Jan 11 - DAWAN BÎLA AISKA

Lasarus pruanka ba

¹ Waitna siknis kum bâra kata, nina ba Lasarus, witin Betania wina kan, Meri ai muihni Marta wal tawanka ba.

² Naha Meri ba sika Lasarus siknis ba lakrika kata, bara witin mita sika Jisas mina ra batana kîa pain ni yukan, bara ai tâwa ni sin dikata ba.

³ Bamna Lasarus lakrika mairin wâl ba mita Jisas ra upla blikan, naku wiaia: —Dawan, man uplikam latwankira ba siknis pali sa.

⁴ Jisas naha wali, naku aisin: —Naha sikniska Lasarus ra alkan na lika pruaia dukia apia sa, sakuna Gâd prana ba marikaia bara yaka baha sikniska bâk, Gâd Luhpia prana ba marikaia dukiara sa.

⁵ Âu, Jisas mita Marta bara Lasarus wal ra uya latwan kaiki kata.

⁶ Sakuna Jisas ba Lasarus sikniska witin ra win, bara kau yu wâl takaskan.

⁷ Baha ningkara Jisas ai disaipilka nani ra win: —Kaisa yawan kli Judia ra waia.

⁸ Disaipil nani mita pana win: —Smasmalkra, bisi pali baha sim pliska ra Ju nani mita walpa ni sabi mai ikaia mai munata, ¿bara man kli bahara waia lukisma ki?

⁹ Jisas bila: —¿Kasak apia, yu aiska ba ra 12 awar brisa? Bamna upla kumi kakna ra wataukisa kaka, ai mina prukbia apia, kan naha tasba ra ingni bâra ba kaikisa.

¹⁰ Sakuna upla kumi tihmia ra wataukisa kaka, ai mina prukisa, kan witin ingni ra apia sa bamna.

¹¹ Baha ningkara, Jisas sin naku win: —Wan uplika Lasarus ba mahka yapan sa, sakuna yang wih witin ba tatukbi bukamna.

¹² Disaipil nani pana win: —Dawan, witin ba yapisa kaka, baha tânka lika witin kli rawaia sa.

¹³ Jisas baha wiaia want kan ba lika, Lasarus ba pruan sa, kuna disaipil nani luki kan, Jisas win Lasarus ba yapan aihwa yapi kan.

¹⁴ Bamna Jisas mita param pali saki muni, win: —Lasarus ba pruan sa.

¹⁵ Bamna lilia sni bahara yang âpu kapri ba dukiara, kan baku kau pain sa man nani mampa ra, man nani kasak luki kama ba dukiara. Sakuna kaisa yawan bui witin ba wih kaikaia.

¹⁶ Bara Tamas, nina Sutki mâki ba mita disaipil wala nani ra wisata: —Kaisa yawan sin witin wal aikuki pruaia.

Jisas sika raiti wina buaia tânka bara raya kaia lâka ba sin

¹⁷ Bamna Jisas balan ba ra, kaikan Lasarus ba pat bikan yu walhwal kan.

¹⁸ Betania ba Jerusalem lamara kan, kau wiria ba ra mail wâl praiska.

¹⁹ Ju nani ailal aidrubi balan kata, Marta bara Meri wal ra maisa nihkaia, ai lakrika Lasarus pruan ba dukiara.

²⁰ Bamna Jisas aula kan ba Marta kaikan ba ra, mahka taki wan wal prawaia, sakuna Meri lika utla ra ban takaskan.

²¹ Marta mita Jisas ra win: —Dawan, man nâra katma kaka, laikra ba pruaia apia kan,

²² Sakuna yang kaikisna, Gâd ra dîa makama ba witin sut maikbia.

²³ Jisas pana win: —Man lamkra Lasarus ba kli raya takbia.

²⁴ Marta bila: —Âu, yang kaikisna witin ba kli bubia, tnata piua ra pruan nani kli bubia ba ra.

²⁵ Jisas pana win: —Yang sika kli buaia tânka bara rayaka ba sin. Ya yang ra kasak luki ba, prubia kra kuna raya kabia.

²⁶ Bamna baha nani kau raya ba piua ra yang ra kasak luki ba, prubia apia ban kaia ra. ¿Naha man kasak lukisma ki?

²⁷ Marta bila: —Âu, Dawan, yang kasak lukisna man ba Kraist, Gâd Luhpia ba, witinka naha tasba ra balaia kan ba.

Jisas Lasarus raitika lamara inisa

²⁸ Naha aisin ningkara, Marta wan ai muihni Meri ba winaia, bara witin wal man aihka taki, naku win: —Smasmalkra ba nâra sa, bara witin lika mai paiwisa.

²⁹ Meri naha walan ba ra, aihni pali mahka taki wan Jisas wal prawaia.

³⁰ Jisas ba kau tawan ra dimras, witin Marta wal prawan pliska ra ban bâra kan.

³¹ Ju nani utla bilara Meri maisa nihki kan ba mita kaikan, Meri lika aihni pali latara taki auya. Bamna witin nani sin ninara taki wata, kan luki banhwan Meri ba raiti ra auya bahara inaia.

³² Bamna Meri ba Jisas bâra kan ba pliska ra wan ba ra, witin Jisas mina ra ai lula kriki, naku win: —Dawan, man nâra katma kaka, laikra ba pruaia apia kan.

³³ Jisas kaikan Meri ba ini kan, bara Ju nani witin wal balan ba sin. Bamna Jisas sari takan bara ai kupia ra wirha pali diman,

³⁴ bara makabi walan: —¿Anira Lasarus ba bikram sa ki? Witin nani bila: —Dawan, bal kaiks.

³⁵ Baku kan ba ra Jisas mahka inan.

³⁶ Bamna Ju nani bila: —¡Kaiks, nahki latwan kaiki kan ba!

³⁷ Sakuna baha nani wina kum kum bila: —Naha waitnika sika upla blain kan yan kaikan, ¿bara diara kum daukaia sip kan apia Lasarus ba pruaia apia dukiara?

Lasarus pruan wina buan ba

³⁸ Jisas kli ai kupia wirha diman ba kira, raiti lamara balan. Baha raiti ba lika walpa unta kum kan, bahara Lasarus pruan ba, dingki dimaika ba prakan kan walpa kum ni.

³⁹ Jisas bila: —Man nani walpa ba sâks. Marta, Lasarus pruan ba lakrika bila: —Dawan, nanara pat kîa saura takisa baku sa, kan Lasarus ba pat pruan yu walhwal brisa.

⁴⁰ Sakuna Jisas bila: —¿Yang mai wiras katna, man kasak lukma ba ra, Gâd prana ba kaikma?

⁴¹ Bamna walpa ba sakan. Bara Jisas kasbrika purara kaiki, naku aisin: —Aisa, yang tingki mai wisna man bîli baikra walram bamna.

⁴² Yang kaikisna man piu bani bîli walisma, sakuna yang baku aisisna upla nani nahara banhwi na dukiara, witin nani kasak lukbia ba dukiara ai blikatma.

⁴³ Naha aisin ba ningkara, ai bîla baikra tara ni winan: —¡Lasarus, baha wina bal taks!

⁴⁴ Bamna pruan kata ba bal takan, bara ai mihta bara mina nani sut kwala ni blakan kata, bara ai mawan sin kwala ni wilkan kata. Bamna Jisas mita win: —Man nani bui witin ba lanhks, bara swis mahka wabia.

Jisas alkaia lâ daukan ba

⁴⁵ Naha tâka mita, Meri yula kahbi aidrubi balan kan Ju nani wina ailal, baha nani Jisas ra kasak lukan, kan witin nani lika Jisas diara daukan ba kaiki banhwan bamna.

⁴⁶ Sakuna baha Ju nani tila wina kum kum ba mita parisi nani ra wih win, Jisas dîa daukan ba.

⁴⁷ Bamna parisi nani, prîs tara nani bara lâ uplika nani aikuki asla taki, makabi walan: —¿Yawan dîa daukaia sa ki? Naha waitnika lika wark aihka nani uya pali daukisa.

⁴⁸ Yawan baku ban swibia kaka, upla sut witin ra kasak lukbia, bara Rom wihtka nani bal wan tempelka bara wan nisanka nani sut âpu daukbia.

⁴⁹ Sakuna witin nani wina kumi nina Keyapas, baha manka ra witinka prîs tara aimaki kata ba mita naku win: —Man nani lika diara kumi sin kaikras,

⁵⁰ tânka nani sin briras sma, yawan wan mapara kau pain sa upla ailal tâwan upla kumi prubia, wan nisanka aiska âpu daukaia ba wal.

⁵¹ Bamna Keyapas lika naha na, witin ai kupia wina aisaras kata; sakuna baha manka ra witin ba prîs tara aimaki kan bamna, Gâd mita yan baha dahra aisin, nahki Jisas ba Ju nani nisanka aiska ba tâwan pruaia sa;

⁵² bara Ju nani nisanka tâwan baman apia, sakuna Gâd luhpia nani laihura yakaban nani ba sut asla daukaia mata sin.

⁵³ Baku bamna, baha piua wina Ju wihtka nani lâ dauki banhwan Jisas ba ikaia.

⁵⁴ Baha mita Jisas ba Ju nani tilara kli param pali taukras kan, sakuna Judia tasbaya ba wina taki plis kum ra wan nina ba Efraín, bara baha tawanka ba upla iwras tasbaya lamara sa. Jisas bahara ai disaipilka nani aikuki takaskan.

⁵⁵ Ju nani Insal luan Yua Liliaka dauki ba pat baila kan, bamna tawan nani wina upla ailal Jerusalem ra balan, Moses lâka ba kat ai wîna klin daukaia, Insal luan Yua kau kainara.

⁵⁶ Bara Jisas ra pliki banhwi kata tempel ra, bara pana pana sin makabi wali kan: —¿Man nani dîa lukisma? ¿Naha lilia na ra witin balbia, apia kaka balbia apia ki?

⁵⁷ Parisi nani bara prîs tara nani mita adar yan kata, ani uplika Jisas anira takaski ba kaiki kaka, witin nani ra wibia, bara baku mika sip kabia alkaia.