî wina wain daukan ba dih kaikan; baha ba ani wina takan sapa nu âpu kan, sakuna alba nani lî panhkan ba baman lika nu kan, kan witin nani sika laya ba panhkan kata. Baku bamna, tâ uplika ba mita marit waitnika ba ra winan,

¹⁰ bara naku win: —Upla nani sut ba, wain pain ba pas tâura uplika nani paiwan ra yui dakakisa, bara baha nani manis din bâra lika, wain karna apia ba dakakisa. Sakuna man lika, wain kau pain ba alki takaskram bara nanara kat sakisma.

¹¹ Naha na lika, pas sain kata Jisas daukan ba Kena Galili ra; baha wal ai prana ba marikan, bara disaipil nani ba witin ra kasak luki banhwan.

¹² Baha ningkara Jisas Kapernaum ra wan; ai yaptika, ai muihni nani bara ai disaipilka nani sin, witin yula kahbi wata. Bahara witin nani yu kulki takaski banhwan.

Jisas tempel klin sakisa

¹³ Insal luan Yua Liliaka Ju nani kulki ba pat baila kan bamna, Jisas Jerusalem tawanka ra wan.

¹⁴ Tempel watla bilara kaikan upla nani ba bîp nani, sîp nani bara butku nani sin atki kan. Lalah sins mamunra nani ba sin, ai iwaika ra iwi, upla nani lalahka sins muni kan.

¹⁵ Jisas baha kaikan ba ra kiwa lupia nani brin, bara wipaia kiwka kum paskan, bara tempel watla wina baha nani sut kangbi sakan, ai sîpka bara bîpka wainhka nani sut aikuki. Lalah sins muni uplika nani ra lalahka tasba ra yakaban, bara tibilka ba makupan.

¹⁶ Butku âiatkra nani ra win: —¡Baha nani ba sâks naha wina! ¡Yang Aisiki watla na, sim atkaia watla baku daukpara!

¹⁷ Baha kat disaipil nani ba Ulbanka ra aisi ba tânka bri banhwan: “Man wamtla na tâwan, yang kupi aiska ni lawri.”

¹⁸ Bamna Ju nani mita Jisas ra makabi walan: —¿Dîa sainka ni wan marikisma, man ba naha diara daukaia karnika brisma ba?

¹⁹ Jisas pana win: —Man nani naha tempelka na sauhki banhs, bara yu yumhpa bilka ra yang kli paskamna.

²⁰ Ju nani mita win: —Mani 46 naha tempelka na paski tnata alkan, ¿bamna man lika sip kama ki yu yumhpa bilara paski tnata alkaia?

²¹ Sakuna tempel dukiara Jisas aisi kan ba lika, witin ai wîna pali dukiara aisi kata.

²² Jisas raiti wina buan piua, ai disaipil nani naha dukiara ai kupia krauki banhwan naha dukiara aisan ba, bamna Jisas bîla nani ra kasak lukan bara Ulbanka nani ra sin.

Jisas lika upla sut ra kakaira sa

²³ Jisas Insal luan yua Liliaka tara piua ra Jerusalem ra kan; bara upla manis witin ra kasak lukan, sain aihka nani witin daukan ba kaiki.

²⁴ Sakuna Jisas lika witin nani ra kasak lukras kata, kan witin sut ra kakaira kan bamna.

²⁵ Baha mita Jisas ra sip upla kum mita wiaia âpu kan, witin pali mita pat kaiki kan upla kupia ra dîa bâra ba sut.