Jan 19 - DAWAN BÎLA AISKA

¹ Bamna Pailat mita adar yan Jisas ba bri si wipbia.

² Suldiar nani mita kiaya ni kraun kum pitbi, Jisas lal ra bapan, bara kwala balianta talia sin dingkan.

³ Ningkara lama pali ra wih, naku win: —¡Ju nani Kingka ba raya sa! Bamna ai mawan taya ra prukan.

⁴ Pailat kli taki bal, witin nani ra win: —Kaiks, witin ba nahara brih aulna, bamna man nani kaikma yang bui witin ra watawanka kumi sin sakras pali sna.

⁵ Jisas latara taki balan, kiaya kraunka ba ai lal ra bapi, bara kwala balianta talia ba sin dimi. Bamna Pailat bila: —¡Kaiks, waitnika nahara ki!

⁶ Bamna prîs tara nani bara suldiar nani sin Jisas ba kaikan ba ra, mahka ai pura wini, win: —¡Dus prihni ra sas! ¡Dus prihni ra sas! Pailat bila: —Ban kaka, man nani mita witin ba bri si dus prihni ra sabi banhs, kan yang lika witin wîna ra watawanka kumi sin sakras sna.

⁷ Sakuna Ju nani pana win: —Yang nani lâ kum brisna, baha lâka ba kat witin na pruaia sa, kan witin na Gâd Luhpia sa win.

⁸ Pailat naha walan ba ra, kau sibrin daukan.

⁹ Bamna Pailat kli lâ tara watla ra dimi, Jisas ra makabi walan: —¿Man ba ani wina sma ki? Sakuna Jisas lika pana diara kumi sin aisaras kan.

¹⁰ Pailat win: —¿Man bui yang ra ai aisaras sma? ¿Man kaikras sma ki, yang karnika brisna dus prihni ra mai sabaia, bara pri mai sakaia karnika sin?

¹¹ Bamna Jisas pana win: —Man lika yang purira karnika kumi sin âpu kaia kapram, Gâd mita maikras kata kaka. Sakuna ya mita man mihtam ra ai mangkan ba sika, saurka kau tara brisa man ba wal.

¹² Baha piua ba wina, Pailat ba trai kaikan Jisas ba pri sakaia. Sakuna Ju nani ai pura karna wini kan: —¡Man baha waitnika pri sâkma kaka, Rom kingka wal uplikam apia sma! ¡Kan ani uplika yakan king taki ba lika, Rom kingka mapara sa!

¹³ Pailat naha walan ba ra, Jisas ba yan saki brih balan; bamna Pailat lâ iwaika ra iwan, Hibru bîla ra Gabatá wi ba pliska ra, baha tânka lika Walpakira.

¹⁴ Baha piua ba lika Insal luan Yua Liliaka ba kainara kata, wan lal kat bahmuna. Baku bamna, Pailat mita Ju nani ra win: —¡Nahara sa man nani kingkam ba!

¹⁵ Sakuna Ju nani ai pura wini, naku win: —¡Witin ba prubia! ¡Witin ba prubia! ¡Dus prihni ra sas! Pailat bila: —¿Man nani want sma ki, kingkam ba dus prihni ra sabamna? Sakuna prîs tara nani pana win: —¡Yang nani king wala briras, Rom kingka baman!

¹⁶ Baku mika, Pailat mita Jisas ba witin nani mihta ra mangkan dus prihni ra sabaia, bamna witin nani mita Jisas ba brih wan.

Jisas ba dus prihni ra saban

¹⁷ Bamna Jisas dus prihni ba twilki taki wan, Wan Lalkamhka wi ba pliska ra (baha pliska ba Hibru bîla ra Golgota mâkisa).

¹⁸ Bahara witin nani mita Jisas ba dus prihni ra saban, bara âimplikra wâl kan ba sin, kumi Jisas mihta aihkika tani ra bara wala ba smihka tani ra.

¹⁹ Bamna Pailat mita wauhtaya kum ulbi, Jisas dusa prihni purara mangkan, bahara naku ulban kata: “Jisas Nasaret wina, Ju nani Kingka ba.”

²⁰ Ju nani manis baha ulbanka ba aisi kaiki banhwan, kan Jisas ra saban pliska ba lika tawan lamara kan. Baha ulbanka ba bîla sât yumhpa ra ulban kata: Hibru, Grik bara Latin bîla aisanka nani ra.

²¹ Baku bamna, Ju nani bara prîs wihtka tara nani ba mita, Pailat ra win: —Baku ulpara ‘Ju nani Kingka’, sakuna naku uls: ‘Witin mita aisin Ju nani kingka.’

²² Sakuna Pailat pana win: —Yang dîa ulbri ba, baku kabia.

²³ Suldiar nani mita Jisas ba dus prihni ra saban ningkara, witin kwalka ba kalki mânka walhwal ra daukan, suldiar bani pîs kumi briaia, bara prâka yari ba sin brin, prâka ba sipras ban pura wina mina tani kat kan.

²⁴ Suldiar nani ba pana pana aisin: —Yawan kwalka na kalkbiara; sakuna kaisa lat lulki kaikaia, kwalka na yaura tawbia sapa. Baku sika Ulbanka ra dîa aisi ba aimakan: “Witin nani bui yang kwailka pali ba purara lat puli, yui bri banhwan.” Bamna baku suldiar nani mita daukan.

²⁵ Jisas dusa prihni ba lamara, ai yaptika Meri bahara bûi kata, ai yaptika muihnika Cleofás maya ba, bara Meri Magdalin sin.

²⁶ Bamna Jisas ai yaptika ra kaikan, bara disaipil kum witin latwan pali kaiki kan ba sin, ai yaptika lamara kan. Bamna Jisas ai yaptika ra naku win: —Mairin, kaiks man luhpiam nâra ki.

²⁷ Ningkara, baha disaipilka ra win: —Kaiks, man yaptikam nâra ki. Bamna baha piua wina baha disaipilka mita, Jisas yaptika ba main kaiki ai watla ra brin.

Jisas pruan ba

²⁸ Naha diara ningkara, Jisas ai dara walan diara sut aisin ba aimakan, bara ulbanka ba aimakbia dukiara, witin bila: —Lî din ai daukisa.

²⁹ Bahara wain swahwan watla kum bâra kan, bamna suldiar kum mita baha laya ra wahmuk ni buski, hisop dusa tnawa kumi ra mangki, Jisas bîla kat bri si mangkan.

³⁰ Jisas baha wain swahwan ba din ningkara, witin bila: —Diara sut ba daukan sa. Baha ningkara Jisas ai lal makupan, bara pruan.

Suldiar kum Jisas tnaya ra langsa ni saban

³¹ Insal luan Yua Liliaka kainara kata, bamna Ju nani want apia kan upla wîna tara nani ba dus prihni ra ban swiaia ris yua kat, kan baha ris yua ba lika kulkanka tara yabi kata. Baha mita Ju nani mita Pailat ra makaban suldiar nani blîkbia, dus prihni ra uplika nani ba kuhma dusa nani ba krikaia, ai wîna tara nani ba sin dus prihni ba wina lahbia.

³² Bamna suldiar nani wih, pas uplika kuhma dusa ba krikan, bara wala ba sin, Jisas wal dus ra saban kata ba.

³³ Sakuna Jisas lamara balan ba ra, kaikan pat pruan kata; baha mita suldiar nani mita witin kuhma dusa nani lika krikras kan.

³⁴ Sakuna suldiar nani ba wina kum mita langsa ni tnaya mina ra sabi klauhban, bamna tala lî wal takan.

³⁵ Baha uplika naha sturka aisi ba lika, witin pali mita ai nakra ni kaikan, bara diara kasak ba aisisa; bamna witin ai dara pain walisa, dîa aisi ba lika kasak sa; bara baku mika man nani sin kasak lukma.

³⁶ Naha diara nani na naku takan, Ulbanka ra naku wi ba aimakaia dukiara: “Upla mita witin ai dusa kumi sin krikbia apia.”

³⁷ Ulbanka wala ra sin wisa: “Upla nani mita witin ra saban ba kaikbia.”

Jisas raiti ra bikan

³⁸ Naha diara ningkara, Josep Arimatea tawanka wina ba mita, Pailat ra wih Jisas wîna tara ba brih waia makaban. Baha Josepka lika Jisas disaipilka kumi kata, sakuna yukuwi ra kan Ju nani sîa. Pailat mita âu win, bamna Josep wih Jisas wîna tara ba brih wan.

³⁹ Bamna Nikudimus sin Josep wal wan. Naha sim Nikudimuska sika piua luan ra Jisas ra wata ba tihmia ra wal aisaia. Witin mita sika sîka mâka kîa painkira ba alus saika wal miks munan ba kintal kum bri balan.

⁴⁰ Baku bamna Josep bara Nikudimus wal mita Jisas wîna tara ba brin, bamna linin kwalka ni srukan, bara sîka kîa painkira ba ni yukan; baku sika Ju nani ba dauki kan, upla kum pruan wîna tara ba bikaia piua.

⁴¹ Jisas dus prihni ra saban pliska ba lamara upla bikaia tasbaya kum bâra kata, bara bahara raiti raya kum bâra kan, kau upla pruan wîna tara bahara mangkras kata.

⁴² Baha raitika ra witin nani mita Jisas wîna tara ba mangkan, kan baha raitika ba Jisas dus ra saban pliska ba lamara kan bamna, bara Ju nani ris yua kulki kan ba sin pat baila kata.