Jan 12 - DAWAN BÎLA AISKA

Mairin kum mita Jisas ra batana ni yukisa

¹ Insal luan Yua Liliaka kau yu 6 kan, Jisas Betania ra wan; bahara Lasarus takaski kata, bara witinka sika Jisas mita pruan wina bukata ba.

² Bahara Jisas prana daukaia dukiara tutni pata tara kum dauki banhwan; Marta lika plun ba tibil ra kahbi hilp muni kan, bara Lasarus sin Jisas wal tibil ra iwi plun pi kata.

³ Baku mika, Meri mita batana isint kîa painkira batil banhki bri balan, baha ba mana pali kan, bamna baha ni Jisas mina nani ra yukan bara ningkara ai tâwa ni dikan. Utla aiska ba isint kîa man kata.

⁴ Bamna Saiman luhpia Judas Iskariot ba, witinka sin Jisas disaipilka nani tilara kulkan kan, bara witinka mita sika Jisas waihla mihta ra mangkaia kan ba bila:

⁵ —¿Dîa kan naha batanka kîa painkira na, lalah mâ handat yumhpa mana wauhi atki muni, lalahka ba umpira nani ra yaras kan?

⁶ Judas naha aisin na lika umpira nani ra luki lika apia, kuna witin ba âimplikra kan ba mita, bara baha purkara lalah sakbatka ba twilki kata, bara witin baha sakbatka wina lalah impliki kan.

⁷ Bara Jisas win: —Swis mairin na, witin baha ba bri kan ai bikaia piua ba dukiara.

⁸ Piu bani upla umpira nani ba tilamra bri kama, sakuna yang lika piu bani ban ai bri kama apia.

Lasarus ikaia lukan ba

⁹ Ju ailal kaiki banhwan Jisas ba Betania ra kan, bamna baha nani bahara wan Jisas kaikaia man apia, kuna Lasarus ba sin kaikaia, Jisas mita pruan wina bukan ba.

¹⁰ Bara prîs tara nani mita lâ daukan Lasarus ba sin ikaia.

¹¹ Kan Lasarus tâka mita, Ju ailal pali witin nani wina dakwi taki kan, Jisas ra kasak lukaia dukiara.

Jisas Jerusalem ra dimisa

¹² Upla ailal Jerusalem ra wan kata Insal luan Yua Liliaka ba luaia; yu wala witin nani tânka brin, Jisas sin Jerusalem ra balaia ba.

¹³ Bamna dus wahia nani klaki brih taki wan Jisas wal prawaia, naku sin witin nani wini kata: —¡Mayunra! ¡Yamni pali sa, witinka Dawan nina brih aula ba, yamni pali sa Israel Kingka ba!

¹⁴ Baku ba ra Jisas lika biriku kum saki baha purara ulan, Ulbanka ra aisi ba baku:

¹⁵ “Si bripara, Saion tawanka; kaiks, man Kingkam ba aula, biriku kum purara uli.”

¹⁶ Tâ pali ra, disaipil nani naha diara nani tânka briras kan, sakuna Jisas pruan ba mita lika tânka brin, naha sut ba witin ra takaia kan ba, bara sin witin dukiara dîa ulban ba baku kat sin takan sa.

¹⁷ Bamna Jisas mita Lasarus pruan kan wina raki bukan bara upla nani bahara kaiki banhwan nani ba witin nani baha tânka, upla nani ra maisa paki kan.

¹⁸ Baha mita upla nani taki wan Jisas wal prawaia, kan witin nani kaikan Jisas sain aihka pali daukan bamna.

¹⁹ Bara parisi nani pana tawi aisi banhwi kan: —¡Kaikram si man nani, nahki witin ra sip diara munaia tânka apia sa; kan upla sut, witin nina blikisa!

Grik kum kum Jisas plikisa

²⁰ Yua tara ba luaia dukiara upla nani Jerusalem ra aidrubi balan Gâd ra ai pura suni mayunaia, bara baha nani tilara Grik nani sin bâra kan.

²¹ Baha Grikka nani ba mita Pilip Betsaida Galili kuntrika wina ba lamara bal, makabi win: —Mâsa, yang nani Jisas kaikaia want sna.

²² Pilip bara Andru ra wih win, bamna witin nani wâlsut Jisas ra wih maisa pakan.

²³ Bamna, Jisas pana win: —Piua ba aimakan sa, Upla Luhpia Waitna prana daukan kaia.

²⁴ Kasak pali yang mai wisni, plawar mâ kumi tasba ra mangkan ba pruras sa kaka, piua bani ban mâ kumi baman kabia; sakuna tasba ra mangkan ba prubia kaka lika, mâ ailal pali sakaia sip sa.

²⁵ Ani uplika ai rayaka ra latwan kaiki ba lika witin tikbia; sakuna naha tasba ra ani uplika ai rayaka bahki kulkbia kaka, witin lika ban kaia ra swaki sâkbia.

²⁶ Bamna upla kumi yang duki daukaia want sa kaka, witin nini blikaia sa; bara anira sna pliska ba ra, yang duki dadaukra ba sin bâra kabia. Bamna upla kumi yang duki daukisa kaka, Aisiki mita prana daukbia.

Jisas maisa pakisa ai pruanka dukiara

²⁷ “¡Bamna nanara, yang kupi ra uya wirha ni ai taiban sa! ¿Bara yang dîa aisamna ki? Wimni: ‘Aisa, ¿naha kupi wirha taibanka wina swaki ai sâks’? ¡Sakuna naha pali dukiara sika yang balri ba!

²⁸ Aisa, ninam ba prana dauks. Bamna bîla baikra kumi kasbrika purara ba wina walan ba, naku win kata: “Yang baha ba pat prana daukri, bara kli sin prana daukamni.”

²⁹ Upla nani bahara kan ba aisi banhwi kan baha ba alwani kum binka, bara wala nani bila: —Insal kum witin ra aisin.

³⁰ Bara Jisas baha uplika nani ra win: —Baha bîla baikra wali banhram ba lika, yang dukira apia sa, sakuna man nani dukiamra sa.

³¹ Bamna nanara sika naha tasba na lâka aisi daukan kaia piua ba, bara naha tasba wihtka tara aimaki ba sin latara lulkan kabia.

³² Bara yang pruan wina kli buamna ba ra, upla sut yang ra raski bri balamna.

³³ Naha tânka na wal mariki kata, witin dîa pruanka ni prubia ba.

³⁴ Bara upla nani ba mita pana win: —Lâ wauhkataya wina yang nani kaikisna Misaya ba lika ban kaia ra raya kaia sa. ¿Bamna nahki man wisma, Upla Luhpia Waitna ba purara bukan kaia sa? ¿Baha Upla Luhpia Waitna ba ya sa ki?

³⁵ Bara Jisas bila baha nani ra: —Kaiks, piua wiria baman ingni ba kau man nani tilamra kabia. Bamna watauki bas kau baha ingnika brisma ba ra, tihmia kra mai alkbiara sîa; kan tihmia ra watauki uplika ba, witin kaikras sa anira auya sapa.

³⁶ Ingni ba kat kasak luki bas, kau man nani tilamra ingnika ba brisma ba ra, bamna baku mika sip kama ingni luhpia nani takaia. Jisas naha diara nani aisin ba ningkara, mahka taki wih baha nani wina yukuwan.

Ju nani dîa muni Jisas ra kasak lukras kan ba

³⁷ Bamna Jisas mita sain aihka nani manis daukan baha uplika nani mawanra, sakuna kumi sin sip witin ra kasak lukras kan,

³⁸ bamna naha diara sut na aimakaia kan prapit, Aiseya ulbanka ba kat: “Dawan, ¿ya wan smalkanka ra kasak lukan ki? ¿Yaura Dawan mita ai karnika ba marikan ki?”

³⁹ Baku bamna, witin nani sip apia kan kasak lukaia, bamna Aiseya sin naku ulban:

⁴⁰ “Gâd mita baha uplika nani ba nakras bara kupia karna daukan, ai nakra nani ni kaikbiara sîa, bara ai sinska ni tânka bribiara, bara witin nani tawi yang ra balka rakamnara sîa.”

⁴¹ Aiseya naha diara nani ra aisin, witin pali mita Jisas prana ba kaikan bamna, bara baha mita witin Jisas dukiara aisi kata.

⁴² Ban sakuna Ju ailal Jisas ra kasak lukan, ban sin Ju wihtka nani sin; sakuna parisi nani sîa upla nani mawanra param aisaras kan, prias watla wina kra kangbi sâkbiara sîa.

⁴³ Witin nani lika upla wina mayunra briaia ba kau want kan, Gâd wina mayunra briaia ba wal.

Jisas bîla nani ba mita, upla nani lâka daukan kabia

⁴⁴ Jisas ai bîla baikra tara ni aisin: “Ani uplika yang ra kasak luki ba, yang ra baman kasak lukras, kuna Aisiki ai blikan ba ra sin kasak lukisa.

⁴⁵ Bamna ani uplika yang ai kaiki ba, Aisa ai blikan ba ra sin kaikisa.

⁴⁶ Yang, ingni sna na, naha tasba ra balri, bamna ani uplika nani yang ra kasak luki ba tihmia ra ban wataukaia apia sa.

⁴⁷ Upla kumi bîla wali, sakuna baha kat daukras ba, yang mita lika pât ra lulkamna apia, kan upla pât ra lulkaia wisi yang na tasba ra balras, kuna swaki sakaia.

⁴⁸ Ani uplika bahki ai kulki bara bîli nani sin wali daukras ba, ya mita pât ra lulkaia ba pat bâra sa. Bîla nani yang aisari ba mita sika tnata piua ra pât ra lulkan kabia.

⁴⁹ Kan yang yakan lukanki wina mai wiras, sakuna Aisa ai blikan ba adarka kat smalkisna.

⁵⁰ Bara yang kaikisna Aisiki lâka ba lika raya ban kaia dukiara sa. Baku bamna, dîa aisisna ba lika Aisa adarka ba kat aisisna.”