Jan 10 - DAWAN BÎLA AISKA

Sepad ba ai sîpka aikuki

¹ “Bamna yang kasak pali mai wisni, ani uplika sîp nani klarka ra dimaia durka ba swi si tnaya walak ni dimisa kaka, baha lika âimplikra bara upla ra rausauhki dukia dadakbra sa.

² Kuna durku dimi uplika ba sika sepad, sîp nani main kakaira ba.

³ Bara dur main kakaira ba mita sîp main kakaira dimbia dukiara dur ba kwâkisa, bara sîpka nani mita sin ai bîla baikra walisa. Ai sîpka nani nina kat mâki winisa, bara klar bîla wina saki latara brih auya.

⁴ Ai sîpka nani sut latara sakan ba ningkara, witin lika sîp nani ba sut ba tâ kat aimaki wapi auya; bara sîp nani ba mita nina bliki auya, kan ai bîla baikra ba kakaira banhwisa.

⁵ Bamna sîp nani ba mita upla tringsar nina lika blîkbia apia, sakuna witin nani ba wina plapbia, kan witin nani lika upla tringsar nani bîla baikra ba wawalra apia sa bamna.”

⁶ Jisas naha maprika na aisin, sakuna parisi nani sip tânka briras kata, dîa wiaia dukiara Jisas baha aisin ba.

Jisas Sepad yamni ba

⁷ Bamna Jisas kli parisi nani ra win: “Kasak pali man nani ra mai wisni: Yang sika sîp nani dimaia durka ba.

⁸ Sakuna baha nani sut yang kainira balan ba lika, âimplikra nani bara upla ra rausauhki dukia dadakbra nani kan; bara sîp nani ba mita witin nani ra walras kata.

⁹ Yang sika dur ba: bamna ani uplika yangku dimbia ba, swaki sakan kabia. Bara witinka ba lika sîp kumi klarka ra dimi si, ai pata pliki taki auya baku kabia.

¹⁰ “Bamna âimplikra ba lika aula, implikaia bara iki âpu daukaia baman; sakuna yang balri na lika, witin nani raya kaia lâka bribia ba dukiara, bara baha sin manis pali bribia mata.

¹¹ Yang sika Sepad yamni ba. Sepad yamni ba ai sîpka nani tâwan ai rayaka ba yabaia wilin sa.

¹² Sakuna wark taki uplika ba lika ai mana briaia dukiara baman wark takisa; bamna ani piua yul wail kaikan aula ba ra, sîpka nani ba swi si plapisa, kan witin ba sepad apia sa, bara sîp nani ba sin ai dukia apia bamna. Baku bamna, yul wail ba mita sîp nani ba alkuya, bara yakabrira baman daukuya.

¹³ Naha waitnika na lika plapisa ai mana ba dukiara baman wark takisa bamna, bara baha mita sîp nani ba dukiara lukras pali sa.

^14-15 “Yang sika Sepad yamni ba. Aisiki mita ai kakaira ba baku, yang mita sin Aisiki ba kakaira pali sni, bara baha sim natka ra, yang na sîpki nani mita sin ai kakaira ba baku. Bara sîpki nani ba tâwan yang rayaki ba yaia wilin sni.

¹⁶ Bara sîp wala nani sin brisni, bara baha nani ba lika naha klarka wina apia sa; sakuna baha nani ba sin brih balaia sni. Âu, witin nani mita sin yang bîli walbia, bara baku dakni kumi takbia bara sepadka sin kumi kabia.

¹⁷ “Aisa latwan ai kaikisa, kan yang rayaki ba yaia wilin sni, adar ba kat yang kli baha ba briaia dukiara.

¹⁸ Upla kumi sin âpu sa rayaki ba yang wina sakaia, yang kupi wilinkira yamna kaka lika. Baha ba yang yaia sna, kli briaia ba dukiara. Naha sika Aisa mita adar aikan ba.”

¹⁹ Ju nani ba naha bîla nani walan ba ra, kli aihka baiwi takan.

²⁰ Witin nani ba wina manis aisin: —Witin ba pirit saura kum brisa bara lal saura kaka, ¿dîa muni man nani bui witin ra walisma?

²¹ Sakuna wala nani bila: —Upla kum pirit saura kum bri kaka, nahmuna bîla nani sip aisaras sa. ¿Sip sa ki pirit saura kum mita blain uplika nani ra nakra yaia?

Ju nani mita Jisas ra bahki kulkan

²² Kauhla piua ba ra, Jerusalem ra tempel Dawan mihta ra mangkan piua liliaka ba dauki banhwi kan.

²³ Jisas ba tempel ra wapi tauki kan, Salaman Durka wi ba tani ra,

²⁴ bara Ju nani Jisas tnaya kir kutbi win: —¿Ahkia kat man wan kupia namhpa namhpa wan muni kama ki? Man ba Kraist kaka, param wan wis.

²⁵ Jisas pana win: —Yang pat mai wîri, sakuna man nani kasak ai lukras sma. Diara nani daukisna ba lika Aisiki karnika ra sika, bara baha ba mita param marikan sa;

²⁶ sakuna man nani sip kasak lukras sma, kan man nani ba sîpki nani apia sma.

²⁷ Sîpki nani ba bîli baikra pain walisa; yang bui witin nani ba kakaira sna, bara witin nani nini blikisa.

²⁸ Yang baha nani ra raya ban kaia lâka ba yabisni, bamna witin nani sin prubia apia ban kaia ra raya kabia, baku bamna upla kumi sin âpu sa baha nani ba mihti wina dakbi briaia.

²⁹ Aisiki mita aikan dukia ba kau tara sa diara wala nani ba sut wal; bara upla kumi sin baha nani ba Aisa mihta wina sip dakbi bribia apia.

³⁰ Yang na Aisa wal kumi pali sni.

³¹ Bara Ju nani kli walpa nani brin, Jisas ra lulki sabaia.

³² Bamna Jisas mita witin nani ra win: —Aisiki karnika mita man nani mamwanra diara manis pain daukri; ¿ani pali dukia ba tâwan walpa ni ai sabaisma ki?

³³ Ju nani pana win: —Diara pain nani daukram ba kumi sin tâwan yang nani bui man ra walpa ni mai sabamna apia, sakuna man bui Gâd mapara saura aisisma ba tâwan lika. Man ba upla kum sma, bara trai kaikisma wînam ba Gâd baku takaia.

³⁴ Jisas pana win: —Man nani lâmka ra Gâd aisin ba ulban sa: ‘Man nani ba gâd nani sma.’

³⁵ Yawan kaikisa Ulbanka dîa aisi ba, sip baha ba bahki wiras; bamna Gâd mita baha uplika nani ai smalkanka alki brin nani ba gâd nani mâkan sa.

³⁶ Bamna Gâd mita bâk saki naha tasba ra ai blikan kaka, ¿nahki man nani wiaia sip sma, yang lika Gâd Luhpia sna wîri ba wal ai mapara saura aisari?

³⁷ Aisiki dîa dîa dauki dukia nani ba daukras sna kaka, man nani ba yang ra ai lukpara.

³⁸ Sakuna daukisna kaka, yang pali ra kasak lukras kama kra, kuna diara nani daukisna ba ra kasak luks, bara baku mika man nani kaiki kama, Aisa ba yang ra iwisa bara yang sin witin ra.

³⁹ Bamna Ju nani kli Jisas ba priski brih waia lukan, kuna witin swak takan.

⁴⁰ Bamna Jisas ba Jordan awala lalma tani ra bal, bahara takaskan; baha pliska ra sika pas piua, Jan Tatahbra mita upla tahbi dauki kan ba.

⁴¹ Upla ailal Jisas kaikaia balan ba, naku aisi banhwi kan: —Âu, Jan lika wark aihka nani daukras kan, sakuna naha waitnika dukiara diara nani aisi kan ba lika sut kasak pali kan.

⁴² Bamna baha pliska ra, upla ailal Jisas ra kasak lukan.