Jan 14 - DAWAN BÎLA AISKA

Jisas, Aisa ra waia yabalka ba

¹ “Man nani kupiam ra uya trabil taki luki kapara. Gâd ra bara yang ra sin kasak luki bas.

² Aisiki watla ra plis manis bâra sa; baku apia kan kaka, yang bui man nani ra mai wiaia apia kapri, man nani pliskam kum ridi daukaia auni.

³ Bamna yang wih pliskam ridi daukamna ba ningkara, kli balamna man nani mai brih waia, bara baku mika yang anira sna ba pliska ra man nani sin bâra kama.

⁴ Man nani lika pat kaikisma, yang anira auna ba, bara yabalka ba sin kaikisma.

⁵ Tamas bila: —Dawan, yang nani kaikras man anira auma sapa, ¿bamna nahki yabal ba tânka kaiki banhwi kamna ki?

⁶ Jisas bila: —Yang sika yabal ba, kasak tânka ba bara rayaka ba sin. Yang bâk baman sip sa Aisa ra waia.

⁷ Man nani bui yang na ai kakaira katma kaka, Aisiki ra sin kakaira kaia kapram; bamna nanara wina pat kakaira sma, man nani bui witin ba pat kaiki kapram bamna.

⁸ Bara Pilip bila: —Dawan, Aisa ba wan mariks, baha wal yang nani aitani sna.

⁹ Jisas pana win: —Pilip, nahki piua wihka yang lika man nani wal sna, ¿bara kau ai kakaira apia sma ki? Ani uplika yang ai kaiki ba, Aisiki ra sin kaikisa; ¿bamna, dîa muni Aisa ba kaikaia makabisma?

¹⁰ ¿Pilip, man kasak lukras sma ki, yang na Aisa wal asla pali sna ba bara Aisa sin yang wal asla pali ba? Diara nani man nani ra mai wisna ba lika, yang yakan mai wiras. Aisa yang ra iwi ba mita sika ai warkka daukisa.

¹¹ Bamna kasak ai luks man nani, yang na Aisa wal asla pali sna, Aisa sin yang wal asla pali sa; baku apia kaka, diara daukisna ba wina pan man nani kasak ai luks.

¹² Kasak pali mai wisni, yang ra kasak luki uplika ba, diara nani daukisna ba witin mita sin daukbia, kau diara tara nani sin daukbia, kan yang Aisa bâra ba pliska ra auna.

¹³ Diara sut man nani bui yang nini mâki makama ba, yang daukamna, bara baku mika Luhpia ba mita Aisa prana ba marikbia.

¹⁴ Bamna yang nini mâki diara makama ba, daukamni.

Jisas pramis munisa Spirit Holikira ba blikaia

¹⁵ “Bamna man nani latwan ai kaikisma kaka, lâika bîla nani ba wali dauki kama.

¹⁶ Yang Aisa ra makabamna, witin bui man nani hilpkam bara maisam nihkaia dukiara wala kumi maikbia, baha sika kasak tânka Spiritka ba, witin ba man nani wal kabia ban kaia ra.

¹⁷ Dawan ra tawras uplika nani baha Spiritka ba sip bribia apia, kan witin nani mita sip kaikbia apia, bara sip tânka bribia apia; sakuna man nani lika pat kakaira nani, kan witin ba man nani wal sa, bara ban kaia ra sin man nani wal kabia.

¹⁸ “Yang bui man nani ba, ban lulki mai swimna apia; kli balamni man nani wal kaia dukiara.

¹⁹ Kau piua wiria ba ra, upla nani mita ai kaikbia apia, sakuna man nani lika ai kaikma bara raya kama, kan yang raya sna bamna.

²⁰ Baha piua kat man nani tânka brima, yang Aisiki wal asla pali sna ba, bara man nani lika yang wal asla, bara yang mita sin man nani wal asla pali sna.

²¹ Bamna ani uplika lâika nani tânka brisa bara bîli kat wali daukisa kaka, witin param marikisa yang ra latwan ai kaikisa. Latwan ai kaiki uplika ra, Aisiki latwan kaikbia, bara yang sin latwan kaikamna, ban sin witin ra latan takamna.

²² Judas wala (Iskariot ba apia) bila: —Dawan, ¿dîa muni yang nani ra lika latan takma, kuna tasba uplika nani ra lika apia?

²³ Jisas pana win: —Ani uplika latwan ai kaiki ba, dîa aisisna ba kat wali daukisa, bara Aisiki mita latwan kaikbia, bamna yang Aisiki wal bal baha uplika ra takaskamna.

²⁴ Ani uplika latwan ai kaikras ba, yang dîa aisisna ba kat wali daukras sa. Yang wina man nani smalkanka walisma ba, yang duki apia sa, sakuna Aisa ai blikan ba dukia sa.

²⁵ “Naha diara sut na man nani ra mai wisna, kau man nani aikuki sna bamna.

²⁶ Sakuna Spirit Holikira Aisa mita yang nini ra luki blîkbia ba lika, man nani ra hilp mai munaia bara maisam nihkaia dukiara, bara witinka mita diara sut mai smalkbia, bara dîa dîa mai wîri ba sut kupiam kraukbia.

²⁷ “Man nani wina dakwi takuna kupia kumi lâka ra. Kupi kumi lâka man nani ra maikisni, sakuna tasba uplika nani kupia kumi lâka yabi ba sât lika apia. Man nani kupiam trabil bripara bara sibrin kapara.

²⁸ Man nani lika yang aisari ba pat walram yang mahka auna, bara kli balamna man nani wal takaskaia. Man nani kasak latwan ai kaikisma kaka, lilia banhwi kaia kapram yang Aisa ra auna bamna, kan witin ba kau tara sa yang ba wal.

²⁹ Naha mai wisna na, piua kau na ra baku takbia, bara man nani kasak lukma.

³⁰ “Nanara diara kau manis man nani wal aisaia apia sna, naha tasbaya ra wihta ba aula bamna. Karnika kumi sin yang purira âpu sa sakuna,

³¹ baha ba baku takaia sa, bamna baku lika tasba uplika nani kaikbia, yang Aisa ra latwan kaikisna bara witin mita daukamna win ba kat daukisna. “Man nani bus. Kaisa naha wina mahka waia.